കാർത്തിക ദീപം തെളിയിക്കുന്നതിനെ ച്ചൊല്ലി ഹിന്ദു സംഘടനകളും പോലീസുമായി ഏറ്റുമുട്ടി

 മധുര (തമിഴ്‌നാട്): പ്രസിദ്ധമായ തിരുപ്പരൻകുണ്ഡ്രം കുന്നിൽ കാർത്തിക ദീപം കത്തിക്കുന്നതുമായി ബന്ധപ്പെട്ട് ഹിന്ദു സംഘടനാംഗങ്ങളും പോലീസും തമ്മിൽ ഏറ്റുമുട്ടിയതിനെ തുടർന്ന് പ്രദേശത്ത് സംഘർഷാവസ്ഥ. ദർഗക്ക് സമീപമുള്ള പുരാതനമായ 'ദീപത്തൂൺ' തൂണിന് അടുത്ത് ദീപം കത്തിക്കുന്നതിനു പകരം പതിവുസ്ഥലത്ത് കത്തിച്ചതിനെ ചൊല്ലിയാണ് പ്രതിഷേധക്കാർ രംഗത്തെത്തിയത്. പ്രതിഷേധക്കാർ കുന്നിൻ മുകളിലേക്ക് എത്തുന്നത് പോലീസ് തടഞ്ഞതോടെ സംഘർഷം മൂർച്ഛിച്ചു.

ഹൈക്കോടതി ഉത്തരവ് ലംഘിച്ചെന്ന് ആരോപണം

ഹൈക്കോടതിയുടെ മധുര ബെഞ്ച് ദീപം കത്തിക്കേണ്ട സ്ഥലം സംബന്ധിച്ച് നേരത്തെ നിർദേശം നൽകിയിരുന്നു. ഹർജിക്കാർ ആവശ്യപ്പെട്ട സ്ഥലത്ത് ദീപം കത്തിക്കണം എന്നായിരുന്നു കോടതിയുടെ നിർദേശം. എന്നാൽ, കോടതി ഉത്തരവ് ഉണ്ടായിട്ടും ക്ഷേത്ര ഭരണകൂടം ദീപം കുന്നിൻ മുകളിൽ നിശ്ചിത സ്ഥലത്ത് കത്തിക്കാൻ തയ്യാറായില്ലെന്ന് പ്രതിഷേധക്കാർ ആരോപിച്ചു.

ഇതിനെത്തുടർന്നുണ്ടായ ഉന്തും തള്ളിലും രണ്ട് പോലീസുകാർക്ക് പരിക്കേറ്റു. പ്രതിഷേധക്കാർ പിരിഞ്ഞുപോകാൻ വിസമ്മതിച്ചതോടെ പ്രദേശത്ത് സെക്ഷൻ 144 പ്രഖ്യാപിച്ചു.

സംഭവം ശ്രദ്ധയിൽപ്പെട്ടതിനെ തുടർന്ന്, തമിഴ്‌നാട് സർക്കാർ നൽകിയ അപ്പീൽ ഹൈക്കോടതിയുടെ മധുര ബെഞ്ച് പരിഗണിച്ചു. പരമ്പരാഗതമായി ക്ഷേത്രത്തിന്റെ മുകളിൽ ദീപം സ്ഥാപിച്ചിട്ടുള്ളതിനാൽ, ഹർജിക്കാർ ആവശ്യപ്പെട്ട പുതിയ സ്ഥലത്ത് ദീപം കത്തിക്കേണ്ടതില്ലെന്ന് ജസ്റ്റിസ് ജയചന്ദ്രൻ നിരീക്ഷിച്ചു.

DMK സർക്കാരിനെതിരെ BJPയുടെ രൂക്ഷ വിമർശനം

സംഭവത്തിൽ ദ്രാവിഡ മുന്നേറ്റ കഴകം (DMK) സർക്കാരിനും ഹിന്ദു റിലീജിയസ് ആൻഡ് ചാരിറ്റബിൾ എൻഡോവ്‌മെന്റ്‌സ് (HR & CE) വകുപ്പിനുമെതിരെ ബിജെപി നേതാക്കൾ ശക്തമായ വിമർശനവുമായി രംഗത്തെത്തി.

കെ. അണ്ണാമലൈ: സനാതന ധർമ്മത്തോടുള്ള DMK സർക്കാരിൻ്റെ ശത്രുത വ്യാഖ്യാനിക്കേണ്ട ആവശ്യമില്ലാത്ത ഒരു വസ്തുതയായി മാറിയിരിക്കുകയാണ്. നൂറുകണക്കിന് പോലീസുകാരെ വിന്യസിച്ചുകൊണ്ട് ഭക്തരെ തടഞ്ഞ DMK സർക്കാർ അവരുടെ പ്രീണന രാഷ്ട്രീയം പൂർണ്ണമായി തുറന്നുകാട്ടി. കോടതി ഉത്തരവുകൾക്ക് ഈ സർക്കാരിന് വിലയില്ലേയെന്നും, എന്തുകൊണ്ടാണ് സനാതന ധർമ്മത്തെ മാത്രം തിരഞ്ഞുപിടിച്ച് ആക്രമിക്കുന്നതെന്നും DMK മറുപടി പറയണം.

ഷെഹ്‌സാദ് പൂനെവാല (BJP വക്താവ്): നീണ്ട നിയമ പോരാട്ടത്തിലൂടെ ദീപം കത്തിക്കാൻ അവകാശം നേടിയ ഭക്തർക്ക് ലാത്തിച്ചാർജ് ലഭിക്കുകയാണ്. ഹൈക്കോടതി അനുമതി നൽകിയിട്ടും പോലീസ് തടഞ്ഞു.

നാരായണൻ തിരുപ്പതി (BJP നേതാവ്): ഹൈക്കോടതി ഉത്തരവ് പാലിക്കാത്ത DMK സർക്കാരിനും HR & CE വകുപ്പിനുമെതിരെ ശക്തമായ നടപടി സ്വീകരിക്കണമെന്ന് അദ്ദേഹം ആവശ്യപ്പെട്ടു. ഹിന്ദുക്കൾക്കെതിരെ പോലീസ് നടത്തിയ ക്രൂരമായ ആക്രമണങ്ങളെ അദ്ദേഹം ശക്തമായി അപലപിച്ചു.

കാർത്തിക ദീപം: കാർത്തിക മാസത്തിലെ പൗർണ്ണമി നാളിൽ ശിവൻ്റെ അഗ്‌നി രൂപത്തെ ആരാധിക്കുന്ന ഉത്സവമാണ് കാർത്തിക ദീപം. തിരുവണ്ണാമലയിലെ അരുണാചലേശ്വര ക്ഷേത്രത്തിലെ മഹാദീപം ലോകമെമ്പാടുമുള്ള ദശലക്ഷക്കണക്കിന് ഭക്തരെ ആകർഷിക്കുന്ന ഒരു ചടങ്ങാണ്.