കാനഡയിലെ വൻ സ്വർണ്ണക്കവർച്ച: മുഖ്യപ്രതി ചണ്ഡീഗഡിൽ; വിട്ടുകിട്ടാൻ കാനഡയുടെ ഔദ്യോഗിക അപേക്ഷ

 ടൊറന്റോ/ചണ്ഡീഗഡ്: കാനഡയുടെ ചരിത്രത്തിലെ ഏറ്റവും വലിയ സ്വർണ്ണക്കവർച്ചാ കേസിലെ മുഖ്യ സൂത്രധാരനെന്ന് കരുതുന്ന സിമ്രാൻ പ്രീത് പനേസറിനെ വിട്ടുനൽകാൻ കാനഡ ഇന്ത്യയോട് ഔദ്യോഗികമായി ആവശ്യപ്പെട്ടു.

എയർ കാനഡയിലെ മുൻ മാനേജരായിരുന്ന 32-കാരനായ പനേസർ, 20 ദശലക്ഷം ഡോളറിലധികം (ഏകദേശം 160 കോടി രൂപ) മൂല്യമുള്ള സ്വർണ്ണം കവർന്ന കേസിലെ പ്രതിയാണ്.

ചണ്ഡീഗഡിലെ രഹസ്യജീവിതം

കവർച്ചയ്ക്ക് ശേഷം ഇന്ത്യയിലേക്ക് കടന്ന പനേസർ, ചണ്ഡീഗഡിന്റെ പ്രാന്തപ്രദേശങ്ങളിൽ കുടുംബത്തോടൊപ്പം ഒളിവിൽ കഴിയുകയായിരുന്നു. 2025 ഫെബ്രുവരിയിലാണ് ഇയാൾ ഇന്ത്യയിലുണ്ടെന്ന് കനേഡിയൻ അധികൃതർ തിരിച്ചറിഞ്ഞത്. ഇതിനുപിന്നാലെ ഫെബ്രുവരി 21-ന് ഇന്ത്യയുടെ എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) ഇയാളുടെ മൊഹാലിയിലെ വീട്ടിൽ റെയ്ഡ് നടത്തുകയും ചോദ്യം ചെയ്യുകയും ചെയ്തിരുന്നു. ഇയാൾക്കെതിരെ കള്ളപ്പണം വെളുപ്പിക്കൽ നിരോധന നിയമപ്രകാരം (PMLA) ഇ.ഡി കേസ് രജിസ്റ്റർ ചെയ്തിട്ടുണ്ട്.

കവർച്ചയുടെ പശ്ചാത്തലം

2023 ഏപ്രിൽ 17-നാണ് കേസിനാസ്പദമായ സംഭവം നടന്നത്. സ്വിറ്റ്സർലൻഡിലെ സൂറിച്ചിൽ നിന്നും ടൊറന്റോ പിയേഴ്സൺ അന്താരാഷ്ട്ര വിമാനത്താവളത്തിൽ എത്തിയ വിമാനത്തിൽ 400 കിലോഗ്രാം തൂക്കം വരുന്ന 6,600 ശുദ്ധസ്വർണ്ണ ബിസ്ക്കറ്റുകൾ ഉണ്ടായിരുന്നു. വിമാനത്താവളത്തിലെ സുരക്ഷിത കേന്ദ്രത്തിലേക്ക് മാറ്റിയ സ്വർണ്ണം ഏപ്രിൽ 18 പുലർച്ചെയോടെ കാണാതാവുകയായിരുന്നു.

വിമാനത്താവളത്തിലെ കാർഗോ ഹാൻഡ്ലിംഗ് വിഭാഗത്തിൽ ജോലി ചെയ്തിരുന്ന പനേസർക്ക് സ്വർണ്ണം എത്തുന്ന വിവരം മുൻകൂട്ടി അറിയാമായിരുന്നുവെന്നും, അന്വേഷണ ഉദ്യോഗസ്ഥരെ വിമാനത്താവളത്തിൽ തെറ്റായ വഴിയിലൂടെ നയിച്ച് അന്വേഷണം വഴിതിരിച്ചുവിടാൻ ശ്രമിച്ചുവെന്നും കനേഡിയൻ പോലീസ് കണ്ടെത്തിയിട്ടുണ്ട്.

ഹവാല ഇടപാടും സിനിമാ നിർമ്മാണവും

കവർച്ചാ പണം പനേസർ ഹവാല വഴി ഇന്ത്യയിലേക്ക് കടത്തിയതായാണ് ഇ.ഡിയുടെ കണ്ടെത്തൽ. ഏകദേശം 8.5 കോടി രൂപ ഇത്തരത്തിൽ ഇന്ത്യയിലെത്തിയിട്ടുണ്ട്. മുൻ മിസ് ഇന്ത്യ ഉഗാണ്ടയും ഗായികയും നടിയുമായ തന്റെ ഭാര്യ പ്രീതി പനേസർ അഭിനയിക്കുന്ന ചിത്രത്തിന്റെ നിർമ്മാണത്തിനായി സംഗീത വ്യവസായം വഴിയാണ് ഈ പണം വിനിയോഗിച്ചതെന്ന് അന്വേഷണ ഏജൻസികൾ പറയുന്നു.

അന്വേഷണത്തിലെ പുതിയ നീക്കങ്ങൾ

ജനുവരി 12-ന് കേസിലെ മറ്റൊരു പ്രധാന പ്രതിയായ അർസലാൻ ചൗധരിയെ ദുബായിൽ നിന്ന് എത്തിയപ്പോൾ ടൊറന്റോ വിമാനത്താവളത്തിൽ വെച്ച് പോലീസ് അറസ്റ്റ് ചെയ്തിരുന്നു. ഇതോടെയാണ് പനേസറെ വിട്ടുകിട്ടാനുള്ള നടപടികൾ കാനഡ ഊർജ്ജിതമാക്കിയത്. കവർച്ച ചെയ്യപ്പെട്ട സ്വർണ്ണത്തിന്റെ ഭൂരിഭാഗവും ഇന്ത്യയിലേക്കോ ദുബായിലേക്കോ കടത്തിയിരിക്കാമെന്നും അവ ഉരുക്കി മാറ്റിയതിനാൽ ഇനി കണ്ടെടുക്കുക പ്രയാസമാണെന്നും അന്വേഷണ ഉദ്യോഗസ്ഥർ വിലയിരുത്തുന്നു.

നിലവിൽ പനേസർ ഉൾപ്പെടെ രണ്ട് പ്രതികളാണ് കേസിൽ ഇനി പിടിയിലാകാനുള്ളത്. ഇന്ത്യയും കാനഡയും തമ്മിലുള്ള നയതന്ത്ര ബന്ധങ്ങളിൽ ഈ കൈമാറ്റ അപേക്ഷ നിർണ്ണായകമാകും.