എൻ.എസ്.എസ് - എസ്.എൻ.ഡി.പി 'മഹാസഖ്യം' തകർന്നു; 'സമദൂര' നിലപാടിൽ ഉറച്ച് പെരുന്ന

 പെരുന്ന: സമുദായ സംഘടനകൾക്കിടയിൽ വലിയ കൊട്ടിഘോഷങ്ങളോടെ ആരംഭിച്ച എൻ.എസ്.എസ് - എസ്.എൻ.ഡി.പി ഐക്യശ്രമം ഒടുവിൽ ഫലം കാണാതെ അവസാനിച്ചു.

എസ്.എൻ.ഡി.പിയുമായി കൈകോർക്കാനില്ലെന്നും ഐക്യം പ്രായോഗികമല്ലെന്നും എൻ.എസ്.എസ് ജനറൽ സെക്രട്ടറി ജി. സുകുമാരൻ നായർ പ്രഖ്യാപിച്ചു. പെരുന്നയിൽ ചേർന്ന എൻ.എസ്.എസ് ഡയറക്ടർ ബോർഡ് യോഗത്തിലാണ് ഈ രാഷ്ട്രീയ പ്രാധാന്യമുള്ള തീരുമാനമെടുത്തത്. സുകുമാരൻ നായർ അവതരിപ്പിച്ച പ്രമേയം യോഗം ഐക്യകണ്ഠേന അംഗീകരിക്കുകയായിരുന്നു.

ബി.ജെ.പി അജണ്ടയെന്ന് സംശയം ഐക്യനീക്കത്തിന് പിന്നിൽ ബി.ജെ.പിയുടെ രാഷ്ട്രീയ അജണ്ടയുണ്ടെന്ന തിരിച്ചറിവാണ് എൻ.എസ്.എസിനെ പിന്മാറാൻ പ്രേരിപ്പിച്ചത്. മുൻ ഗോവ ഗവർണർ പി.എസ്. ശ്രീധരൻ പിള്ളയുടെ പെരുന്ന സന്ദർശനത്തോടെയാണ് സുകുമാരൻ നായർ തന്റെ നിലപാടിൽ മാറ്റം വരുത്തിയത്. ഐക്യ ചർച്ചകൾക്കായി ബി.ഡി.ജെ.എസ് അധ്യക്ഷൻ തുഷാർ വെള്ളാപ്പള്ളിയെ നിയോഗിച്ചത് എൻ.എസ്.എസിനെ എൻ.ഡി.എ പാളയത്തിൽ എത്തിക്കാനുള്ള തന്ത്രമാണെന്ന് പെരുന്ന നേതൃത്വം വിലയിരുത്തി. പത്മ പുരസ്‌കാരങ്ങളിലൂടെ സമുദായ നേതാക്കളെ സ്വാധീനിക്കാനുള്ള കേന്ദ്ര നീക്കത്തിലും എൻ.എസ്.എസ് ജാഗ്രത പ്രകടിപ്പിച്ചു.

രാഷ്ട്രീയ സ്വതന്ത്രതയും സമദൂരവും എസ്.എൻ.ഡി.പിയുമായി ചേരുന്നതിലൂടെ അവർ സ്വീകരിക്കുന്ന രാഷ്ട്രീയ നിലപാടുകൾ എൻ.എസ്.എസിന് കൂടി ബാധകമാകുമെന്ന ഭയം ഡയറക്ടർ ബോർഡിൽ ഉയർന്നു. ബി.ഡി.ജെ.എസ് നിലവിൽ ബി.ജെ.പിക്കൊപ്പമായതിനാൽ, സഖ്യത്തിൽ ചേരുന്നത് സമുദായത്തിന്റെ സ്വതന്ത്രമായ 'സമദൂര' നിലപാടിന് കോട്ടം വരുത്തുമെന്ന് സുകുമാരൻ നായർ ചൂണ്ടിക്കാട്ടി. ഏതെങ്കിലും രാഷ്ട്രീയ മുന്നണിയുടെ വാലാകുന്നത് സമുദായത്തിന്റെ അന്തസ്സിന് ചേർന്നതല്ലെന്ന നിലപാടിൽ പെരുന്ന ഉറച്ചുനിന്നു.

മുന്നണികൾക്ക് ആശ്വാസം നിയമസഭാ തിരഞ്ഞെടുപ്പ് അടുത്തിരിക്കെ, ഈ സഖ്യം തകർന്നത് യു.ഡി.എഫിന്, പ്രത്യേകിച്ച് കോൺഗ്രസിന് വലിയ ആശ്വാസമാണ് നൽകുന്നത്. സമുദായ സംഘടനകൾ ഒന്നിക്കുന്നത് ഭരണപക്ഷത്തിന് അനുകൂലമാകുമെന്ന ആശങ്കയിലായിരുന്നു പ്രതിപക്ഷം. ഐക്യം പ്രായോഗികമല്ലെങ്കിലും എസ്.എൻ.ഡി.പി ഉൾപ്പെടെയുള്ള എല്ലാ സമുദായങ്ങളോടും സൗഹാർദപരമായ നിലപാട് തുടരുമെന്ന് എൻ.എസ്.എസ് വ്യക്തമാക്കിയിട്ടുണ്ട്. ഈ 'യു-ടേൺ' കേരളത്തിലെ വോട്ടുബാങ്ക് സമവാക്യങ്ങളിൽ വലിയ മാറ്റങ്ങൾ വരുത്തുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.