'ചാല മുതൽ മാറാട് വരെ'; ലീഗ് ഭരണകാലത്തെ കലാപങ്ങൾ എണ്ണിപ്പറഞ്ഞ് കെ.ടി ജലീൽ

തിരുവനന്തപുരം: മുസ്ലിം ലീഗ് അധികാരത്തിലിരുന്ന കാലയളവുകളിൽ കേരളം സാക്ഷ്യം വഹിച്ച വർഗീയ കലാപങ്ങളുടെ കണക്കുകൾ നിരത്തി മുൻ മന്ത്രിയും എം.എൽ.എയുമായ കെ.ടി ജലീൽ.

കഴിഞ്ഞ പത്തുവർഷത്തെ എൽ.ഡി.എഫ് ഭരണത്തിൽ സംസ്ഥാനത്ത് ഒരൊറ്റ വർഗീയ കലാപം പോലും ഉണ്ടായിട്ടില്ലെന്ന് ചൂണ്ടിക്കാട്ടിയ അദ്ദേഹം, യു.ഡി.എഫ് ഭരണകാലത്തെ ക്രമസമാധാന നിലയെ രൂക്ഷമായി വിമർശിച്ചു. മുസ്ലിം സമുദായത്തിന് നഷ്ടപ്പെട്ടത് തിരിച്ചുപിടിക്കാൻ ലീഗ് അധികരത്തിൽ വരണമെന്ന കെ.എം ഷാജിയുടെ പ്രസ്താവനയ്ക്ക് മറുപടിയായാണ് ജലീലിന്റെ

ഫേസ്ബുക്ക് കുറിപ്പ്.

പ്രധാന വിമർശനങ്ങൾ:

 കലാപങ്ങളുടെ ചരിത്രം: പതിനൊന്ന് പേരുടെ ജീവൻ നഷ്ടപ്പെട്ട ഒന്നും രണ്ടും മാറാട് കലാപങ്ങൾ നടന്നത് ലീഗ് ഭരണപങ്കാളിത്തം വഹിച്ചപ്പോഴാണെന്ന് ജലീൽ ഓർമ്മിപ്പിച്ചു. ചാല കലാപവും സിറാജുന്നിസ എന്ന ഒൻപതുവയസ്സുകാരിയുടെ ജീവനെടുത്ത പാലക്കാട് വെടിവെപ്പും നടന്നത് യു.ഡി.എഫ് ഭരണത്തിലായിരുന്നു.

  സമുദായത്തിന്റെ 'നഷ്ടം': കഴിഞ്ഞ പത്തുവർഷത്തിനിടെ മുസ്ലിം സമുദായത്തിന് എന്ത് നഷ്ടമാണുണ്ടായതെന്ന് അദ്ദേഹം ചോദിച്ചു. ക്ഷേമ പെൻഷൻ, പ്ലസ് വൺ പ്രവേശനം തുടങ്ങി സർക്കാർ നടപ്പിലാക്കിയ എല്ലാ വികസന പദ്ധതികളും സമുദായത്തിന് കൂടി അവകാശപ്പെട്ടതാണെന്ന് അദ്ദേഹം ചൂണ്ടിക്കാട്ടി.

 നേതാക്കളുടെ താൽപ്പര്യം: സമുദായത്തിന് നഷ്ടമുണ്ടായി എന്ന വാദം ലീഗിലെ ഏതാനും പ്രമാണിമാർക്ക് മന്ത്രിമാരാകാൻ കഴിയാത്തതിലുള്ള നിരാശയിൽ നിന്നുള്ളതാണ്. സാധാരണക്കാരെ പരിഗണിക്കാതെ പണവും തറവാടും നോക്കിയാണ് ലീഗ് പദവികൾ വീതം വെക്കുന്നതെന്നും ജലീൽ കുറ്റപ്പെടുത്തി.

 കഴിഞ്ഞ പത്തു വർഷത്തിനിടയിൽ ഒരു വർഗീയ കലാപം പോലും ഉണ്ടാകാതെ നോക്കിയതാണോ എൽ.ഡി.എഫ് സർക്കാർ മുസ്ലിങ്ങളോട് ചെയ്ത മഹാപരാധം?" - കെ.ടി ജലീൽ

ജാഗ്രതാ നിർദ്ദേശം

ആൾക്കൂട്ടങ്ങളെ കാണുമ്പോൾ സമുദായ വികാരം ആളിക്കത്തിക്കാൻ ശ്രമിക്കരുതെന്ന് ലീഗ് നേതാക്കൾക്ക് ജലീൽ മുന്നറിയിപ്പ് നൽകി. ഇത്തരം പ്രസ്താവനകൾ സമുദായത്തെ പൊതുസമൂഹത്തിൽ ഒറ്റപ്പെടുത്താൻ മാത്രമേ ഉപകരിക്കൂ. കഴിഞ്ഞ പത്തുവർഷത്തിനിടെ മറ്റ് വിഭാഗങ്ങൾക്ക് ലഭിച്ച ഒരു അവകാശവും മുസ്ലിം സമുദായത്തിന് നിഷേധിക്കപ്പെട്ടിട്ടില്ലെന്നും, വിദ്യാലയങ്ങളുടെ നവീകരണമടക്കമുള്ള നേട്ടങ്ങൾ എല്ലാവർക്കും തുല്യമായാണ് ലഭിച്ചതെന്നും അദ്ദേഹം കൂട്ടിച്ചേർത്തു.