യുപിയിൽ നടുക്കുന്ന അപകടം: അമിതഭാരം കയറ്റിയ ലോറി ബൊലേറോയ്ക്ക് മുകളിലേക്ക് മറിഞ്ഞു; ഡ്രൈവർക്ക് ദാരുണാന്ത്യം

 റാംപൂർ: ഉത്തർപ്രദേശിലെ റാംപൂർ ജില്ലയിൽ അമിതഭാരം കയറ്റിയ ലോറി നിയന്ത്രണം വിട്ട് കാറിന് മുകളിലേക്ക് മറിഞ്ഞ് ഒരാൾ മരിച്ചു.

ഞായറാഴ്ച വൈകുന്നേരം നൈനിറ്റാൾ റോഡിലെ പഹാഡി ഗേറ്റ് ജംഗ്ഷന് സമീപമാണ് നാടിനെ നടുക്കിയ അപകടം നടന്നത്. വൈദ്യുതി വകുപ്പിന്റെ ബൊലേറോ വാഹനത്തിന് മുകളിലേക്കാണ് ലോറി മറിഞ്ഞത്. അപകടത്തിന്റെ സിസിടിവി ദൃശ്യങ്ങൾ ഇപ്പോൾ പുറത്തുവന്നിട്ടുണ്ട്.

#Rampur🚨⚠️

Disturbing Visuals🚨#Chaos around #Intersection
- Overloaded Lorry overturned on Bolero
- Bolero Driver does’t look like checked RV mirrors
- Everyone riding/driving everywhere 🤷‍♂️

What’s with India DL?@DriveSmart_IN
pic.twitter.com/8Mnh2lz1HF

— Dave (Road Safety: City & Highways) (@motordave2) December 28, 2025

അപകടം നടന്നത് ഇങ്ങനെ:

റാംപൂർ പഹാഡി ഗേറ്റിലെ പവർ ഹൗസിന് സമീപം ബിലാസൂരിലേക്ക് പുല്ല് കയറ്റി പോവുകയായിരുന്നു ലോറി. ജംഗ്ഷനിലെ വളവിൽ വെച്ച് ഡിവൈഡറിലേക്ക് ഇടിച്ചുകയറിയ ലോറി നിയന്ത്രണം നഷ്ടപ്പെട്ട് തൊട്ടടുത്ത് സഞ്ചരിച്ചിരുന്ന ബൊലേറോയ്ക്ക് മുകളിലേക്ക് മറിയുകയായിരുന്നു. അമിതഭാരം കയറ്റിയിരുന്നതിനാൽ ലോറി പൂർണ്ണമായും ബൊലേറോയെ അമർത്തിക്കളഞ്ഞു.

അപകടത്തിൽ ബൊലേറോ ഡ്രൈവറായ ഫിരാസത്ത് (54) സംഭവസ്ഥലത്ത് വെച്ച് തന്നെ മരിച്ചു. ഗഞ്ച് പോലീസ് സ്റ്റേഷൻ പരിധിയിലെ ഗുജാർട്ടോള സ്വദേശിയാണ് ഇദ്ദേഹം. വൈദ്യുതി വകുപ്പിന്റെ ഔദ്യോഗിക ആവശ്യങ്ങൾക്കായി ഉപയോഗിച്ചിരുന്ന വാഹനമാണ് തകർന്നത്.

രക്ഷാപ്രവർത്തനവും അന്വേഷണവും

അപകടത്തെത്തുടർന്ന് കിലോമീറ്ററുകളോളം ഗതാഗതം തടസ്സപ്പെട്ടു. ഗഞ്ച് പോലീസ് സ്ഥലത്തെത്തി ക്രെയിനുകളുടെ സഹായത്തോടെയാണ് തകർന്ന വാഹനങ്ങൾ റോഡിൽ നിന്ന് മാറ്റിയത്. മൃതദേഹം പോസ്റ്റ്‌മോർട്ടത്തിനായി ജില്ലാ ആശുപത്രിയിലേക്ക് മാറ്റി.

എസ്പി വിദ്യാ സാഗർ സംഭവസ്ഥലം സന്ദർശിച്ച് സ്ഥിതിഗതികൾ വിലയിരുത്തി. പ്രാഥമിക അന്വേഷണത്തിൽ, ലോറിയിലെ അമിതഭാരവും വളവിലെ അമിതവേഗതയുമാണ് അപകടത്തിന് കാരണമായതെന്ന് പോലീസ് കണ്ടെത്തിയിട്ടുണ്ട്. സംഭവത്തിൽ കേസ് രജിസ്റ്റർ ചെയ്ത് വിശദമായ അന്വേഷണം ആരംഭിച്ചു.

നടുക്കുന്ന ദൃശ്യങ്ങൾ

അപകടത്തിന്റെ സിസിടിവി ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. ജംഗ്ഷനിൽ വളവ് തിരിയുന്ന ബൊലേറോയ്ക്ക് മുകളിലേക്ക് ലോറി മറിയുന്നതും നിമിഷനേരം കൊണ്ട് വാഹനം പൂർണ്ണമായും തകരുന്നതും ദൃശ്യങ്ങളിൽ വ്യക്തമാണ്. അമിതഭാരം കയറ്റി എത്തുന്ന വാഹനങ്ങൾ സൃഷ്ടിക്കുന്ന അപകട ഭീഷണിക്ക് തെളിവാണ് ഈ ദൂരന്തമെന്ന് നാട്ടുകാർ ആരോപിക്കുന്നു.