തകർക്കാൻ ശ്രമിച്ചവർ മണ്ണടിഞ്ഞു, സോമനാഥം ഇന്നും ജ്വലിച്ചുനിൽക്കുന്നു: അതിജീവനത്തിന്റെ ആയിരം വർഷങ്ങൾ കുറിച്ച് പ്രധാനമന്ത്രി

 ന്യൂഡൽഹി: സോമനാഥ ക്ഷേത്രത്തിന് നേരെയുണ്ടായ ആദ്യ വിദേശ ആക്രമണത്തിന് ആയിരം വർഷം തികയുമ്പോൾ,

ഭാരതത്തിന്റെ അജയ്യമായ ആത്മവീര്യത്തിന്റെ അടയാളമായി ക്ഷേത്രത്തെ വിശേഷിപ്പിച്ചു പ്രധാനമന്ത്രി നരേന്ദ്ര മോദി. 1026-ൽ നടന്ന ആദ്യ ആക്രമണത്തിന് ശേഷവും ആവർത്തിച്ചുണ്ടായ തകർച്ചകളെ അതിജീവിച്ചു ക്ഷേത്രം ഉയർത്തെഴുന്നേറ്റത് ഭാരതീയ നാഗരികതയുടെയും ആത്മീയ കരുത്തിന്റെയും തെളിവാണെന്ന് അദ്ദേഹം തന്റെ ബ്ലോഗിൽ കുറിച്ചു. സോമനാഥ ക്ഷേത്ര ട്രസ്റ്റ് അധ്യക്ഷൻ കൂടിയാണ് പ്രധാനമന്ത്രി.

'ഭാരതത്തിന്റെ ആത്മാവിന്റെ പ്രഖ്യാപനം'

ദ്വാദശ ജ്യോതിർലിംഗങ്ങളിൽ ആദ്യത്തേതായ സോമനാഥം ഭാരതത്തിന്റെ ആത്മാവിന്റെ നിത്യമായ പ്രഖ്യാപനമാണെന്ന് പ്രധാനമന്ത്രി പറഞ്ഞു. "ആക്രമണകാരികളുടെ ലക്ഷ്യം ആരാധനയല്ല, മറിച്ച് നാശമായിരുന്നു. എന്നാൽ ആയിരം വർഷങ്ങൾക്കിപ്പുറം സോമനാഥത്തിന്റെ കഥ പറയേണ്ടത് തകർച്ചയെക്കുറിച്ചല്ല, മറിച്ച് കോടിക്കണക്കിന് ഭാരതമക്കളുടെ അചഞ്ചലമായ ധീരതയെക്കുറിച്ചാണ്," അദ്ദേഹം വ്യക്തമാക്കി.

ഗുജറാത്തിന്റെ പടിഞ്ഞാറൻ തീരത്ത് പ്രഭാസ് പഠാനിൽ ഇന്ന് സോമനാഥം പുതുശോഭയോടെ നിലകൊള്ളുന്നത് ഭാരതീയ സമൂഹത്തിന്റെ സാമ്പത്തികവും ആത്മീയവുമായ കരുത്തിന്റെ പ്രതീകമാണെന്നും അദ്ദേഹം കൂട്ടിച്ചേർത്തു.

വിദ്വേഷത്തിന് മേൽ വിശ്വാസം നേടിയ വിജയം

ആക്രമണകാരികൾ ചരിത്രത്തിന്റെ താളുകളിൽ വെറും അടിക്കുറിപ്പുകളായി മാറിയെന്നും എന്നാൽ സോമനാഥം ഇന്നും പ്രഭ ചൊരിഞ്ഞുനിൽക്കുന്നുവെന്നും പ്രധാനമന്ത്രി ചൂണ്ടിക്കാട്ടി. "വിദ്വേഷത്തിനും മതഭ്രാന്തിനും ഒരു നിമിഷം കൊണ്ട് എല്ലാം തകർക്കാൻ കഴിഞ്ഞേക്കാം. എന്നാൽ നന്മയിലുള്ള വിശ്വാസത്തിന് നിത്യതയോളം സൃഷ്ടിക്കാനുള്ള കരുത്തുണ്ട്. 1026-ലെ ആക്രമണത്തിന് ശേഷവും തിരമാലകൾ തീരമടിയ്ക്കുന്നത് പോലെ സോമനാഥം വീണ്ടും വീണ്ടും ഉയർത്തെഴുന്നേറ്റു," ബ്ലോഗിൽ പറയുന്നു.

മതസൗഹാർദ്ദത്തിന്റെ കേന്ദ്രം

പ്രാചീന കാലം മുതൽ വിവിധ വിശ്വാസധാരകളെ ഒന്നിപ്പിക്കുന്ന കേന്ദ്രമായിരുന്നു സോമനാഥമെന്ന് പ്രധാനമന്ത്രി ഓർമ്മിപ്പിച്ചു. നൂറ്റാണ്ടുകൾക്ക് മുമ്പ് പ്രശസ്ത ജൈന സന്യാസി ഹേമചന്ദ്രാചാര്യ ക്ഷേത്രത്തിൽ നടത്തിയ പ്രാർത്ഥനയെ അദ്ദേഹം ഉദ്ധരിച്ചു. എല്ലാ കാലത്തും മനുഷ്യന്റെ ആത്മാവിനെ ഉണർത്താനുള്ള ശേഷി ഈ പുണ്യഭൂമിക്കുണ്ടെന്നും അദ്ദേഹം കുറിച്ചു.