ഒഡിഷ കായിക താരങ്ങൾ ശൗചാലയത്തിനു പുറത്തിരുന്നു യാത്രചെയ്യേണ്ടിവന്ന സംഭവം; അന്വേഷണത്തിന് ഉത്തരവിട്ടു

 ഭുവനേശ്വർ: ഉത്തർപ്രദേശിൽ നടന്ന 69-ാമത് ദേശീയ സ്കൂൾ കായിക മേളയിൽ പങ്കെടുത്തു മടങ്ങിയ വിദ്യാർത്ഥികൾക്ക് ട്രെയിനിൽ നേരിടേണ്ടി വന്നത് ക്രൂരമായ അവഗണന.

കൺഫേം ചെയ്ത ടിക്കറ്റുകൾ ഇല്ലാത്തതിനെത്തുടർന്ന് പത്തോളം ആൺകുട്ടികളും എട്ട് പെൺകുട്ടികളും അടങ്ങുന്ന സംഘത്തിന് ട്രെയിനിലെ ശൗചാലയത്തിന് സമീപം ഇരുന്നാണ് യാത്ര ചെയ്യേണ്ടി വന്നത്. സംഭവത്തിൽ ഒഡിഷ സ്കൂൾ-കൂട്ടായ വിദ്യാഭ്യാസ വകുപ്പ് അന്വേഷണത്തിന് ഉത്തരവിട്ടു.

🚨 Utter disgrace to Odisha's sports & education departments!

18 young athletes from #Odisha, travelling to represent their state at the 69th National School Wrestling Championship in Uttar Pradesh, were forced to endure inhumane train travel conditions

Video shows the athletes… pic.twitter.com/TPEBneeJ96

— Nabila Jamal (@nabilajamal_) December 23, 2025

ദുരിതപൂർണ്ണമായ യാത്ര

ഡിസംബർ 8 മുതൽ 12 വരെ നടന്ന കായിക മേളയിൽ പങ്കെടുക്കാനായി ഡിസംബർ 5-നാണ് വിദ്യാർത്ഥികളും നാല് അധ്യാപകരും അടങ്ങുന്ന സംഘം ഒഡിഷയിൽ നിന്ന് പുറപ്പെട്ടത്. ഉത്തർപ്രദേശിലേക്കുള്ള യാത്രയിൽ നാല് ടിക്കറ്റുകൾ മാത്രമാണ് കൺഫേം ആയിരുന്നത്. ബാക്കി വിദ്യാർത്ഥികൾ ജനറൽ കമ്പാർട്ട്‌മെന്റിലെ തറയിൽ കിടന്നും മറ്റും കഷ്ടപ്പെട്ടാണ് ലക്ഷ്യസ്ഥാനത്തെത്തിയത്.

 മടക്കയാത്രയിൽ സ്ഥിതി കൂടുതൽ ദയനീയമായി. ഒരു ടിക്കറ്റ് പോലും കൺഫേം ആയിരുന്നില്ല. ഉത്തർപ്രദേശിൽ നിന്ന് ഗഞ്ചം ജില്ലയിലെ ഹിൻജിലി വരെ വിദ്യാർത്ഥികൾ ശൗചാലയത്തിന് സമീപം ഇരുന്നാണ് യാത്ര ചെയ്തത്. തുടർന്ന് ട്രെയിനിലുണ്ടായിരുന്ന, കായികതാരം കൂടിയായ ടി.ടി.ഇ ഇവരുടെ അവസ്ഥ കണ്ട് സഹതപിക്കുകയും ഭുവനേശ്വർ വരെ മറ്റ് കമ്പാർട്ട്‌മെന്റുകളിൽ ഇരിക്കാൻ സൗകര്യം ചെയ്തുകൊടുക്കുകയുമായിരുന്നു.

അധികൃതർക്കെതിരെ രൂക്ഷവിമർശനം

സർക്കാർ അയച്ച കുട്ടികൾക്ക് കൺഫേം ടിക്കറ്റുകൾ ഉറപ്പാക്കാത്ത അധികൃതരുടെ നടപടിക്കെതിരെ രക്ഷിതാക്കൾ രംഗത്തെത്തി. "മന്ത്രിമാർക്കും ഉദ്യോഗസ്ഥർക്കും യാത്രയ്ക്ക് മണിക്കൂറുകൾക്ക് മുമ്പ് പോലും ടിക്കറ്റ് കൺഫേം ആകാറുണ്ടല്ലോ, പിന്നെന്തുകൊണ്ട് സംസ്ഥാനത്തെ പ്രതിനിധീകരിച്ച് പോയ കുട്ടികൾക്ക് ഇത് സാധ്യമായില്ല?" എന്ന് രക്ഷിതാക്കൾ ചോദിക്കുന്നു. പെൺകുട്ടികൾ പോലും ഇത്രയും ദുഷ്കരമായ സാഹചര്യത്തിൽ യാത്ര ചെയ്യേണ്ടി വന്നത് വലിയ വീഴ്ചയാണെന്ന് രക്ഷിതാവായ സഞ്ജീവ് പട്നായിക് ആരോപിച്ചു.

അന്വേഷണം ആരംഭിച്ചു

സംഭവത്തിൽ സെക്കൻഡറി എജ്യുക്കേഷൻ ഡയറക്ടറോട് വിദ്യാഭ്യാസ വകുപ്പ് വിശദീകരണം തേടിയിട്ടുണ്ട്. ടിക്കറ്റുകൾ കൺഫേം ആക്കുന്നതിൽ വന്ന വീഴ്ച ഗൗരവമായി കാണുമെന്നും വരും ദിവസങ്ങളിൽ കായിക മത്സരങ്ങൾക്കായി പോകുന്ന കുട്ടികൾക്ക് മുൻഗണനാ അടിസ്ഥാനത്തിൽ ടിക്കറ്റുകൾ ഉറപ്പാക്കാൻ റെയിൽവേ അധികൃതരുമായി ചർച്ച നടത്തുമെന്നും വകുപ്പിലെ ഉന്നത ഉദ്യോഗസ്ഥർ അറിയിച്ചു.