ട്രംപ് ഭരണകൂടത്തിൽ കടുത്ത ഭിന്നത: പ്രസിഡന്റിനും ജെ.ഡി. വാൻസിനുമെതിരെ സെനറ്റർ ടെഡ് ക്രൂസ്

വാഷിംഗ്ടൺ: രണ്ടാം ട്രംപ് ഭരണകൂടത്തിനുള്ളിലെ പടലപ്പിണക്കങ്ങൾ പരസ്യപ്പെടുത്തിക്കൊണ്ട് പ്രമുഖ റിപ്പബ്ലിക്കൻ സെനറ്റർ ടെഡ് ക്രൂസിന്റെ വിവാദ ഓഡിയോ പുറത്ത്.

ഇന്ത്യയും അമേരിക്കയും തമ്മിലുള്ള വ്യാപാര കരാർ തടസ്സപ്പെടുത്തുന്നതിൽ പ്രസിഡന്റ് ട്രംപിനും വൈസ് പ്രസിഡന്റ് ജെ.ഡി. വാൻസിനുമെതിരെ ക്രൂസ് രൂക്ഷമായ വിമർശനങ്ങളാണ് ഉന്നയിക്കുന്നത്. അന്താരാഷ്ട്ര മാധ്യമമായ 'ആക്സിയോസ്' (Axios) ആണ് പത്ത് മിനിറ്റോളം ദൈർഘ്യമുള്ള ഈ രഹസ്യ റെക്കോർഡിംഗ് പുറത്തുവിട്ടത്.

ഇന്ത്യയുമായുള്ള കരാർ മുടക്കാൻ നീക്കം 2025-ന്റെ തുടക്കത്തിൽ സ്വകാര്യ ധനസമാഹരണ ചടങ്ങുകളിൽ പങ്കെടുക്കവെ നടത്തിയ പ്രസംഗമാണ് ഇപ്പോൾ പുറത്തുവന്നിരിക്കുന്നത്. സ്വതന്ത്ര വ്യാപാര നയങ്ങളെ പിന്തുണയ്ക്കുന്ന ക്രൂസ്, ഇന്ത്യയുമായുള്ള കരാർ യാഥാർത്ഥ്യമാക്കാൻ താൻ വൈറ്റ് ഹൗസുമായി നിരന്തരം പോരാടുകയാണെന്ന് ദാതാക്കളോട് വ്യക്തമാക്കുന്നു. എന്നാൽ പീറ്റർ നവാരോ, ജെ.ഡി. വാൻസ് എന്നിവരും ചിലപ്പോഴൊക്കെ പ്രസിഡന്റ് ട്രംപ് തന്നെയും ഈ കരാറിന് തടസ്സം നിൽക്കുകയാണെന്ന് അദ്ദേഹം ആരോപിക്കുന്നു.

ട്രംപിന്റെ നയങ്ങൾക്കെതിരെ രൂക്ഷവിമർശനം ട്രംപിന്റെ താരിഫ് (അമിത നികുതി) നയങ്ങൾ അമേരിക്കൻ സമ്പദ്‌വ്യവസ്ഥയെ തകർക്കുമെന്ന് ക്രൂസ് മുന്നറിയിപ്പ് നൽകുന്നുണ്ട്. നികുതി വർദ്ധിപ്പിച്ച നടപടിയെ 'ലിബറേഷൻ ഡേ' എന്ന് ട്രംപ് വിശേഷിപ്പിച്ചതിനെ ക്രൂസ് പരിഹസിച്ചു. 2025 ഏപ്രിലിൽ നികുതി പ്രഖ്യാപിച്ചതിന് പിന്നാലെ പ്രസിഡന്റിനെ നേരിട്ട് വിളിച്ച് താൻ ആശങ്ക അറിയിച്ചിരുന്നു. എന്നാൽ ആ സംഭാഷണത്തിനിടെ ട്രംപ് പ്രകോപിതനാവുകയും മോശം ഭാഷ ഉപയോഗിച്ച് തന്നെ അധിക്ഷേപിക്കുകയും ചെയ്തുവെന്ന് ക്രൂസ് വെളിപ്പെടുത്തുന്നു. നികുതി വർദ്ധനവ് സാധാരണക്കാരുടെ ജീവിതച്ചെലവ് കൂട്ടുമെന്നും ഇത് 2026-ലെ ഇടക്കാല തെരഞ്ഞെടുപ്പിൽ പാർട്ടിക്ക് കനത്ത തിരിച്ചടിയാകുമെന്നും അദ്ദേഹം ഓർമ്മിപ്പിച്ചു.

വാൻസും ടക്കർ കാൾസണും തമ്മിലുള്ള ബന്ധം വൈസ് പ്രസിഡന്റ് ജെ.ഡി. വാൻസിനെതിരെയും കടുത്ത വ്യക്തിപരമായ വിമർശനമാണ് ക്രൂസ് ഉയർത്തുന്നത്. പ്രമുഖ അവതാരകനായ ടക്കർ കാൾസന്റെ 'സൃഷ്ടി'യാണ് വാൻസ് എന്ന് അദ്ദേഹം ആരോപിക്കുന്നു. കാൾസന്റെ പിന്തിരിപ്പൻ വിദേശനയങ്ങളും ജൂതവിരുദ്ധ നിലപാടുകളും വാൻസിലൂടെ ഭരണകൂടത്തിൽ നടപ്പിലാക്കാൻ ശ്രമിക്കുകയാണെന്നും ക്രൂസ് കുറ്റപ്പെടുത്തി. പരസ്യമായി വാൻസിനെ വിമർശിക്കാൻ മടിച്ചിരുന്ന ക്രൂസിന്റെ രഹസ്യ നിലപാടുകൾ പുറത്തായത് ഭരണകക്ഷിയിൽ വലിയ പ്രത്യാഘാതങ്ങൾ ഉണ്ടാക്കിയേക്കും.