വെനസ്വേലയിൽ ട്രംപിന്റെ മുന്നറിയിപ്പ്: "മഡൂറോയെക്കാൾ വലിയ വില നൽകേണ്ടി വരും"; ഗ്രീൻലാൻഡ് വിഷയത്തിലും നിർണ്ണായക നീക്കം

 വാഷിംഗ്ടൺ/കാരാക്കസ്: വെനസ്വേലൻ പ്രസിഡന്റ് നിക്കോളാസ് മഡൂറോയെ നാടകീയമായി പിടികൂടി യുഎസിൽ എത്തിച്ചതിന് പിന്നാലെ, വെനസ്വേലയുടെ താൽക്കാലിക ഭരണത്തലവയായി ചുമതലയേറ്റ ഡെൽസി റോഡ്രിഗസിന് കടുത്ത താക്കീതുമായി ഡൊണാൾഡ് ട്രംപ്.

യുഎസ് ഭരണകൂടത്തോട് സഹകരിക്കാൻ തയ്യാറായില്ലെങ്കിൽ മഡൂറോയേക്കാൾ വലിയ പ്രത്യാഘാതങ്ങൾ നേരിടേണ്ടി വരുമെന്ന് ട്രംപ് മുന്നറിയിപ്പ് നൽകി. 'ദി അറ്റ്‌ലാന്റിക്' മാഗസിനുമായുള്ള അഭിമുഖത്തിലാണ് ട്രംപ് തന്റെ നിലപാട് വ്യക്തമാക്കിയത്.

'മഡൂറോയെക്കാൾ വലിയ വില നൽകേണ്ടി വരും'

"അവർ (ഡെൽസി) ശരിയായ കാര്യമാണ് ചെയ്യുന്നതെങ്കിൽ വലിയ പ്രശ്നമുണ്ടാകില്ല. എന്നാൽ സഹകരിക്കാൻ തയ്യാറല്ലെങ്കിൽ, മഡൂറോ നൽകിയതിനേക്കാൾ വലിയ വില അവർക്ക് നൽകേണ്ടി വരും," ട്രംപ് പറഞ്ഞു. നിലവിൽ ന്യൂയോർക്കിലെ ജയിലിൽ കഴിയുന്ന നിക്കോളാസ് മഡൂറോയെ സൂചിപ്പിച്ചുകൊണ്ടായിരുന്നു ട്രംപിന്റെ വാക്കുകൾ. വെനസ്വേലയുടെ എണ്ണ സമ്പത്തിലും മറ്റ് പ്രകൃതിവിഭവങ്ങളിലും തങ്ങൾക്ക് പൂർണ്ണമായ പ്രവേശനം (Total Access) ആവശ്യമാണെന്നും രാജ്യം പുനർനിർമ്മിക്കാൻ അത് അത്യാവശ്യമാണെന്നും അദ്ദേഹം എയർ ഫോഴ്സ് വണ്ണിൽ വെച്ച് മാധ്യമപ്രവർത്തകരോട് പറഞ്ഞു.

വെനസ്വേലയുടെ തിരിച്ചടി

ട്രംപിന്റെ ഭീഷണിയെ തള്ളിക്കളഞ്ഞ ഡെൽസി റോഡ്രിഗസ്, വെനസ്വേല ഇനിയൊരിക്കലും ഒരു അധിനിവേശ ശക്തിയുടെയും കോളനിയാകില്ലെന്ന് പ്രഖ്യാപിച്ചു. വെനസ്വേലയുടെ പ്രകൃതിവിഭവങ്ങൾ സംരക്ഷിക്കാൻ രാജ്യം സന്നദ്ധമാണെന്നും അവർ വ്യക്തമാക്കി. മഡൂറോയെ യുഎസ് സേന തട്ടിക്കൊണ്ടുപോയതിനെത്തുടർന്ന് വെനസ്വേലൻ സുപ്രീം കോടതിയാണ് വൈസ് പ്രസിഡന്റായിരുന്ന ഡെൽസിയെ താൽക്കാലിക പ്രസിഡന്റായി നിയമിച്ചത്.

'ഓപ്പറേഷൻ അബ്സല്യൂട്ട് റിസോൾവ്'

മഡൂറോയെ പിടികൂടിയ സൈനിക നീക്കം 'തികച്ചും കൃത്യമായി നടപ്പിലാക്കിയ ദൗത്യ'മാണെന്ന് എഫ്ബിഐ ഡയറക്ടർ കാഷ് പട്ടേൽ വിശേഷിപ്പിച്ചു. മാസങ്ങൾ നീണ്ട ആസൂത്രണത്തിനൊടുവിൽ ഡിപ്പാർട്ട്‌മെന്റ് ഓഫ് വാർ, സ്റ്റേറ്റ് ഡിപ്പാർട്ട്‌മെന്റ്, എഫ്ബിഐ, ഡിഇഎ എന്നിവയുടെ സംയുക്ത നീക്കത്തിലൂടെയാണ് മഡൂറോയെ കസ്റ്റഡിയിലെടുത്തതെന്ന് അദ്ദേഹം അറിയിച്ചു. മയക്കുമരുന്ന് കടത്ത്, നാർക്കോ-ഭീകരവാദം തുടങ്ങിയ കേസുകളിലാണ് മഡൂറോ നിലവിൽ യുഎസിൽ വിചാരണ നേരിടുന്നത്.

ഗ്രീൻലാൻഡ് അടുത്ത ലക്ഷ്യമോ?

വെനസ്വേലയ്ക്ക് പുറമെ ഡെന്മാർക്കിന്റെ ഭാഗമായ ഗ്രീൻലാൻഡിലും യുഎസ് കണ്ണുവെക്കുന്നു എന്ന സൂചനകൾ ട്രംപ് വീണ്ടും നൽകി. ഗ്രീൻലാൻഡ് തങ്ങൾക്ക് ആവശ്യമാണെന്നും റഷ്യൻ-ചൈനീസ് കപ്പലുകൾ ആ മേഖലയിൽ വർദ്ധിക്കുന്നത് ദേശീയ സുരക്ഷയ്ക്ക് ഭീഷണിയാണെന്നും അദ്ദേഹം പറഞ്ഞു. "നമുക്ക് തീർച്ചയായും ഗ്രീൻലാൻഡ് വേണം," ട്രംപ് കൂട്ടിച്ചേർത്തു.