അർദ്ധരാത്രിയിൽ ആയുധധാരികളായ ഡെൽറ്റ ഫോഴ്‌സ്; മഡുറോയെയും പത്നിയെയും വലിച്ചിഴച്ച് അമേരിക്കൻ കപ്പലിലേക്ക്.

 വാഷിംഗ്ടൺ/കാരാക്കസ്: വെനസ്വേലൻ പ്രസിഡന്റ് നിക്കോളാസ് മഡുറോയെയും പ്രഥമ വനിത സിലിയ ഫ്ലോറസിനെയും യുഎസ് കമാൻഡോകൾ കാരാക്കസിലെ അതീവ സുരക്ഷാ മേഖലയായ ഫോർട്ട് ടിയൂണ മിലിട്ടറി കോംപ്ലക്സിൽ ശനിയാഴ്ച പുലർച്ചെ നടത്തിയ നാടകീയമായ സൈനിക നീക്കത്തിലൂടെയാണ് ഇവരെ പിടികൂടിയതെന്ന് സിഎൻഎൻ റിപ്പോർട്ട് ചെയ്തു.

യുഎസ് ആർമിയുടെ ഡെൽറ്റ ഫോഴ്‌സും എഫ്‌ബിഐയും സംയുക്തമായാണ് അതിസാഹസികമായ ഈ ഓപ്പറേഷൻ പൂർത്തിയാക്കിയത്.

'ഫോർട്ട്' തകർത്ത് യുഎസ് കമാൻഡോകൾ

അതീവ സുരക്ഷിതമെന്ന് കരുതപ്പെട്ടിരുന്ന പ്രസിഡന്റിന്റെ ഔദ്യോഗിക വസതിയിൽ ഇരുവരും ഉറങ്ങിക്കിടക്കുമ്പോഴായിരുന്നു അമേരിക്കൻ സൈന്യത്തിന്റെ കടന്നുകയറ്റം. വെറും അരമണിക്കൂറിനുള്ളിൽ ദൗത്യം പൂർത്തിയാക്കി മഡുറോയെയും പത്നിയെയും സൈന്യം വെനസ്വേലയ്ക്ക് പുറത്തെത്തിച്ചു.
ദൗത്യത്തെക്കുറിച്ച് യുഎസ് പ്രസിഡന്റ് ഡൊണാൾഡ് ട്രംപ് പ്രതികരിച്ചത് ഇങ്ങനെ:

View this post on Instagram

A post shared by @osintdefender

"ഒരു കോട്ടയ്ക്കുള്ളിലായിരുന്നു അദ്ദേഹം (മഡുറോ) കഴിഞ്ഞിരുന്നത്. സൈനിക നടപടിയിൽ അമേരിക്കൻ ഉദ്യോഗസ്ഥർ ആരും കൊല്ലപ്പെട്ടില്ല എന്നത് അത്ഭുതകരമാണ്. ദൗത്യത്തിനിടെ പരിക്കേറ്റ സൈനികർ സുഖം പ്രാപിച്ചുവരുന്നു."

നർക്കോ-ഭീകരവാദ കുറ്റാരോപണങ്ങൾ

മഡുറോയെയും സിലിയയെയും അമേരിക്കയിലെത്തിച്ചതായും അവിടെ നർക്കോ-ഭീകരവാദ (Narco-Terrorism) കുറ്റാരോപണങ്ങളിൽ വിചാരണ നേരിടേണ്ടി വരുമെന്നും യുഎസ് ഉദ്യോഗസ്ഥർ വ്യക്തമാക്കി. അന്താരാഷ്ട്ര കൊക്കെയ്ൻ കടത്ത് സംഘങ്ങളുമായി മഡുറോയ്ക്ക് ബന്ധമുണ്ടെന്ന് 2020-ൽ അമേരിക്ക ഔദ്യോഗികമായി കുറ്റപത്രം സമർപ്പിച്ചിരുന്നു.

കാരാക്കസിൽ സ്ഫോടന പരമ്പര

യുഎസ് ദൗത്യത്തിനിടെ കാരാക്കസിൽ കുറഞ്ഞത് ഏഴോളം സ്ഫോടനങ്ങൾ നടന്നതായി പ്രാദേശിക റിപ്പോർട്ടുകൾ സൂചിപ്പിക്കുന്നു. ആക്രമണത്തിൽ സൈനികരും സാധാരണക്കാരും കൊല്ലപ്പെട്ടതായി വെനസ്വേലൻ വൈസ് പ്രസിഡന്റ് ഡെൽസി റോഡ്രിഗസ് അറിയിച്ചെങ്കിലും മരണസംഖ്യ പുറത്തുവിട്ടിട്ടില്ല.

ഭരണം ഏറ്റെടുക്കുമെന്ന് ട്രംപ്

വെനസ്വേലയുടെ ഭരണം ഇടക്കാലത്തേക്ക് യുഎസ് ഭരണകൂടം ഏറ്റെടുക്കുമെന്ന് ഡൊണാൾഡ് ട്രംപ് പ്രഖ്യാപിച്ചു. അധികാര കൈമാറ്റത്തിനുള്ള നടപടികൾ ആരംഭിച്ചതായും അദ്ദേഹം വ്യക്തമാക്കി. മഡുറോയുടെ ദൈനംദിന ശീലങ്ങളും സഞ്ചാരപഥങ്ങളും മാസങ്ങളോളം നിരീക്ഷിച്ച ശേഷമാണ് ഈ മിന്നൽ ആക്രമണത്തിന് പദ്ധതിയിട്ടത്.

മയക്കുമരുന്ന് കടത്ത് അവസാനിപ്പിക്കണമെന്നും അമേരിക്കയുടെ എണ്ണ തിരിച്ചുനൽകണമെന്നും കാരാക്കസ് ഭരണകൂടത്തിന് പലതവണ മുന്നറിയിപ്പ് നൽകിയിരുന്നതായി വൈസ് പ്രസിഡന്റ് ജെ.ഡി. വാൻസ് പറഞ്ഞു. ലഭിച്ച അവസരങ്ങളൊന്നും മഡുറോ ഉപയോഗപ്പെടുത്തിയില്ലെന്നും വാൻസ് കൂട്ടിച്ചേർത്തു.