ന്യൂസിലൻഡിൽ സിഖ് പരേഡിന് നേരെ ക്രിസ്ത്യൻ ഗ്രൂപ്പിന്റെ പ്രതിഷേധം

 ഓക്‌ലൻഡ്: ന്യൂസിലൻഡിലെ സൗത്ത് ഓക്‌ലൻഡിൽ സിഖ് സമൂഹം സംഘടിപ്പിച്ച മതപരമായ ഘോഷയാത്ര (നഗർ കീർത്തൻ) തടസ്സപ്പെടുത്താൻ തീവ്ര വലതുപക്ഷ ക്രിസ്ത്യൻ ഗ്രൂപ്പിന്റെ ശ്രമം.

രാഷ്ട്രീയ നേതാവ് ബ്രയാൻ തമാക്കിയുടെ 'ഡെസ്റ്റിനി ചർച്ച്' എന്ന ക്രിസ്ത്യൻ ഫണ്ടമെന്റലിസ്റ്റ് ഗ്രൂപ്പുമായി ബന്ധപ്പെട്ട 'ട്രൂ പേട്രിയറ്റ്‌സ് ഓഫ് എൻ.സെഡ്' (True Patriots of NZ) എന്ന സംഘടനയാണ് പരേഡ് തടഞ്ഞത്.

വംശീയ അധിക്ഷേപവും പ്രകോപനവും

ശനിയാഴ്ച ഉച്ചയ്ക്ക് രണ്ട് മണിയോടെയാണ് സംഭവം. അമ്പതോളം വരുന്ന പ്രതിഷേധക്കാർ റോഡ് ഉപരോധിക്കുകയും പരേഡിനെതിരെ മുദ്രാവാക്യം വിളിക്കുകയും ചെയ്തു. "ഇത് ന്യൂസിലൻഡാണ്, ഇന്ത്യയല്ല" (This is New Zealand not India) എന്നെഴുതിയ വലിയ ബാനറുകൾ ഇവർ ഉയർത്തിയിരുന്നു. "കിവീസ് ഫസ്റ്റ്", "ട്രൂ പേട്രിയറ്റ്" തുടങ്ങിയ സന്ദേശങ്ങൾ എഴുതിയ നീല ടി-ഷർട്ടുകൾ ധരിച്ചാണ് സംഘമെത്തിയത്. മവോറി ഗോത്രവർഗ്ഗക്കാരുടെ യുദ്ധനൃത്തമായ 'ഹാക്ക' പ്രകടിപ്പിച്ചും ഇവർ സിഖ് വിശ്വാസികളെ പ്രകോപിപ്പിക്കാൻ ശ്രമിച്ചു.

THIS IS OUR LAND. THIS IS OUR STAND. 🇳🇿

Today, True Patriots stood their ground in South Auckland.

No violence.
No riots.

Just my young men performing a haka…face-to-face…to send a clear message:

KEEP NZ, NZ.

While parts of Manurewa were shut down for hours by Sikhs and… pic.twitter.com/GjN9MYq1W4

— Brian Tamaki (@BrianTamakiNZ) December 20, 2025

ബ്രയാൻ തമാക്കിയുടെ പ്രതികരണം

സംഭവത്തിന്റെ വീഡിയോ പങ്കുവെച്ചുകൊണ്ട് ബ്രയാൻ തമാക്കി വിവാദപരമായ പ്രസ്താവന നടത്തി. "വിദേശ മതങ്ങൾ ഇവിടേക്ക് ഒഴുകുമ്പോൾ കിവീസ് (ന്യൂസിലൻഡ് സ്വദേശികൾ) നിശബ്ദരായിരിക്കില്ല. ഞങ്ങളുടെ മണ്ണും വിശ്വാസവും ജീവിതരീതിയും സംരക്ഷിക്കാൻ ഞങ്ങൾ നിലകൊള്ളും. ഇത് തുടക്കം മാത്രമാണ്," അദ്ദേഹം സോഷ്യൽ മീഡിയയിൽ കുറിച്ചു.

ശക്തമായ നടപടിയുമായി പോലീസ്

പ്രതിഷേധം അക്രമാസക്തമാകാതിരിക്കാൻ പോലീസ് ഉടനടി ഇടപെട്ടു. കൂടുതൽ ഉദ്യോഗസ്ഥരെ സ്ഥലത്തെത്തിച്ച് പരേഡിന് സുരക്ഷയൊരുക്കുകയും നിശ്ചിത റൂട്ടിലൂടെ യാത്ര തുടരാൻ സൗകര്യമുണ്ടാക്കുകയും ചെയ്തു. പ്രതിഷേധിക്കാനുള്ള അവകാശം എല്ലാവർക്കുമുണ്ടെങ്കിലും പൊതുജന സുരക്ഷയെ ഭീഷണിപ്പെടുത്തുന്നതോ മറ്റുള്ളവരുടെ മൗലികാവകാശങ്ങളെ തടസ്സപ്പെടുത്തുന്നതോ ആയ നടപടികൾ വെച്ചുപൊറുപ്പിക്കില്ലെന്ന് ഇൻസ്പെക്ടർ മാറ്റ് ഹോയ്‌സ് വ്യക്തമാക്കി.

സിഖ് സമൂഹത്തിന്റെ പ്രതികരണം

യഥാസമയം അനുമതി വാങ്ങിയാണ് നഗർ കീർത്തൻ സംഘടിപ്പിച്ചതെന്ന് ന്യൂസിലൻഡ് സിഖ് യൂത്ത് പ്രസ്താവനയിൽ അറിയിച്ചു. എല്ലാ വിഭാഗം ജനങ്ങൾക്കും സൗജന്യമായി ഭക്ഷണം വിതരണം ചെയ്യുന്ന സമാധാനപരമായ ചടങ്ങായിരുന്നു ഇതെന്നും, അതിനെതിരെ വംശീയവും അധിക്ഷേപകരവുമായ രീതിയിൽ പ്രതിഷേധിച്ചത് അപലപനീയമാണെന്നും അവർ ചൂണ്ടിക്കാട്ടി. മിത്തോളജിയിൽ വേരുകളുള്ള 'ഹാക്ക' പോലുള്ള യുദ്ധനൃത്തങ്ങൾ സമാധാനപരമായ ഒരു ചടങ്ങിനെ തടസ്സപ്പെടുത്താൻ ഉപയോഗിച്ചത് നിർഭാഗ്യകരമാണെന്നും അവർ കൂട്ടിച്ചേർത്തു.