ഹിമാചലിൽ വീടിന് തീപിടിച്ച് സിലിണ്ടർ പൊട്ടിത്തെറിച്ചു; ഒരു കുടുംബത്തിലെ ആറുപേർ വെന്തുമരിച്ചു

 ന്യൂഡൽഹി: ഹിമാചൽ പ്രദേശിലെ സിർമൗർ ജില്ലയിൽ സിലിണ്ടർ പൊട്ടിത്തെറിച്ചുണ്ടായ വൻ തീപിടുത്തത്തിൽ ഒരേ കുടുംബത്തിലെ ആറുപേർക്ക് ദാരുണാന്ത്യം.

ശ്രീ രേണുകാജി നിയമസഭാ മണ്ഡലത്തിലെ ധണ്ഡരി പഞ്ചായത്തിൽ വ്യാഴാഴ്ച പുലർച്ചെ മൂന്ന് മണിയോടെയായിരുന്നു സംഭവം. ഉറങ്ങിക്കിടന്ന കുടുംബത്തിന് രക്ഷപ്പെടാൻ സമയം ലഭിക്കുന്നതിന് മുൻപേ തീ വീടിനെ പൂർണ്ണമായും വിഴുങ്ങുകയായിരുന്നു.

നിമിഷങ്ങൾക്കുള്ളിൽ ചാരമായി ഒരു കുടുംബം

ലോകേന്ദ്ര സിങ് എന്നയാളുടെ കുടുംബമാണ് അപകടത്തിൽപ്പെട്ടത്. ലോകേന്ദ്ര സിങ്ങിന്റെ ഭാര്യ കവിതാ ദേവി, മക്കളായ സരിക (9), കൃതിക (3), ബന്ധുക്കളായ തൃപ്ത ദേവി (44), നരേഷ് കുമാർ എന്നിവരടക്കം ആറുപേരാണ് സംഭവസ്ഥലത്ത് തന്നെ മരിച്ചത്. വീടിനുള്ളിലുണ്ടായിരുന്ന വളർത്തുമൃഗങ്ങളും ജീവനോടെ കത്തിനശിച്ചു. ഗുരുതരമായി പരിക്കേറ്റ ഒരാളെ രക്ഷപ്പെടുത്തി ആശുപത്രിയിൽ പ്രവേശിപ്പിച്ചു. ഇയാളുടെ നില അതീവ ഗുരുതരമായി തുടരുകയാണ്.

ഷോർട്ട് സർക്യൂട്ട് എന്ന് പ്രാഥമിക നിഗമനം

വീട്ടിലുണ്ടായ ഷോർട്ട് സർക്യൂട്ടാണ് അപകടത്തിന് കാരണമായതെന്നാണ് പോലീസിന്റെ പ്രാഥമിക നിഗമനം. ഷോർട്ട് സർക്യൂട്ടിനെത്തുടർന്ന് പടർന്ന തീ എൽപിജി സിലിണ്ടറിലേക്ക് പടരുകയും വൻ സ്ഫോടനത്തോടെ വീട് തകരുകയുമായിരുന്നു. സ്ഫോടനത്തിന്റെ ആഘാതത്തിൽ തീ അതിവേഗം പടർന്നതിനാൽ ആർക്കും പുറത്തിറങ്ങാൻ കഴിഞ്ഞില്ല. അഗ്നിശമന സേനയും പോലീസും സ്ഥലത്തെത്തുമ്പോഴേക്കും വീട് പൂർണ്ണമായും കത്തിനശിച്ചിരുന്നു.

അനുശോചനം രേഖപ്പെടുത്തി രാഷ്ട്രീയ നേതാക്കൾ

ഹൃദയഭേദകമായ ഈ സംഭവത്തിൽ ബിജെപി ദേശീയ പ്രസിഡന്റ് ജെ.പി. നദ്ദ, ഹിമാചൽ പ്രതിപക്ഷ നേതാവ് ജയ് റാം താക്കൂർ, അനുരാഗ് താക്കൂർ എന്നിവർ അഗാധമായ ദുഃഖം രേഖപ്പെടുത്തി. ഇതൊരു നാടിനെ മുഴുവൻ നടുക്കിയ ദുരന്തമാണെന്ന് ബിജെപി സംസ്ഥാന പ്രസിഡന്റ് ഡോ. രാജീവ് ബിൻഡാൽ പ്രതികരിച്ചു. ദുരന്തബാധിത കുടുംബത്തിന് അടിയന്തര ധനസഹായവും പുനരധിവാസത്തിനുള്ള സൗകര്യങ്ങളും ഒരുക്കണമെന്ന് രാഷ്ട്രീയ നേതാക്കൾ ജില്ലാ ഭരണകൂടത്തോട് ആവശ്യപ്പെട്ടു.