രാഹുൽ മാങ്കൂട്ടത്തിലിനെ അയോഗ്യനക്കാൻ ഉള്ള നീക്കവുമായി ഏൽ ഡി എഫ്

 തിരുവനന്തപുരം: ലൈംഗികാതിക്രമ പരാതികൾ നേരിടുന്ന രാഹുൽ മാങ്കൂട്ടത്തിലിനെ എംഎൽഎ സ്ഥാനത്ത് നിന്ന് അയോഗ്യനാക്കാനുള്ള നടപടികൾ ആരംഭിക്കാനുള്ള ആലോചനകളിലേക്ക് ഇടതുപക്ഷ ജനാധിപത്യ മുന്നണി (എൽഡിഎഫ്) കടക്കുന്നു.

നിയമോപദേശം സ്വീകരിച്ച ശേഷമായിരിക്കും ഇതുസംബന്ധിച്ച അന്തിമതീരുമാനം കൈക്കൊള്ളുക.

ഇത്തരത്തിലുള്ള പരാതികൾ സാധാരണയായി നിയമസഭയുടെ എത്തിക്സ് കമ്മിറ്റിയുടെ പരിഗണനയ്‌ക്ക് വരികയാണ്. കമ്മിറ്റിക്ക് നേരിട്ട് ഒരു അംഗത്തെ അയോഗ്യനാക്കാനുള്ള അധികാരം ഇല്ലെങ്കിലും, നിയമസഭയ്ക്ക് മുന്നിൽ ശുപാർശ സമർപ്പിക്കാൻ കഴിയും. ശുപാർശ നൽകുന്നതിന് മുമ്പ് ആരോപണവിധേയനായ അംഗത്തിന് വിശദീകരണം നൽകാനുള്ള അവസരം നൽകേണ്ടതും നിർബന്ധമാണ്.

എന്നാൽ നിയമസഭയുടെ കാലാവധി അവസാനിക്കാനിരിക്കെ നടപടിക്രമങ്ങൾ പൂര്‍ത്തിയാക്കാൻ സമയപരിമിതി ഉണ്ടാകുമോയെന്ന ആശങ്കയും ഉയരുന്നുണ്ട്. നടപടി പൂർത്തിയാക്കാനാകാത്ത സാഹചര്യത്തിലുപോലും പ്രക്രിയ ആരംഭിച്ച് മുന്നോട്ടെടുക്കാമെന്ന നിലപാടും ഭരണപക്ഷ നേതാക്കളിൽ ചിലർ പങ്കുവയ്ക്കുന്നു.

ഇത്തരം നീക്കം മുന്നോട്ടുപോയാൽ രാഹുൽ മാങ്കൂട്ടത്തിലിനെ സംരക്ഷിക്കുന്ന നിലപാട് കോൺഗ്രസ് നേതൃത്വം സ്വീകരിക്കില്ലെന്ന സൂചനകളുമുണ്ട്. തുടക്കം മുതൽ തന്നെ രാഹുലിനെതിരേ നടപടിയെടുക്കണമെന്ന് പ്രതിപക്ഷ നേതാവ് വി.ഡി. സതീശൻ, മുതിർന്ന നേതാവ് രമേശ് ചെന്നിത്തല എന്നിവരെ ഉൾപ്പെടെയുള്ള നേതാക്കൾ അഭിപ്രായപ്പെട്ടിരുന്നു. നിലവിൽ പാർട്ടിക്കു പുറത്തായിരിക്കുന്ന വ്യക്തിയെ സംരക്ഷിക്കേണ്ട ബാധ്യത പാർട്ടിക്കില്ലെന്ന നിലപാടാണ് നേതാക്കൾ മുന്നോട്ടുവയ്ക്കുന്നത്.

അതേസമയം, ഭരണപക്ഷത്തും സ്ത്രീ അതിക്രമ പരാതികൾ നേരിടുന്ന എം. മുകേഷിനെ ചൂണ്ടിക്കാട്ടി പ്രതിപക്ഷം സമാന നടപടികൾ ആവശ്യപ്പെടാനിടയുണ്ടെന്നും രാഷ്ട്രീയ വൃത്തങ്ങൾ വിലയിരുത്തുന്നു. വ്യക്തികൾ തമ്മിലുള്ള ഒരു ക്രിമിനൽ കേസിൽ നിയമസഭ വിധിന്യായ സ്വഭാവത്തിൽ ഇടപെടുന്നത് ശരിയാണോയെന്ന ചോദ്യവും ഇതോടൊപ്പം ഉയരുന്നു. കുറ്റക്കാരനാണോ അല്ലയോ എന്നത് തീരുമാനിക്കേണ്ടത് കോടതി സംവിധാനമാണെന്നിരിക്കെ, കോടതി വിധിക്ക് മുൻപ് തന്നെ അംഗത്തെ അയോഗ്യനാക്കാനുള്ള നടപടിയിലേക്ക് നിയമസഭ പോകണോയെന്നതാണ് മുഖ്യമായ നിയമ-നൈതിക സംശയം.

ഇതിനോട് സാമ്യമുള്ളതായി പാർലമെന്റിൽ “ചോദ്യം ചോദിക്കുന്നതിന് പണം കൈപ്പറ്റി” എന്ന കേസിൽ എംപിമാരെ പുറത്താക്കിയ സംഭവത്തെ ഉദാഹരണമായി ചിലർ ചൂണ്ടിക്കാട്ടുന്നു. എന്നാൽ ആ സംഭവം പാർലമെന്റിന്റെ പ്രവർത്തനവുമായി നേരിട്ട് ബന്ധപ്പെട്ടു നിന്നതാണെന്നതിനാൽ, നിലവിലെ വിഷയത്തിൽ അതിനെ അതേ രീതിയിൽ പ്രയോഗിക്കാനാകുമോയെന്നതിൽ ഭരണപക്ഷത്തിനുള്ളിലും സംശയം നിലനിൽക്കുന്നു. പുതിയ ഒരു കീഴ്വഴക്കം രൂപപ്പെടുന്നതിലേക്ക് നിയമസഭ നീങ്ങണമോയെന്ന ചോദ്യമാണ് ഇനി ഉയരുന്ന പ്രധാന ചർച്ച.