വാട്സാപ്പിൽ വമ്പൻ മാറ്റം, സന്ദേശങ്ങൾക്കൊപ്പം പ്രൊഫൈൽ ഐക്കണുമായി പുതിയ ഫീച്ചർ

ചെന്നൈ ;ഗ്രൂപ്പ് ചാറ്റുകളിൽ സന്ദേശങ്ങൾ അയയ്ക്കുന്നത് ആരാണെന്ന് തിരിച്ചറിയാൻ ഇനി പ്രൊഫൈൽ പേജിലേക്ക് പോകേണ്ടതില്ല.

ഉപയോക്താക്കളുടെ ദീർഘകാലത്തെ പരാതി പരിഹരിച്ചുകൊണ്ട് ഗ്രൂപ്പ് ചാറ്റുകളിൽ ഓരോ അംഗത്തിന്റെയും പേരിനൊപ്പം പ്രൊഫൈൽ ഐക്കൺ (ചിത്രം) കൂടി ഉൾപ്പെടുത്താനൊരുങ്ങുകയാണ് വാട്സാപ്പ്. ഇതുസംബന്ധിച്ച പുതിയ ഫീച്ചർ ഉടൻ എല്ലാവരിലേക്കും എത്തും.

ഗ്രൂപ്പ് അംഗങ്ങളുടെ പേരിനൊപ്പം പ്രൊഫൈൽ ചിത്രം കൂടി തെളിയുന്നതോടെ വലിയ ഗ്രൂപ്പുകളിലെ ആശയക്കുഴപ്പം ഒഴിവാക്കാൻ സാധിക്കും. നിലവിൽ സമാനമായ പേരുകളുള്ള ഒന്നിലധികം അംഗങ്ങൾ ഒരു ഗ്രൂപ്പിലുണ്ടെങ്കിൽ സന്ദേശം അയച്ചത് ആരാണെന്ന് തിരിച്ചറിയാൻ ബുദ്ധിമുട്ടായിരുന്നു. പുതിയ മാറ്റം വരുന്നതോടെ ഓരോ മെസേജിനും മീഡിയ ഫയലുകൾക്കും ഒപ്പം അയച്ച ആളുടെ പ്രൊഫൈൽ ഐക്കൺ കൂടി ദൃശ്യമാകും.

വാട്സാപ്പ് മാറ്റങ്ങൾ നിരീക്ഷിക്കുന്ന വാബീറ്റ ഇൻഫോ (WABetaInfo) പുറത്തുവിട്ട റിപ്പോർട്ടുകൾ പ്രകാരം, കോൺടാക്റ്റ് ഇൻഫോ പേജിലും മാറ്റങ്ങൾ വരുന്നുണ്ട്. ഗ്രൂപ്പിൽ സന്ദേശം അയച്ച വ്യക്തിയുടെ പ്രൊഫൈൽ ഐക്കണിൽ ക്ലിക്ക് ചെയ്താൽ ഗ്രൂപ്പിന് പുറത്തുപോകാതെ തന്നെ ആ വ്യക്തിയുമായി സ്വകാര്യമായി ചാറ്റ് ചെയ്യാനോ വോയ്‌സ്/വീഡിയോ കോളുകൾ ആരംഭിക്കാനോ സാധിക്കും.

ആൻഡ്രോയിഡിന്റെ ഏറ്റവും പുതിയ പതിപ്പായ 2.25.37.76-ൽ ഈ ഫീച്ചർ പരീക്ഷണാടിസ്ഥാനത്തിൽ അവതരിപ്പിച്ചിട്ടുണ്ട്. നിലവിൽ തിരഞ്ഞെടുത്ത ബീറ്റാ ഉപയോക്താക്കൾക്ക് മാത്രമാണ് ഈ സൗകര്യം ലഭ്യമാകുന്നത്. വരും ആഴ്ചകളിൽ ആഗോളതലത്തിൽ എല്ലാ ഉപയോക്താക്കൾക്കും ഈ പുതിയ അപ്‌ഡേറ്റ് ലഭ്യമാകുമെന്നാണ് സൂചന.

ഓഫീസ് ഗ്രൂപ്പുകൾക്കും വലിയ കമ്മ്യൂണിറ്റികൾക്കും ഏറെ പ്രയോജനകരമാകുന്ന ഈ ഫീച്ചർ വാട്സാപ്പിന്റെ ഉപയോഗക്ഷമത വർദ്ധിപ്പിക്കുമെന്ന് വിദഗ്ധർ വിലയിരുത്തുന്നു. വ്യക്തിഗത വിവരങ്ങൾ ഒറ്റനോട്ടത്തിൽ ലഭ്യമാകുന്നത് ഉപയോക്താക്കൾക്ക് സമയം ലാഭിക്കാനും ആശയവിനിമയം സുഗമമാക്കാനും സഹായിക്കും.