ബംഗളൂരുവിൽ മദ്യപിച്ച് പാഞ്ഞുകയറിയ കാർ റെസ്റ്റോറന്റ് മതിലിലിടിച്ചു; ഒഴിവായത് വൻ ദുരന്തം,

 ബംഗളൂരു: ഇന്ദിരാനഗറിലെ തിരക്കേറിയ 100 ഫീറ്റ് റോഡിൽ മദ്യലഹരിയിൽ സോഫ്റ്റ്‌വെയർ എഞ്ചിനീയർ ഓടിച്ച കാർ നിയന്ത്രണം വിട്ട് റെസ്റ്റോറന്റിലേക്ക് പാഞ്ഞുകയറി.

വ്യാഴാഴ്ച രാത്രി 11.30-ഓടെയാണ് സംഭവം. അമിതവേഗതയിലെത്തിയ കാർ റോഡ് മീഡിയൻ മറികടന്ന് റെസ്റ്റോറന്റിന് മുന്നിൽ നിന്നിരുന്നവർക്കിടയിലേക്ക് പാഞ്ഞുകയറുകയായിരുന്നു. അപകടത്തിൽ ഒരു യുവാവിന് പരിക്കേൽക്കുകയും രണ്ട് വാഹനങ്ങൾക്ക് കേടുപാടുകൾ സംഭവിക്കുകയും ചെയ്തു.

ഡോംലൂർ സ്വദേശിയായ ഡെറിക് ടോണി (42) എന്ന സോഫ്റ്റ്‌വെയർ എഞ്ചിനീയറാണ് അപകടമുണ്ടാക്കിയത്. സ്വകാര്യ കമ്പനിയിലെ ജീവനക്കാരനായ ടോണി പാർട്ടി കഴിഞ്ഞ് വീട്ടിലേക്ക് മടങ്ങുകയായിരുന്നു. സൈഡ് ലെയിനിൽ നിന്നും 100 ഫീറ്റ് റോഡിലേക്ക് പ്രവേശിച്ച കാർ, ഇടതുവശത്തേക്ക് തിരിയുന്നതിന് പകരം നേരെ മീഡിയൻ മറികടന്ന് എതിർവശത്തുള്ള 'ബാർബിക്യൂ നേഷൻ' റെസ്റ്റോറന്റിലേക്ക് ഇടിച്ചു കയറുകയായിരുന്നു.

A major tragedy was narrowly averted in Bengaluru’s Indiranagar when a drunk-driving software engineer lost control of his car, jumped the median on 100 Feet Road and crashed into a restaurant wall. One person was injured, vehicles were damaged, and police booked the driver. pic.twitter.com/u6d89yWJqd

— Rareshares (@unnikutan77) January 11, 2026

ഈ സമയം റെസ്റ്റോറന്റിന് പുറത്ത് സ്ത്രീകളടക്കം ആറോളം പേർ നിൽക്കുന്നുണ്ടായിരുന്നു. നിയന്ത്രണം വിട്ട കാർ തങ്ങൾക്ക് നേരെ വരുന്നത് കണ്ട് ഇവർ ഓടി മാറിയതിനാലാണ് വൻ ദുരന്തം ഒഴിവായത്. ഒടുവിൽ റെസ്റ്റോറന്റിന്റെ മതിലിൽ ഇടിച്ചാണ് കാർ നിന്നത്.

പോലീസ് നടപടി:

സംഭവസ്ഥലത്തെത്തിയ ജീവൻ ഭീമാനഗർ ട്രാഫിക് പോലീസ് ഡെറിക് ടോണിയെ കസ്റ്റഡിയിലെടുത്തു. വൈദ്യപരിശോധനയിൽ ഇയാൾ മദ്യപിച്ചിരുന്നതായി സ്ഥിരീകരിച്ചു. റെസ്റ്റോറന്റ് ജീവനക്കാരൻ ലാൽ മുഹമ്മദ് നൽകിയ പരാതിയുടെ അടിസ്ഥാനത്തിൽ ഭാരതീയ ന്യായ സംഹിതയിലെ (BNS) സെക്ഷൻ 281, 125 എന്നിവ പ്രകാരവും മദ്യപിച്ച് വാഹനമോടിച്ചതിന് മോട്ടോർ വാഹന നിയമപ്രകാരവും കേസെടുത്തു.: പ്രതിയുടെ കാർ പോലീസ് പിടിച്ചെടുത്തു. കുറ്റപത്രം സമർപ്പിച്ച ശേഷം പ്രതി കോടതിയിൽ ഹാജരായി പിഴയടയ്ക്കേണ്ടി വരുമെന്ന് ട്രാഫിക് പോലീസ് അറിയിച്ചു.

സൈഡ് ലെയിനിൽ ഇയാൾ അതീവ അപകടകരമായ രീതിയിലാണ് വാഹനമോടിച്ചതെന്ന് സിസിടിവി ദൃശ്യങ്ങളിൽ വ്യക്തമാണെന്ന് പോലീസ് ഉദ്യോഗസ്ഥർ പറഞ്ഞു. മറ്റുള്ളവരുടെ ജീവൻ പണയപ്പെടുത്തി വാഹനമോടിക്കുന്നവർക്കെതിരെ കർശന നടപടി സ്വീകരിക്കുമെന്നും അധികൃതർ വ്യക്തമാക്കി.