ഫരീദാബാദിൽ ലിഫ്റ്റ് വാഗ്ദാനം ചെയ്ത് വാനിൽ കൂട്ടബലാത്സംഗം; രണ്ട് പേർ പിടിയിൽ

 ഫരീദാബാദ്: ഹരിയാനയിലെ ഫരീദാബാദിൽ 25 വയസ്സുകാരിയെ ലിഫ്റ്റ് വാഗ്ദാനം ചെയ്ത് വാനിൽ തട്ടിക്കൊണ്ടുപോയി കൂട്ടബലാത്സംഗം ചെയ്തു.

ഡിസംബർ 29 തിങ്കളാഴ്ച അർദ്ധരാത്രിയോടെയാണ് നടുക്കുന്ന സംഭവം നടന്നത്. കേസിലെ രണ്ട് പ്രതികളെയും പോലീസ് ഉടനടി അറസ്റ്റ് ചെയ്യുകയും കൃത്യത്തിന് ഉപയോഗിച്ച വാഹനം കസ്റ്റഡിയിലെടുക്കുകയും ചെയ്തു.

സംഭവം ഇങ്ങനെ: ഭർത്താവിനും അമ്മയ്ക്കുമൊപ്പം താമസിക്കുന്ന യുവതി, തിങ്കളാഴ്ച രാത്രി അമ്മയുമായുണ്ടായ തർക്കത്തെത്തുടർന്ന് സുഹൃത്തിന്റെ വീട്ടിലേക്ക് പോയതായിരുന്നു. അവിടെനിന്നും മടങ്ങി വരുമ്പോൾ മെട്രോ ചൗക്കിൽ വെച്ച് വാഹനമൊന്നും ലഭിക്കാതെ വന്നതോടെയാണ് അതുവഴി വന്ന വാനിൽ കയറിയത്. വാനിലുണ്ടായിരുന്ന രണ്ട് പേർ യുവതിയെ ഗുരുഗ്രാം റോഡിലെ വിജനമായ വനപ്രദേശത്തേക്ക് കൊണ്ടുപോയി ക്രൂരമായി പീഡിപ്പിക്കുകയായിരുന്നു.

ക്രൂരമായ അതിക്രമം: കനത്ത മഞ്ഞുള്ള സമയത്ത് ഏകദേശം മൂന്ന് മണിക്കൂറോളം പ്രതികൾ യുവതിയെ വാനിലിട്ട് പീഡിപ്പിച്ചതായി റിപ്പോർട്ടുകൾ വ്യക്തമാക്കുന്നു. അക്രമത്തിനിടെ തലയ്ക്ക് ഗുരുതരമായി പരിക്കേറ്റ യുവതിക്ക് പന്ത്രണ്ടോളം തുന്നലുകൾ വേണ്ടിവന്നു. പുലർച്ചെ മൂന്ന് മണിയോടെ എസ്‌ജിഎം നഗറിലെ രാജാ ചൗക്കിന് സമീപം യുവതിയെ പ്രതികൾ വാനിൽ നിന്നും തള്ളിയിട്ടു. തുടർന്ന് യുവതി സഹോദരിയെ വിവരം അറിയിക്കുകയും ആശുപത്രിയിൽ ചികിത്സ തേടുകയുമായിരുന്നു. നിലവിൽ ഫരീദാബാദിലെ സ്വകാര്യ ആശുപത്രിയിൽ ചികിത്സയിലാണ് ഇവർ.

പോലീസ് നടപടി: സംഭവത്തിൽ ഡിസംബർ 30-ന് കോട്‌വാലി പോലീസ് സ്റ്റേഷനിൽ പരാതി രജിസ്റ്റർ ചെയ്തു. ഫരീദാബാദ് പോലീസ് പിആർഒ യശ്പാൽ സിംഗ് അറിയിച്ചതനുസരിച്ച്, ക്രൈംബ്രാഞ്ച് നടത്തിയ ദ്രുതഗതിയിലുള്ള അന്വേഷണത്തിലാണ് പ്രതികളെ പിടികൂടിയത്. അറസ്റ്റിലായ രണ്ട് പേരും ഫരീദാബാദ് സ്വദേശികളാണ്. പ്രതികളെ കൂടുതൽ ചോദ്യം ചെയ്തുവരികയാണെന്നും നിയമനടപടികൾ പുരോഗമിക്കുകയാണെന്നും അധികൃതർ വ്യക്തമാക്കി.