ആക്ഷേപ മുദ്രാവാക്യം ;ജെ.എൻ.യു വിദ്യാർത്ഥികൾക്കെതിരെ കേസെടുത്തു

ന്യൂഡൽഹി: ജവഹർലാൽ നെഹ്‌റു സർവകലാശാല (ജെ.എൻ.യു) ക്യാമ്പസിനുള്ളിൽ രാജ്യവിരുദ്ധവും പ്രകോപനപരവുമായ മുദ്രാവാക്യങ്ങൾ മുഴക്കിയ വിദ്യാർത്ഥികൾക്കെതിരെ കർശന നടപടിയുമായി സർവകലാശാല അധികൃതർ.

സബർമതി ഹോസ്റ്റലിന് മുന്നിൽ നടന്ന പ്രതിഷേധ പരിപാടിക്കിടെ സുപ്രീം കോടതിയേയും സർക്കാരിനെയും അധിക്ഷേപിക്കുന്ന തരത്തിൽ മുദ്രാവാക്യം വിളിച്ച സംഭവത്തിൽ എഫ്.ഐ.ആർ രജിസ്റ്റർ ചെയ്യാൻ ആവശ്യപ്പെട്ട് സർവകലാശാല ചീഫ് സെക്യൂരിറ്റി ഓഫീസർ വസന്ത് കുഞ്ച് നോർത്ത് പോലീസിന് പരാതി നൽകി.

സംഭവത്തെക്കുറിച്ച് പരാതിയിൽ പറയുന്നത്: 2026 ജനുവരി 5-ന് രാത്രി 10 മണിയോടെയാണ് സംഭവം. 2020 ജനുവരി 5-ലെ ക്യാമ്പസ് അക്രമത്തിന്റെ ആറാം വാർഷികത്തോടനുബന്ധിച്ച് 'ഗറില്ല ധാബ'യുടെ നേതൃത്വത്തിൽ നടന്ന പ്രതിഷേധത്തിനിടെയാണ് വിവാദ സംഭവങ്ങൾ അരങ്ങേറിയത്.

പരിപാടിയുടെ തുടക്കത്തിൽ സമാധാനപരമായിരുന്ന അന്തരീക്ഷം, ഉമർ ഖാലിദ്, ഷർജീൽ ഇമാം എന്നിവരുടെ ജാമ്യാപേക്ഷ സുപ്രീം കോടതി തള്ളിയ വാർത്ത വന്നതോടെ മാറുകയായിരുന്നു.

JNU identifies students allegedly involved in raising inflammatory, provocative and objectionable slogans against the PM & HM- said to be in contempt of the Supreme Court.

Names identified:
Aditi Mishra, Gopal Babu, Sunil Yadav, Kanishk, Shubham, Pakeezah Khan, Danish Ali, Saad… pic.twitter.com/1bdjPwyNjZ

— The Alternate Media (@AlternateMediaX) January 7, 2026

തുടർന്ന് ഒരു വിഭാഗം വിദ്യാർത്ഥികൾ സുപ്രീം കോടതിയേയും ഭരണഘടനാ സ്ഥാപനങ്ങളെയും അധിക്ഷേപിക്കുന്ന തരത്തിൽ അതീവ ഗുരുതരമായ മുദ്രാവാക്യങ്ങൾ മുഴക്കിയെന്ന് പരാതിയിൽ വ്യക്തമാക്കുന്നു. ഇത് കോടതി ലക്ഷ്യമാണെന്നും സർവകലാശാലയുടെ സമാധാന അന്തരീക്ഷത്തെ തകർക്കുന്നതാണെന്നും അധികൃതർ ചൂണ്ടിക്കാട്ടി.

പ്രതിസ്ഥാനത്ത് യൂണിയൻ ഭാരവാഹികൾ: ജെ.എൻ.യു വിദ്യാർത്ഥി യൂണിയൻ (JNUSU) ഭാരവാഹികളായ അതിഥി മിശ്ര, ഗോപിക ബാബു, സുനിൽ യാദവ്, ഡാനിഷ് അലി എന്നിവരുൾപ്പെടെയുള്ള പത്തോളം വിദ്യാർത്ഥികളെ പരാതിയിൽ പേരെടുത്ത് പരാമർശിച്ചിട്ടുണ്ട്. സെക്യൂരിറ്റി ഉദ്യോഗസ്ഥരുടെ സാന്നിധ്യത്തിൽ നടന്ന ഈ മുദ്രാവാക്യം വിളി ബോധപൂർവ്വമാണെന്നും പെട്ടെന്നുണ്ടായ പ്രകോപനമല്ലെന്നും സെക്യൂരിറ്റി വിഭാഗം റിപ്പോർട്ട് നൽകിയിട്ടുണ്ട്.

ഭാരതീയ ന്യായ സംഹിതയിലെ (BNS) വിവിധ വകുപ്പുകൾ പ്രകാരം കുറ്റക്കാർക്കെതിരെ കേസെടുക്കണമെന്നാണ് സർവകലാശാലയുടെ ആവശ്യം. സംഭവത്തിൽ പോലീസ് പ്രാഥമിക അന്വേഷണം ആരംഭിച്ചു. രാജ്യത്തിന്റെ സുരക്ഷയെയും ക്യാമ്പസിലെ അക്കാദമിക് അന്തരീക്ഷത്തെയും ബാധിക്കുന്ന ഇത്തരം പ്രവർത്തനങ്ങൾക്കെതിരെ വിട്ടുവീഴ്ചയില്ലാത്ത നടപടി സ്വീകരിക്കുമെന്നും സർവകലാശാല ഭരണകൂടം അറിയിച്ചു.