തിരുനാവായ കുംഭമേള: ഭാരതപ്പുഴയിലെ താൽക്കാലിക പാലം നിർമ്മാണം റവന്യൂ വകുപ്പ് തടഞ്ഞു

 തിരുനാവായ: ദക്ഷിണേന്ത്യയിലെ കുംഭമേള എന്നറിയപ്പെടുന്ന തിരുനാവായ മഹാമാഘ മഹോത്സവം തുടങ്ങാൻ ദിവസങ്ങൾ മാത്രം ശേഷിക്കേ, ഉത്സവ സന്നാഹങ്ങൾക്ക് തിരിച്ചടിയായി റവന്യൂ വകുപ്പിന്റെ ഇടപെടൽ.

ഭാരതപ്പുഴയിൽ മണൽ നീക്കി താൽക്കാലിക പാലം നിർമ്മിക്കുന്നത് റവന്യൂ അധികൃതർ തടഞ്ഞു. പുഴ കയ്യേറിയുള്ള നിർമ്മാണവും മണ്ണുമാന്തിയന്ത്രം ഉപയോഗിച്ച് മണൽ നിരപ്പാക്കിയതും നദീതീര സംരക്ഷണ നിയമത്തിന്റെ ലംഘനമാണെന്ന് ചൂണ്ടിക്കാട്ടിയാണ് തിരുനാവായ വില്ലേജ് ഓഫീസർ സ്റ്റോപ്പ് മെമ്മോ നൽകിയത്.

ഗവർണർ ഉദ്ഘാടനം ചെയ്യാനിരിക്കെ പ്രതിസന്ധി

ജനുവരി 18 മുതൽ ഫെബ്രുവരി മൂന്ന് വരെയാണ് കുംഭമേള നടക്കുന്നത്. 19-ന് ഗവർണർ രാജേന്ദ്ര വിശ്വനാഥ് ആർലേക്കറാണ് മഹോത്സവത്തിന്റെ ഉദ്ഘാടനം നിർവ്വഹിക്കേണ്ടത്. ഉത്സവത്തിന്റെ ഭാഗമായുള്ള പ്രധാന പൂജകൾ നടക്കുന്നത് പുഴയുടെ മധ്യഭാഗത്തുള്ള മണൽപ്പരപ്പിലാണ്. ഇവിടേക്ക് ഭക്തർക്ക് പ്രവേശിക്കുന്നതിനായാണ് കഴിഞ്ഞ ഒരാഴ്ചയായി താൽക്കാലിക പാലത്തിന്റെ നിർമ്മാണം നടന്നു വന്നിരുന്നത്. മൂന്ന് ദിവസം മുൻപ് സ്റ്റോപ്പ് മെമ്മോ നൽകിയിരുന്നെങ്കിലും ചൊവ്വാഴ്ച വീണ്ടും നിർമ്മാണം തുടങ്ങിയതോടെ പോലീസും റവന്യൂ ഉദ്യോഗസ്ഥരും എത്തി പണി തടയുകയായിരുന്നു.

അനുമതി തേടിയിരുന്നെന്ന് സംഘാടകർ

പാലം നിർമ്മാണത്തിന് അനുമതി തേടി നവംബർ 14-ന് തന്നെ ജില്ലാ കളക്ടർക്ക് അപേക്ഷ നൽകിയിരുന്നതായി സംഘാടക സമിതി വ്യക്തമാക്കി. അപേക്ഷയിൽ മറുപടി ലഭിക്കാത്ത സാഹചര്യത്തിലാണ് നിർമ്മാണവുമായി മുന്നോട്ട് പോയത്. മുൻവർഷങ്ങളിൽ സർവോദയ മേളയുടെ ഭാഗമായി സമാനമായ രീതിയിൽ പാലം നിർമ്മിക്കാറുണ്ടെന്നും ഇത്തവണത്തെ നടപടിക്ക് പിന്നിലെ കാരണം വ്യക്തമല്ലെന്നും സംഘാടകർ ആരോപിച്ചു. സംഘാടക സമിതി കൺവീനർ വിനയകുമാറിനാണ് വില്ലേജ് ഓഫീസർ നോട്ടീസ് നൽകിയത്.

കുംഭമേള നടക്കും

റവന്യൂ വകുപ്പിന്റെ നടപടിയിൽ പ്രതിഷേധം നിലനിൽക്കുന്നുണ്ടെങ്കിലും നിശ്ചയിച്ച പ്രകാരം തന്നെ കുംഭമേള നടത്തുമെന്ന് മുഖ്യസംഘാടകൻ സ്വാമി ആനന്ദവനം ഭാരതി തൃശ്ശൂരിൽ അറിയിച്ചു. പാലം നിർമ്മാണവുമായി ബന്ധപ്പെട്ട നിയമതടസ്സങ്ങൾ നീക്കാൻ ഉന്നതതല ഇടപെടൽ ഉണ്ടാകുമെന്ന പ്രതീക്ഷയിലാണ് സംഘാടക സമിതി.