രാഹുൽ മാങ്കൂട്ടത്തിൽ എം.എൽ.എ. ഒളിവിൽത്തന്നെ; മുൻകൂർ ജാമ്യഹർജി ഇന്ന് കോടതിയിൽ

 തിരുവനന്തപുരം/പാലക്കാട്: പീഡനക്കേസിൽ പ്രതിയായ രാഹുൽ മാങ്കൂട്ടത്തിൽ എം.എൽ.എ. ഒളിവിൽ പോയിട്ട് ആറ് ദിവസം പിന്നിട്ടിട്ടും കണ്ടെത്താനാകാതെ കേരള പോലീസ്. എം.എൽ.എയ്ക്ക് വേണ്ടി പ്രത്യേക അന്വേഷണസംഘം സംസ്ഥാനത്തിനകത്തും പുറത്തും തിരച്ചിൽ ഊർജിതമാക്കിയെങ്കിലും പ്രതി ഒളിവിൽ തുടരുകയാണ്. അതേസമയം, രാഹുൽ മാങ്കൂട്ടത്തിലിന്റെ മുൻകൂർ ജാമ്യഹർജി ബുധനാഴ്ച കോടതി പരിഗണിക്കും.

നേരത്തെ സമാനമായ ഒരു കേസിൽ രാഹുൽ ഈശ്വറിന് കോടതി ജാമ്യം നിഷേധിച്ച സാഹചര്യത്തിൽ, എം.എൽ.എയുടെ ജാമ്യാപേക്ഷയിലും അനുകൂല വിധി ഉണ്ടാകില്ലെന്നാണ് അന്വേഷണ സംഘത്തിന്റെ പ്രതീക്ഷ. ജാമ്യഹർജി പരിഗണിക്കുന്നതിനു മുൻപ് രാഹുലിനെ എത്രയും വേഗം കണ്ടെത്തി അറസ്റ്റ് ചെയ്യാനുള്ള ശ്രമത്തിലാണ് പോലീസ്.

 മുതിർന്ന കോൺഗ്രസ് നേതാവിൻ്റെ സഹായം?

പാലക്കാടുനിന്ന് ഒളിവിൽ പോകാൻ രാഹുൽ മാങ്കൂട്ടത്തിലിനെ മുതിർന്ന ഒരു കോൺഗ്രസ് നേതാവ് സഹായിച്ചതായി പോലീസിന് സൂചന ലഭിച്ചു. ഒരു ചുവന്ന കാറിലാണ് എം.എൽ.എ. പാലക്കാട് നിന്ന് കടന്നുകളഞ്ഞതെന്ന് പോലീസ് നേരത്തെ കണ്ടെത്തിയിരുന്നു. ഈ വാഹനം ഒരു നടിയുടെ പേരിലുള്ളതാണെങ്കിലും, രാഹുലിനെ രക്ഷപ്പെടാൻ സഹായിച്ച കോൺഗ്രസ് നേതാവാണ് ഈ കാർ ഉപയോഗിച്ചിരുന്നതെന്നാണ് നിലവിൽ ലഭിക്കുന്ന വിവരം.

 സംസ്ഥാനത്തിന് പുറത്തും തിരച്ചിൽ

രാഹുലിനായുള്ള തിരച്ചിൽ കോയമ്പത്തൂർ, ബെംഗളൂരു തുടങ്ങിയ നഗരങ്ങൾ കേന്ദ്രീകരിച്ച് സംസ്ഥാനത്തിന് പുറത്തേക്കും വ്യാപിപ്പിച്ചു. പ്രത്യേക അന്വേഷണ സംഘം ഇവിടെ ക്യാമ്പ് ചെയ്ത് തിരച്ചിൽ നടത്തുകയാണ്.

 ജാമ്യഹർജിയിൽ നിർണ്ണായക തെളിവുകൾ

ജാമ്യഹർജിക്കൊപ്പം ഉൾപ്പെടുത്തുന്നതിനായി കൂടുതൽ തെളിവുകൾ രാഹുൽ മാങ്കൂട്ടത്തിലിന്റെ അഭിഭാഷകൻ കോടതിയിൽ സമർപ്പിച്ചു. പരാതിക്കാരിയുമായുള്ള വാട്‌സാപ്പ് ചാറ്റുകളുടെ രേഖകൾ, ഓഡിയോ, വീഡിയോ ക്ലിപ്പുകൾ എന്നിവയാണ് ഇത്തരത്തിൽ ഹാജരാക്കിയിരിക്കുന്നത്.

പാലക്കാട്ടെ ഫ്ളാറ്റിൽ നിന്ന് പോകുന്നതിനു മുൻപുള്ള അവസാനത്തെ സിസിടിവി ദൃശ്യങ്ങൾ ഡി.വി.ആറിൽ നിന്ന് മായ്ച്ചുകളഞ്ഞിരുന്നു. ഇതിനെക്കുറിച്ച് കെയർടേക്കറിൽ നിന്നും മറ്റുള്ളവരിൽ നിന്നും പോലീസ് മൊഴിയെടുത്തിട്ടുണ്ട്. കൂടാതെ, രാഹുലുമായി ബന്ധമുണ്ടായിരുന്ന ചിലർക്ക് കൂടി മൊഴിയെടുക്കുന്നതിനായി ഹാജരാകാൻ നോട്ടീസ് നൽകിയിട്ടുണ്ട്. മാധ്യമങ്ങളിലൂടെ പുറത്തുവന്ന ശബ്ദരേഖയിൽ ഉള്ളത് രാഹുൽ മാങ്കൂട്ടത്തിലിന്റെ ശബ്ദം തന്നെയാണെന്ന് അന്വേഷണസംഘം സ്ഥിരീകരിച്ചിട്ടുമുണ്ട്.

ജാമ്യഹർജി കോടതി പരിഗണിക്കും വരെ കാത്തിരിക്കാതെ എം.എൽ.എയെ പിടികൂടാനാണ് പോലീസ് ശ്രമിക്കുന്നതെന്ന് ഉദ്യോഗസ്ഥർ പറയുന്നു. നിലവിൽ തെളിവുശേഖരണം മാത്രമാണ് നടക്കുന്നത്. അറസ്റ്റ് ഉൾപ്പെടെയുള്ള നടപടികൾ ബുധനാഴ്ചത്തെ കോടതിയുടെ തീരുമാനത്തിനു ശേഷം മാത്രമേ ഉണ്ടാകുകയുള്ളൂ എന്നും ചില ഉദ്യോഗസ്ഥർ സൂചിപ്പിക്കുന്നു.