പത്തനംതിട്ട കലക്ടറേറ്റിൽ ബോംബ് ഭീഷണിയെ തുടർന്ന് ഡോഗ് സ്ക്വാഡ് പരിശോധനയ്ക്കെത്തിയപ്പോൾ

പത്തനംതിട്ട; കൊല്ലം, പത്തനംതിട്ട കലക്ടറേറ്റുകളിൽ ബോംബ് ഭീഷണി.

ഇന്ന് ഉച്ചയോടെയാണ് രണ്ടു കലക്ടറേറ്റുകളിലും ഇമെയിൽ വഴി ഭീഷണിയെത്തിയത്. തുടർന്ന് ജീവനക്കാരെ മുഴുവൻ പുറത്തിറക്കി ബോംബ് സ്ക്വാഡ് പരിശോധന നടത്തിയെങ്കിലും സംശയകരമായി ഒന്നും കണ്ടെത്തിയില്ല.

ക്രിസ്മസ് അവധിയുടെ തൊട്ടടുത്ത ദിവസമായതിനാൽ ഓഫിസുകളിൽ ഹാജർ കുറവായിരുന്നു. ഭീഷണി ലഭിച്ചയുടൻ ബോംബ് സ്ക്വാഡ് ഉൾപ്പെടെ സ്ഥലത്തെത്തുകയും മുഴുവൻ ജീവനക്കാരെയും പുറത്തിറക്കുകയും ചെയ്തു.

ഡോഗ് സ്ക്വാഡും സ്ഥലത്തെത്തി. മുൻപും ഇരു കലക്ടറേറ്റുകളിലും വ്യാജ ഭീഷണി ലഭിച്ചിട്ടുണ്ട്. സംഭവത്തിൽ പൊലീസ് അന്വേഷണം തുടങ്ങി.