ശൂന്യാകാശത്തെ വെല്ലുവിളികളും വിസ്മയങ്ങളും: വിരമിക്കൽ പ്രഖ്യാപനത്തിന് പിന്നാലെ മനസ്സ് തുറന്ന് സുനിത വില്യംസ്

 ന്യൂഡൽഹി: നാസയിലെ 27 വർഷത്തെ സേവനത്തിന് ശേഷം വിരമിക്കൽ പ്രഖ്യാപിച്ച ഇന്ത്യൻ വംശജയായ ബഹിരാകാശ യാത്രിക സുനിത വില്യംസ്, ശൂന്യാകാശത്തെ തന്റെ അനുഭവങ്ങൾ പങ്കുവെക്കുന്നു.

2025-ലെ ബോയിംഗ് സ്റ്റാർലൈനർ ദൗത്യത്തിന്റെ ഭാഗമായി ഒമ്പത് മാസത്തോളം ബഹിരാകാശത്ത് ചിലവഴിച്ച ശേഷമുള്ള മടങ്ങിവരവിൽ, ശൂന്യാകാശത്തെ ദൈനംദിന ജീവിതത്തിലെ വെല്ലുവിളികളെക്കുറിച്ച് രാജ് ഷമാനിയുടെ പോഡ്‌കാസ്റ്റിലാണ് അവർ മനസ്സ് തുറന്നത്.

ശൂന്യാകാശത്തെ 'ബാത്‌റൂം' ശീലങ്ങൾ

സീറോ ഗ്രാവിറ്റി (Zero Gravity) അഥവാ ഗുരുത്വാകർഷണമില്ലാത്ത അവസ്ഥയിൽ ബാത്‌റൂം ഉപയോഗിക്കുന്നത് അങ്ങേയറ്റം പ്രയാസകരമായ കാര്യമാണെന്ന് സുനിത പറയുന്നു. "ഭൂമിയിലേതുപോലെ ഗുരുത്വാകർഷണത്തിന്റെ സഹായമില്ലാത്തതിനാൽ ശരീരം ഇത്തരം സാഹചര്യങ്ങളോട് പൊരുത്തപ്പെടാൻ സമയമെടുക്കും. പേശികളെ കൃത്യമായി നിയന്ത്രിക്കുക എന്നത് വലിയൊരു വെല്ലുവിളിയാണ്," സുനിത വിശദീകരിച്ചു. ശൂന്യാകാശത്തെ ടോയ്‌ലറ്റുകൾ ജലത്തിന് പകരം വായുപ്രവാഹമാണ് (Airflow) മാലിന്യങ്ങൾ നീക്കം ചെയ്യാൻ ഉപയോഗിക്കുന്നത്.

ദൈനംദിന ജീവിതത്തിലെ പ്രായോഗിക ബുദ്ധിമുട്ടുകൾ

ശൂന്യാകാശത്ത് സാധാരണ പ്രവൃത്തികൾ പോലും സങ്കീർണ്ണമാണെന്ന് ബംഗളൂരു ആസ്റ്റർ സിഎംഐ ഹോസ്പിറ്റലിലെ ഡോ. പൂജ പിള്ള വ്യക്തമാക്കുന്നു. ദ്രാവകങ്ങൾ താഴേക്ക് ഒഴുകുന്നതിന് പകരം വായുവിൽ തുള്ളികളായി ഒഴുകി നടക്കും. അതിനാൽ പ്രത്യേക സീൽ ചെയ്ത പാക്കറ്റുകളും സ്ട്രോകളും ഉപയോഗിക്കേണ്ടി വരുന്നു. വിയർപ്പ് ശരീരത്തിൽ നിന്ന് ഒലിച്ചു പോകാതെ ചർമ്മത്തിൽ ഒട്ടിപ്പിടിക്കുന്നത് അസ്വസ്ഥതയ്ക്കും അണുബാധയ്ക്കും കാരണമായേക്കാം.വായുവിൽ ഒഴുകി നടക്കാതിരിക്കാൻ സ്ലീപ്പിംഗ് ബാഗുകളിൽ ശരീരം ബന്ധിച്ചാണ് ബഹിരാകാശ യാത്രികർ ഉറങ്ങുന്നത്.

ശൂന്യാകാശത്തെ വികാരനിമിഷങ്ങൾ

മനുഷ്യസഹജമായ വികാരങ്ങൾ ശൂന്യാകാശത്തും തന്നെ വേട്ടയാടിയിരുന്നതായി സുനിത വെളിപ്പെടുത്തി. കുടുംബത്തെയും തന്റെ വളർത്തുനായയെയും മിസ്സ് ചെയ്യുമ്പോൾ പലപ്പോഴും കരഞ്ഞിട്ടുണ്ട്. 10 ദിവസത്തെ സന്ദർശനത്തിനായി പോയിട്ട് 286 ദിവസത്തോളം അവിടെ തങ്ങേണ്ടി വന്ന സാഹചര്യത്തിലും സഹപ്രവർത്തകരുടെ പ്രയാസങ്ങളിൽ അവർക്ക് താങ്ങായി നിന്ന അനുഭവങ്ങളും സുനിത പങ്കുവെച്ചു.

ബഹിരാകാശത്തെ ഇന്ത്യ

ബഹിരാകാശത്ത് നിന്ന് നോക്കുമ്പോൾ ഇന്ത്യ അങ്ങേയറ്റം മനോഹരമാണെന്ന് സുനിത വില്യംസ് പറഞ്ഞു.

"പകൽ സമയത്ത് ഹിമാലയത്തിന്റെ കാഴ്ച അതിശയകരമാണ്. നദികൾ ഒഴുകി നീങ്ങുന്നതും പരസ്പരം ചേരുന്നതും വ്യക്തമായി കാണാം. രാത്രിയിൽ നഗരവിളക്കുകൾ പ്രകാശിച്ചു നിൽക്കുന്ന ഇന്ത്യ കാണാൻ പ്രത്യേക ഭംഗിയാണ്."

രണ്ട് പതിറ്റാണ്ടിലധികം നീണ്ട കരിയറിന് ശേഷം ഭൂമിയിൽ വിശ്രമജീവിതം നയിക്കുന്ന സുനിത വില്യംസ്, വരും തലമുറയിലെ ബഹിരാകാശ ഗവേഷകർക്ക് വലിയ ആവേശമാണ് പകരുന്നത്.