വെനസ്വേലയിൽ പ്രസിഡൻഷ്യൽ കൊട്ടാരത്തിന് സമീപം കനത്ത വെടിവെപ്പും ഡ്രോൺ സാന്നിധ്യവും;പങ്കില്ലെന്ന് വൈറ്റ് ഹൗസ്

 കാരക്കാസ്: മുൻ പ്രസിഡന്റ് നിക്കോളാസ് മഡൂറോയെ യുഎസ് സേന പിടികൂടി നീക്കം ചെയ്തതിന് പിന്നാലെ വെനസ്വേലൻ തലസ്ഥാനമായ കാരക്കാസിൽ സംഘർഷാവസ്ഥ കടുക്കുന്നു.

ചൊവ്വാഴ്ച പുലർച്ചെ പ്രസിഡൻഷ്യൽ കൊട്ടാരമായ മിറാഫ്ലോറസിന് സമീപം കനത്ത വെടിവെപ്പും ഡ്രോൺ സാന്നിധ്യവും റിപ്പോർട്ട് ചെയ്തു.

കൊട്ടാരത്തിന് സമീപം വെടിയൊച്ചകൾ

പ്രാദേശിക സമയം രാത്രി എട്ടു മണിയോടെയാണ് മിറാഫ്ലോറസ് കൊട്ടാരത്തിന് സമീപം വെടിവെപ്പ് ആരംഭിച്ചത്. കൊട്ടാര സമുച്ചയത്തിന് മുകളിലൂടെ അജ്ഞാത ഡ്രോണുകൾ പറക്കുന്നത് കണ്ടതായും ഇതിനെ പ്രതിരോധിക്കാനാണ് സുരക്ഷാ സേന വെടിയുതിർത്തതെന്നും സർക്കാർ വൃത്തങ്ങളെ ഉദ്ധരിച്ച് വാർത്താ ഏജൻസികൾ റിപ്പോർട്ട് ചെയ്തു. നഗരത്തിന്റെ വിവിധ ഭാഗങ്ങളിൽ ഏതാണ്ട് 45 മിനിറ്റോളം വെടിവെപ്പ് നീണ്ടുനിന്നതായും ചിലയിടങ്ങളിൽ വൈദ്യുതി ബന്ധം വിച്ഛേദിക്കപ്പെട്ടതായും റിപ്പോർട്ടുകളുണ്ട്. എന്നാൽ സംഭവത്തിൽ ആളപായമോ നാശനഷ്ടങ്ങളോ ഉണ്ടായോ എന്ന കാര്യത്തിൽ ഔദ്യോഗിക സ്ഥിരീകരണമില്ല. അതേസമയം, കാരക്കാസിലെ സംഭവവികാസങ്ങളിൽ തങ്ങൾക്ക് പങ്കില്ലെന്ന് വൈറ്റ് ഹൗസ് വ്യക്തമാക്കി.

ഡെൽസി റോഡ്രിഗസ് ഇടക്കാല പ്രസിഡന്റ്

മഡൂറോയുടെ വിശ്വസ്തയും വൈസ് പ്രസിഡന്റുമായിരുന്ന ഡെൽസി റോഡ്രിഗസ് ഇടക്കാല പ്രസിഡന്റായി സത്യപ്രതിജ്ഞ ചെയ്ത് അധികാരമേറ്റതിന് പിന്നാലെയാണ് തലസ്ഥാനത്ത് സുരക്ഷാ ആശങ്കകൾ വർദ്ധിച്ചത്. ശനിയാഴ്ച യുഎസ് സൈന്യം നടത്തിയ മിന്നൽ നീക്കത്തിലൂടെ മഡൂറോയെ പിടികൂടി അമേരിക്കയിലേക്ക് കൊണ്ടുപോയതോടെയാണ് രാജ്യം കടുത്ത രാഷ്ട്രീയ പ്രതിസന്ധിയിലായത്.

അടിയന്തരാവസ്ഥ പ്രഖ്യാപിച്ചു; മഡൂറോ കോടതിയിൽ

രാജ്യത്ത് 'അടിയന്തര അവസ്ഥ' (State of External Commotion) പ്രഖ്യാപിച്ചുകൊണ്ടുള്ള ഉത്തരവിൽ ഇടക്കാല പ്രസിഡന്റ് ഒപ്പുവെച്ചു. യുഎസ് നീക്കത്തെ പിന്തുണയ്ക്കുന്നവരെയും അതിനായി പ്രവർത്തിച്ചവരെയും ഉടനടി കണ്ടെത്തി അറസ്റ്റ് ചെയ്യാൻ സുരക്ഷാ സേനയ്ക്ക് പൂർണ്ണ അധികാരം നൽകുന്നതാണ് ഈ ഉത്തരവ്. 1999-ൽ നിലവിൽ വന്ന ഭരണഘടന പ്രകാരം ഇതാദ്യമായാണ് പ്രസിഡന്റിന് പരമാധികാരം നൽകുന്ന ഇത്തരം ഒരു നിയമം നടപ്പിലാക്കുന്നത്.

അതേസമയം, തിങ്കളാഴ്ച ന്യൂയോർക്കിലെ ഫെഡറൽ കോടതിയിൽ ഹാജരാക്കിയ നിക്കോളാസ് മഡൂറോ തനിക്കെതിരെയുള്ള കുറ്റാരോപണങ്ങൾ നിഷേധിച്ചു. ഇതിനിടെ, മഡൂറോയുമായി ബന്ധപ്പെട്ട് സ്വിറ്റ്സർലൻഡിലുള്ള ആസ്തികൾ സ്വിസ് സർക്കാർ മരവിപ്പിച്ചു. ഈ സമ്പാദ്യം നിയമവിരുദ്ധമായി സമ്പാദിച്ചതാണെന്ന് തെളിഞ്ഞാൽ അത് വെനസ്വേലയിലെ ജനങ്ങളുടെ നന്മയ്ക്കായി വിനിയോഗിക്കുമെന്നും സ്വിറ്റ്സർലൻഡ് അറിയിച്ചു.