ബോധരഹിതരാക്കിയ ജോലിക്കാരൻ വീട്ടിൽ മോഷണം നടത്തി കടന്നുകളഞ്ഞെന്ന് മുൻ ഐഎഎസ് ഉദ്യോഗസ്ഥ പൂജ ഖേദ്കറുടെ പരാതി

പുണെ: തന്നെയും മാതാപിതാക്കളെയും ബോധരഹിതരാക്കിയ ജോലിക്കാരൻ വീട്ടിൽ മോഷണം നടത്തിയെന്ന മുൻ ഐഎഎസ് ഉദ്യോഗസ്ഥ പൂജ ഖേദ്കറുടെ ആരോപണത്തിൽ പുണെ പൊലീസ് അന്വേഷണം ആരംഭിച്ചു.

ബാനേർ റോഡിലെ ബംഗ്ലാവിൽ നടന്ന സംഭവത്തെക്കുറിച്ച് ശനിയാഴ്ച രാത്രിയാണ് അവർ പൊലീസിനെ അറിയിച്ചത്. അതേസമയം, വ്യാജരേഖയുണ്ടാക്കി സിവിൽ സർവീസ് നേടിയെന്ന ആരോപണത്തിൽ സർവീസിൽനിന്നു പുറത്താക്കപ്പെട്ട പൂജ ഖേദ്കർ, ഇതുവരെ രേഖാമൂലം പരാതി നൽകുകയോ മോഷ്ടിക്കപ്പെട്ടതായി അവകാശപ്പെടുന്ന വിലപിടിപ്പുള്ള വസ്തുക്കളെക്കുറിച്ചുള്ള വിശദാംശങ്ങൾ നൽകുകയോ ചെയ്തിട്ടില്ലെന്നു പൊലീസ് അറിയിച്ചു.

തന്നെയും മാതാപിതാക്കളായ ദിലീപിനെയും മനോരമയെയും നേപ്പാൾ സ്വദേശിയായ വീട്ടുജോലിക്കാരൻ ലഹരിമരുന്ന് നൽകി ബോധരഹിതരാക്കിയെന്നും കെട്ടിയിട്ട ശേഷം മൊബൈൽ ഫോണുകളും വിലപിടിപ്പുള്ള വസ്തുക്കളും കവർന്നെന്നുമാണു പൂജയുടെ ആരോപണം.

ബോധം തെളിഞ്ഞപ്പോൾ മറ്റൊരു ഫോൺ ഉപയോഗിച്ച് പൊലീസിനെ അറിയിക്കുകയായിരുന്നെന്ന് അവർ പറഞ്ഞു.കഴിഞ്ഞവർഷം നവിമുംബൈയിൽ വച്ചു കാറിൽ ട്രക്ക് ഉരഞ്ഞതുമായി ബന്ധപ്പെട്ട തർക്കത്തിനൊടുവിൽ ട്രക്ക് ഡ്രൈവറെ തട്ടിക്കൊണ്ടുപോയ കേസിൽ പൂജയുടെ മാതാപിതാക്കൾക്കെതിരെ പൊലീസ് കേസെടുത്തിരുന്നു