'ഡിജിറ്റൽ അറസ്റ്റ്' നാടകം പൊളിഞ്ഞു; തട്ടിപ്പുകാരെ പൂട്ടാൻ സൈബർ പോലീസിനൊപ്പം മുൻ ബാങ്ക് മാനേജരും

 തോട്ടട (കണ്ണൂർ): ഡേറ്റാ പ്രൊട്ടക്‌ഷൻ ബോർഡ് ഓഫ് ഇന്ത്യയിലെ ഉദ്യോഗസ്ഥനെന്ന വ്യാജേന മുൻ ബാങ്ക് മാനേജരെ 'ഡിജിറ്റൽ അറസ്റ്റ്' ചെയ്ത് പണം തട്ടാനുള്ള വൻ നീക്കം സൈബർ പോലീസിന്റെയും വീട്ടുടമയുടെയും ജാഗ്രതയിൽ പരാജയപ്പെട്ടു.

ബാങ്ക് ഓഫ് ഇന്ത്യ മുൻ സീനിയർ മാനേജർ തോട്ടട സ്വദേശി പ്രമോദ് മഠത്തിലിനെ ലക്ഷ്യമിട്ടായിരുന്നു തട്ടിപ്പ് സംഘം വലവിരിച്ചത്.

തട്ടിപ്പിന്റെ രീതി

ഞായറാഴ്ചയാണ് പ്രമോദിനെ തേടി ആദ്യ ഫോൺകോൾ എത്തുന്നത്. മുംബൈയിലെ കാനറ ബാങ്കിൽ പ്രമോദിന്റെ പേരിൽ അനധികൃതമായി അക്കൗണ്ടും സിം കാർഡും ഉണ്ടെന്നും, നിരോധിക്കപ്പെട്ട സംഘടനയായ പോപ്പുലർ ഫ്രണ്ട് ഓഫ് ഇന്ത്യയുമായി ബന്ധപ്പെട്ട എൻഐഎ കേസിൽ ഇയാളുടെ ക്രെഡിറ്റ് കാർഡ് ഉൾപ്പെട്ടിട്ടുണ്ടെന്നുമായിരുന്നു ഭീഷണി. തട്ടിപ്പ് ഉറപ്പിക്കാനായി വ്യാജ എഫ്ഐആർ കോപ്പി, ആധാർ വിവരങ്ങൾ എന്നിവയും ഇവർ വാട്സാപ്പ് വഴി അയച്ചുനൽകി.

'ഡിജിറ്റൽ അറസ്റ്റ് നാടകം' പൊളിച്ച് Kannur Cyber ​​Police#cyberpolice #digitalart #digitalarrestscam #kannur pic.twitter.com/HTYZhwOsCm

— DD News Malayalam (@DDNewsMalayalam) January 12, 2026

പോലീസുമായി ചേർന്ന് കെണിയൊരുക്കി

തട്ടിപ്പാണെന്ന് തിരിച്ചറിഞ്ഞ പ്രമോദും ഭാര്യയും ഉടൻതന്നെ കണ്ണൂർ സിറ്റി സൈബർ പോലീസിനെ വിവരമറിയിച്ചു. തിങ്കളാഴ്ച രാവിലെ 11:30-ന് വീഡിയോ കോളിൽ വരാൻ സംഘം ആവശ്യപ്പെട്ടതനുസരിച്ച് സൈബർ പോലീസ് സംഘം പ്രമോദിന്റെ വീട്ടിലെത്തി ഒളിഞ്ഞിരുന്നു.

സംശയമൊന്നും നൽകാതെ പ്രമോദ് വീഡിയോ കോൾ അറ്റൻഡ് ചെയ്തു. മറുഭാഗത്ത് പോലീസ് യൂണിഫോം ധരിച്ച മലയാളി ഉദ്യോഗസ്ഥനെന്ന വ്യാജേന ഒരാൾ പ്രത്യക്ഷപ്പെട്ടു. ബയോമെട്രിക് ഇല്ലാതെ തന്നെ ആധാർ വിവരങ്ങൾ ഉപയോഗിച്ച് സിം കാർഡ് എടുക്കാമെന്ന വ്യാജ വിവരങ്ങൾ നൽകി പത്ത് മിനിറ്റോളം ഇയാൾ പ്രമോദുമായി സംസാരിച്ചു.

"പത്രങ്ങളിൽ നിരവധി തട്ടിപ്പ് വാർത്തകൾ വരുന്നുണ്ടല്ലോ സാർ, അതുകൊണ്ടാണ് ഞാൻ സംശയം പ്രകടിപ്പിക്കുന്നത്" എന്ന് പ്രമോദ് പറഞ്ഞപ്പോൾ തട്ടിപ്പുകാരൻ ഉത്തരംമുട്ടി.

കൃത്യസമയത്ത് സൈബർ പോലീസ് ഉദ്യോഗസ്ഥർ ഫോൺ ഏറ്റെടുത്തതോടെ തട്ടിപ്പുകാർ പരിഭ്രാന്തരായി കോൾ കട്ട് ചെയ്യുകയായിരുന്നു.

അന്വേഷണം ഊർജ്ജിതം

സംഭവത്തിൽ സൈബർ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. തട്ടിപ്പാണെന്ന് തോന്നിയ ഉടൻ പോലീസിനെ അറിയിച്ച പ്രമോദിനെയും ഭാര്യയെയും പോലീസ് അഭിനന്ദിച്ചു. സൈബർ പോലീസ് സ്റ്റേഷൻ എസ്ഐ എസ്.വി. മിഥുന്റെ നേതൃത്വത്തിൽ എസ്ഐമാരായ വി. പ്രകാശൻ, എം. ഷമിത്ത്, സി.പി.ഒമാരായ പി.കെ. ദിജിൻ, സുജിത്ത് എന്നിവരടങ്ങിയ സംഘമാണ് റെയ്ഡിന് നേതൃത്വം നൽകിയത്.

പ്രത്യേക ശ്രദ്ധയ്ക്ക്: "നിയമപരമായി 'ഡിജിറ്റൽ അറസ്റ്റ്' എന്നൊരു നടപടിയില്ലെന്നും, ഇത്തരം കോളുകൾ വന്നാൽ ഭയപ്പെടാതെ ഉടൻ പോലീസിനെ അറിയിക്കണമെന്നും" സൈബർ പോലീസ് മുന്നറിയിപ്പ് നൽകി.