തെലങ്കാനയിൽ ഞെട്ടിക്കുന്ന കൊലപാതകം: റിയൽ എസ്റ്റേറ്റ് വ്യാപാരിയെ ആറുപേർ ചേർന്ന് കുത്തിക്കൊന്നു

മേഡ്ചൽ-മൽകാജ്ഗിരി (തെലങ്കാന): തെലങ്കാനയിലെ മേഡ്ചൽ-മൽകാജ്ഗിരി ജില്ലയിൽ സ്കൂളിന് മുന്നിൽ വെച്ച് റിയൽ എസ്റ്റേറ്റ് വ്യാപാരിയെ ആറുപേർ ചേർന്ന് കുത്തിക്കൊന്നു. കുട്ടിയെ സ്കൂളിൽ വിട്ടശേഷം മടങ്ങുകയായിരുന്ന 50 വയസ്സുകാരനാണ് തിങ്കളാഴ്ച രാവിലെ ദാരുണമായി കൊല്ലപ്പെട്ടത്.

കൊലപാതകത്തിൻ്റെ ഞെട്ടിക്കുന്ന ദൃശ്യങ്ങൾ സമീപത്തെ സി.സി.ടി.വി. ക്യാമറയിൽ പതിഞ്ഞിട്ടുണ്ട്. ഘണ്ട വെങ്കടരത്നം എന്ന് തിരിച്ചറിഞ്ഞ ഇര, ഫോസ്റ്റർ ബില്ലബോങ് സ്കൂളിന് മുന്നിലാണ് ആക്രമിക്കപ്പെട്ടത്. സ്കൂട്ടറിൽ കുട്ടിയെ വിട്ടശേഷം മടങ്ങുകയായിരുന്ന അദ്ദേഹത്തെ മോട്ടോർ ബൈക്കിലെത്തിയ രണ്ട് പേരും ഓട്ടോറിക്ഷയിലെത്തിയ നാല് പേരുമടങ്ങുന്ന സംഘം തടഞ്ഞുനിർത്തി ആക്രമിക്കുകയായിരുന്നു.

More than the ghastly act, it is the collective silence of the society that frightens me. A man was hacked to death in broad daylight and full public view. None of the onlookers bothered to respond even after the assailants fled away pic.twitter.com/Vv55mTVZ0l

— B Kartheek (@KartheekTnie) December 8, 2025

വയറ്റിൽ കുത്തേറ്റ വെങ്കടരത്നം സംഭവസ്ഥലത്ത് വെച്ച് തന്നെ മരിച്ചു. ആക്രമണം നടക്കുമ്പോൾ രണ്ട് പേർ ദൂരെ നിന്ന് നോക്കിനിൽക്കുന്നതും, പ്രതികൾ കൃത്യം നടത്തിയ ശേഷം ഓട്ടോറിക്ഷയിലും ബൈക്കിലുമായി രക്ഷപ്പെടുന്നതും വീഡിയോയിൽ വ്യക്തമാണ്. സംഭവസ്ഥലത്ത് നിന്ന് കത്തി കണ്ടെടുത്തിട്ടുണ്ട്.

കൊലപാതകത്തിൻ്റെ പിന്നിലെ കാരണം സംബന്ധിച്ചോ സംഭവത്തിൽ പോലീസ് സ്വീകരിച്ച നടപടികളെക്കുറിച്ചോ നിലവിൽ റിപ്പോർട്ടുകളൊന്നും ലഭ്യമല്ല. പോലീസ് അന്വേഷണം ആരംഭിച്ചിട്ടുണ്ട്.