ഓപ്പറേഷൻ സിന്ദൂർ പാകിസ്ഥാന് ഏൽപ്പിച്ചത് കനത്ത പ്രഹരം; ഇന്ത്യക്കെതിരെ ഭീഷണി മുഴക്കി ലഷ്കർ ഭീകരൻ സൈഫുള്ള കസൂരി

 ന്യൂഡൽഹി/ഇസ്ലാമാബാദ്: പാകിസ്ഥാൻ കേന്ദ്രമായി പ്രവർത്തിക്കുന്ന ഭീകരസംഘടന ലഷ്കർ-ഇ-തൊയ്ബയുടെ (LeT) ഒളിത്താവളങ്ങൾ തകർക്കുന്നതിൽ ഇന്ത്യൻ സേനയുടെ 'ഓപ്പറേഷൻ സിന്ദൂർ' വൻ വിജയമായിരുന്നുവെന്ന് ഭീകരർ തന്നെ സമ്മതിക്കുന്നു.

ലഷ്കർ ഡെപ്യൂട്ടി ചീഫും പഹൽഗാം ഭീകരാക്രമണത്തിന്റെ സൂത്രധാരനുമായ സൈഫുള്ള കസൂരിയാണ് ഇന്ത്യൻ പ്രത്യാക്രമണത്തിൽ തങ്ങളുടെ അടിസ്ഥാന സൗകര്യങ്ങൾക്ക് വൻ നാശനഷ്ടങ്ങൾ സംഭവിച്ചതായി പരസ്യമായി സമ്മതിച്ചത്.

ExclusiveIntel, Pakistan’s Terror Doctrine Exposed

Operation Sindoor exposed a critical failure, hitting terror camps without dismantling terror leadership leaves the threat alive.

At a public rally, Saifullah Kasuri, Pahalgam attack mastermind and deputy chief of… pic.twitter.com/CePy5U4WVo

— Pakistan Reality Check (@PakRealityCheck) December 31, 2025

പാകിസ്ഥാനിലെ പഞ്ചാബ് പ്രവിശ്യയിലുള്ള കസൂറിൽ നടന്ന പൊതുറാലിയിലാണ് സൈഫുള്ള കസൂരി ഇന്ത്യയുടെ സൈനിക നടപടിയെക്കുറിച്ച് പരാമർശിച്ചത്. ഭീകരക്യാമ്പുകൾ ലക്ഷ്യമിട്ട് ഇന്ത്യ നടത്തിയ ആക്രമണം വലിയ തെറ്റാണെന്നും ഇതിന് ഇന്ത്യ വലിയ വില നൽകേണ്ടി വരുമെന്നും കസൂരി ഭീഷണി മുഴക്കി.

"പഹൽഗാം ആക്രമണത്തിന് ശേഷം എന്റെ പേര് ലോകമെമ്പാടും പ്രശസ്തമായി. ഓപ്പറേഷൻ സിന്ദൂരിലൂടെ ഞങ്ങളുടെ ഒളിത്താവളങ്ങൾ മാത്രം ലക്ഷ്യം വെച്ച ഇന്ത്യക്ക് തെറ്റുപറ്റി. ലോകത്തെ മുഴുവൻ കീഴ്മേൽ മറിക്കാനും വ്യവസ്ഥിതി മാറ്റാനും ഞങ്ങൾക്ക് കഴിയും. കശ്മീർ ദൗത്യത്തിൽ നിന്ന് ലഷ്കർ പിന്നോട്ട് പോകില്ല." - കസൂരി പ്രസംഗത്തിൽ പറഞ്ഞു.

സോഷ്യൽ മീഡിയയിൽ പ്രചരിക്കുന്ന ഈ വീഡിയോ ദൃശ്യങ്ങൾ പാകിസ്ഥാൻ കേന്ദ്രമായി പ്രവർത്തിക്കുന്ന 'പാക് റിയാലിറ്റി ചെക്ക്' ആണ് പുറത്തുവിട്ടത്.

അടിസ്ഥാനരഹിതമായ അവകാശവാദങ്ങൾ

പ്രസംഗത്തിനിടെ ചരിത്രപരമായ വസ്‌തുതകളെ വളച്ചൊടിക്കാനും കസൂരി ശ്രമിച്ചു. കശ്മീർ കൂടാതെ അമൃത്സർ, ഹോഷിയാർപൂർ, ഗുരുദാസ്പൂർ, ജുനഗഡ്, ഹൈദരാബാദ്, ബംഗാൾ എന്നിവയുൾപ്പെടെയുള്ള ഇന്ത്യൻ പ്രദേശങ്ങൾ ഇസ്ലാമാബാദിൽ നിന്ന് പിടിച്ചെടുത്തതാണെന്ന വിചിത്രമായ അവകാശവാദമാണ് ഇയാൾ ഉന്നയിച്ചത്. കശ്മീരിന് അപ്പുറത്തേക്ക് ഭീകരപ്രവർത്തനവും ശത്രുതയും വ്യാപിപ്പിക്കാനുള്ള ലഷ്കറിന്റെ ഗൂഢനീക്കമായാണ് പ്രതിരോധ വിദഗ്ധർ ഇതിനെ കാണുന്നത്.

ഇന്ത്യൻ സൈന്യം അതിർത്തി കടന്നു നടത്തിയ നിർണ്ണായകമായ ഒരു സൈനിക നീക്കമായിരുന്നു 'ഓപ്പറേഷൻ സിന്ദൂർ'. പാകിസ്ഥാനിലും പാകിസ്ഥാൻ അധിനിവേശ കശ്മീരിലും (PoK) താവളമടിച്ചിരുന്ന ഭീകരവാദികൾക്കെതിരെ അതിശക്തമായ പ്രഹരമാണ് ഈ ഓപ്പറേഷനിലൂടെ ഇന്ത്യ നൽകിയത്. മേഖലയിൽ പ്രവർത്തിച്ചിരുന്ന ഒമ്പതോളം പ്രധാന ഭീകരക്യാമ്പുകളെ ലക്ഷ്യം വച്ചായിരുന്നു ഈ ഓപ്പറേഷൻ ആസൂത്രണം ചെയ്തത്.

ഭീകരവാദികളുടെ അടിസ്ഥാന സൗകര്യങ്ങളും നുഴഞ്ഞുകയറ്റത്തിനായി ഒരുക്കിയിരുന്ന ലോഞ്ച് പാഡുകളും പൂർണ്ണമായും തകർക്കുക എന്നതായിരുന്നു ഈ നീക്കത്തിന്റെ പ്രധാന ലക്ഷ്യം. അത്യാധുനിക ഡ്രോണുകളും കൃത്യതയാർന്ന ദീർഘദൂര ആയുധങ്ങളും ഉപയോഗിച്ച് നടത്തിയ ഈ മിന്നൽ നീക്കത്തിലൂടെ, അതിർത്തിക്കപ്പുറത്തെ പന്ത്രണ്ടിലധികം ഭീകര ലോഞ്ച് പാഡുകൾ ഇന്ത്യൻ സേന തകർത്തെറിഞ്ഞു. ശത്രുവിന്റെ കണ്ണ് വെട്ടിച്ച് അതീവ രഹസ്യമായും കൃത്യതയോടെയും നടത്തിയ ഈ ഓപ്പറേഷൻ പാക് ഭീകരസംഘടനകൾക്ക് വലിയ തിരിച്ചടിയായി.

ഇന്ത്യയുടെ ഈ നീക്കത്തിന് മറുപടിയായി പാകിസ്ഥാൻ പ്രത്യാക്രമണത്തിന് ശ്രമിച്ചിരുന്നു. ഇന്ത്യൻ സൈനിക കേന്ദ്രങ്ങളെയും സാധാരണക്കാർ താമസിക്കുന്ന സിവിലിയൻ മേഖലകളെയും ലക്ഷ്യമാക്കി പാകിസ്ഥാൻ തൊടുത്തുവിട്ട മിസൈലുകളെയും ഡ്രോണുകളെയും ഇന്ത്യൻ വ്യോമ പ്രതിരോധ യൂണിറ്റുകൾ (Air Defence Units) ആകാശത്തുവെച്ചുതന്നെ തകർത്തു. ഇന്ത്യയുടെ സുരക്ഷാ കവചം ഭേദിക്കാനുള്ള പാകിസ്ഥാന്റെ എല്ലാ ശ്രമങ്ങളും പരാജയപ്പെട്ടതോടെ, ഓപ്പറേഷൻ സിന്ദൂർ ഇന്ത്യയുടെ സൈനിക മികവിന്റെ ഉദാഹരണമായി മാറി.

മെയ് പത്താം തീയതിയോടെ ഇരുരാജ്യങ്ങളിലെയും ഡിജിഎംഒ-മാർ (DGMO) തമ്മിൽ സംസാരിക്കുകയും വെടിനിർത്തൽ ധാരണയിൽ എത്തുകയും ചെയ്തുവെങ്കിലും, ഭീകരവാദികളുടെ ഭാഗത്തുനിന്നുള്ള ഭീഷണി ഇപ്പോഴും നിലനിൽക്കുന്നതായാണ് കസൂരിയുടെ പ്രസ്താവന വ്യക്തമാക്കുന്നത്.