ബെംഗളൂരുവിൽ നടുറോഡിൽ കഠാരയുമായി അഴിഞ്ഞാട്ടം; കാർ ഡ്രൈവർക്ക് നേരെ വധഭീഷണി, ദൃശ്യങ്ങൾ പുറത്ത്

 ബെംഗളൂരു: നഗരത്തിലെ തിരക്കേറിയ റോഡിൽ ട്രാഫിക് തർക്കത്തിനിടെ കാർ ഡ്രൈവർക്ക് നേരെ സ്കൂട്ടർ യാത്രക്കാരന്റെ വധഭീഷണി.

ഹെൽമെറ്റ് ധരിക്കാതെ നിയമം ലംഘിച്ചെത്തിയ യുവാവ്, കാറിന് കുറുകെ സ്കൂട്ടർ നിർത്തിയിട്ട ശേഷം കഠാരയുമായി ഭീഷണിപ്പെടുത്തുന്ന ഡാഷ്ക്യാം ദൃശ്യങ്ങൾ സമൂഹമാധ്യമങ്ങളിൽ വൈറലായി. സംഭവത്തിൽ നഗരത്തിലെ സുരക്ഷയെക്കുറിച്ച് വലിയ രീതിയിലുള്ള ആശങ്കയാണ് ഉയരുന്നത്.

സിഗ്നലിലെ തർക്കം അക്രമത്തിലേക്ക്

ജനുവരി 16-ന് വൈകുന്നേരം ആറ് മണിയോടെ നെക്‌സസ് ശാന്തിനികേതൻ മാളിന് സമീപമാണ് സംഭവം. ട്രാഫിക് സിഗ്നലിൽ വാഹനങ്ങൾ നിർത്തിയിട്ടിരിക്കെയാണ് ചെറിയ തർക്കം ഭീകരാന്തരീക്ഷത്തിലേക്ക് നീങ്ങിയത്. അമിതവേഗതയിലും അപകടകരമായ രീതിയിലും സ്കൂട്ടർ ഓടിച്ചു വന്നതിനെ കാർ ഡ്രൈവർ ചോദ്യം ചെയ്തതാണ് യുവാവിനെ പ്രകോപിപ്പിച്ചത്.

A shocking road rage incident in #Bengaluru on Jan 16 near Nexus Shantiniketan Mall. A biker allegedly brandished a dagger in moving traffic, threatened commuters, violated traffic rules, and rode without a helmet.#RoadRage #PublicSafety #KadugodiPolice #TrafficViolation pic.twitter.com/VguSM3tH9O

— Whats In The News (@_whatsinthenews) January 18, 2026

നടുറോഡിൽ സ്കൂട്ടർ ഉപേക്ഷിച്ച് അരയിൽ തിരുകിയിരുന്ന കഠാരയുമായി യുവാവ് കാറിന് നേരെ പാഞ്ഞടുക്കുന്നത് ദൃശ്യങ്ങളിൽ വ്യക്തമാണ്. കാർ ഡ്രൈവറെ അസഭ്യം പറയുകയും ആയുധം കാട്ടി ഭീഷണിപ്പെടുത്തുകയും ചെയ്ത ശേഷം ഇയാൾ സ്ഥലത്തുനിന്നും മടങ്ങി.

നടപടി ആവശ്യപ്പെട്ട് സോഷ്യൽ മീഡിയ

കാറിലെ ഡാഷ്ക്യാമിൽ പതിഞ്ഞ ദൃശ്യങ്ങൾ പുറത്തുവന്നതോടെ സ്കൂട്ടർ യാത്രക്കാരനെതിരെ കർശന നടപടി വേണമെന്ന ആവശ്യം ശക്തമായി. ഹെൽമെറ്റ് പോലുമില്ലാതെ ആയുധങ്ങളുമായി ജനവാസമേഖലയിലൂടെ യാത്ര ചെയ്യുന്നത് നിയമവ്യവസ്ഥയോടുള്ള വെല്ലുവിളിയാണെന്ന് സമൂഹമാധ്യമ ഉപയോക്താക്കൾ ചൂണ്ടിക്കാട്ടുന്നു. യുവാവിന്റെ സ്കൂട്ടർ നമ്പർ ഉൾപ്പെടെയുള്ള വിവരങ്ങൾ ദൃശ്യങ്ങളിൽ നിന്നും വ്യക്തമായതിനാൽ പോലീസ് അന്വേഷണം ആരംഭിച്ചിട്ടുണ്ട്.

ബെംഗളൂരു നഗരത്തിലെ 'റോഡ് റേജ്' (Road Rage) സംഭവങ്ങൾ വർധിച്ചു വരുന്ന സാഹചര്യത്തിൽ, ഇത്തരം കുറ്റവാളികൾക്കെതിരെ മാതൃകാപരമായ ശിക്ഷ ഉറപ്പാക്കണമെന്നാണ് പൊതുജനങ്ങളുടെ ആവശ്യം.