മോദിയും പുടിനും എസ്.യു.വിയിൽ: 'സെൽഫി' ചിത്രം യു.എസ്. കോൺഗ്രസിൽ; ഇന്ത്യയെ റഷ്യയിലേക്ക് തള്ളിവിട്ടത് ട്രംപിന്റെ നയങ്ങളെന്ന് വിമർശനം

 വാഷിങ്ടൺ ഡി.സി.: പ്രധാനമന്ത്രി നരേന്ദ്ര മോദിയും റഷ്യൻ പ്രസിഡന്റ് വ്ലാഡിമിർ പുടിനും സഞ്ചരിച്ച എസ്.യു.വിയിൽവെച്ച് എടുത്ത സെൽഫി ചിത്രം അമേരിക്കൻ കോൺഗ്രസിൽ വലിയ ചർച്ചാവിഷയമായി. പ്രസിഡന്റ് ഡൊണാൾഡ് ട്രംപിന്റെ വിദേശനയങ്ങൾക്കെതിരെ ഉയർന്ന വിമർശനങ്ങൾക്ക് ഈ ചിത്രം ആക്കം കൂട്ടി. ഇന്ത്യയോടുള്ള വാഷിങ്ടണിന്റെ സമീപനം സംബന്ധിച്ച് പുനഃപരിശോധന വേണമെന്ന ആവശ്യവും ഇതോടെ ശക്തമായി.

വൈറൽ സെൽഫി ചിത്രം ഉയർത്തിക്കാട്ടിയാണ് കോൺഗ്രസ് വനിത സിഡ്‌നി കാംലാഗർ-ഡോവ് യു.എസ്സിനു ശക്തമായ മുന്നറിയിപ്പ് നൽകിയത്. ഇന്ത്യയെ റഷ്യയിലേക്ക് അടുപ്പിച്ചത് അമേരിക്കൻ നയങ്ങളാണെന്ന് അവർ കുറ്റപ്പെടുത്തി.

"ആയിരം വാക്കുകൾക്ക് തുല്യമാണ് ഈ ചിത്രം. ഇന്ത്യയോടുള്ള ട്രംപിന്റെ നയങ്ങളെ 'നമ്മുടെ മുഖം വികൃതമാക്കി പ്രതികാരം ചെയ്യുക' എന്നതിനോട് മാത്രമേ ഉപമിക്കാൻ കഴിയൂ," സിഡ്‌നി കാംലാഗർ-ഡോവ് പറഞ്ഞു.

നിലവിലെ ഭരണകൂടം ഇരു രാജ്യങ്ങളും തമ്മിലുള്ള 'തന്ത്രപരമായ വിശ്വാസ്യതയും പരസ്പര ധാരണയും' തകർക്കുകയാണെന്നും അവർ ആരോപിച്ചു. "നമ്മുടെ എതിരാളികളുടെ കൈകളിലേക്ക് തന്ത്രപരമായ പങ്കാളികളെ തള്ളിവിടുന്നതിലൂടെ ആർക്കും സമാധാനത്തിനുള്ള നോബൽ സമ്മാനം ലഭിക്കില്ല," എന്ന് അവർ തീർത്തുപറഞ്ഞു. 'നിർബന്ധിത പങ്കാളിയാകുന്നതിന് വലിയ വില നൽകേണ്ടി വരുമെന്നും' ഈ സംഭവം വാഷിങ്ടണിനുള്ള ഒരു 'മുന്നറിയിപ്പ് മണിയാണ്' എന്നും അവർ കൂട്ടിച്ചേർത്തു.

ഇന്ത്യ-യു.എസ്. ബന്ധങ്ങളിലുണ്ടായ കോട്ടങ്ങൾ അംഗീകരിച്ച കോൺഗ്രസ് വനിത, ഈ വിഷയത്തിൽ ഇരുപാർട്ടികൾക്കും (റിപ്പബ്ലിക്കൻ-ഡെമോക്രാറ്റിക്) വ്യക്തമായ ധാരണയുണ്ടെന്നും ചെയർമാന് നന്ദി പറയുന്നുവെന്നും പ്രസ്താവിച്ചു.

 സൗഹൃദത്തിന്റെ 'ലോ-പ്രൊഫൈൽ' യാത്ര

2022-ൽ യുക്രെയ്ൻ യുദ്ധം ആരംഭിച്ച ശേഷം പുടിൻ നടത്തുന്ന ആദ്യ ഔദ്യോഗിക ഇന്ത്യാ സന്ദർശനമായിരുന്നു ഇത്. പാലം വിമാനത്താവളത്തിൽ ചുവപ്പ് പരവതാനിയോടും പ്രധാനമന്ത്രി മോദിയുടെ ഊഷ്മളമായ ആശ്ലേഷത്തോടെയുമാണ് പുടിനെ സ്വീകരിച്ചത്.

സാധാരണയായി കവചിത ലിമോസിനുകളുടെ അകമ്പടിക്ക് പകരം, ഇരുവരും ഇന്ത്യൻ സുരക്ഷാ ഏജൻസികൾ ഉപയോഗിക്കുന്ന, ഇന്ത്യയിൽ അസംബിൾ ചെയ്ത വെള്ള ടൊയോട്ട ഫോർച്യൂണർ എസ്.യു.വിയിലാണ് യാത്ര ചെയ്തത്. സ്വകാര്യ അത്താഴത്തിനായി പ്രധാനമന്ത്രിയുടെ വസതിയിലേക്കായിരുന്നു ഈ യാത്ര.

കാർ യാത്ര തൻ്റെ ആശയമായിരുന്നുവെന്നും അത് തങ്ങളുടെ സൗഹൃദത്തിന്റെ പ്രതീകമാണ് എന്നും പുടിൻ പിന്നീട് വ്യക്തമാക്കി. "യാത്രയിലുടനീളം ഞങ്ങൾ സംസാരിച്ചു... സംസാരിക്കാൻ എപ്പോഴും എന്തെങ്കിലുമുണ്ടാകും," അദ്ദേഹം കൂട്ടിച്ചേർത്തു.

അനൗപചാരികവും സൗഹൃദപരവുമായ ഈ യാത്ര ഡൽഹിക്ക് അപ്പുറത്തേക്ക് വലിയ ചലനം സൃഷ്ടിച്ചു. റഷ്യൻ എണ്ണ, പ്രതിരോധ ബന്ധങ്ങൾ എന്നിവയുടെ പേരിൽ ഇന്ത്യക്കുമേൽ സമ്മർദ്ദം ചെലുത്താനുള്ള യു.എസ്. ശ്രമങ്ങൾക്ക് ദൃശ്യപരമായ ഒരു മറുപടിയായി ഈ സംഭവം വാഷിങ്ടണിൽ വിലയിരുത്തപ്പെട്ടു.

കോൺഗ്രസിൽ സെൽഫി ചിത്രം ഉയർത്തിക്കൊണ്ടുവന്നതിലൂടെ, അമിതമായ യു.എസ്. താരിഫുകളും നിർബന്ധിത സമ്മർദ്ദങ്ങളും ദീർഘകാല പങ്കാളിത്തത്തെ തുരങ്കം വെക്കുമെന്നും, അത് ഇന്ത്യയെ പടിഞ്ഞാറൻ രാജ്യങ്ങളിൽ നിന്ന് അകറ്റി റഷ്യയിലേക്ക് അടുപ്പിക്കുന്നതിന് കാരണമായേക്കുമെന്നും കാംലാഗർ-ഡോവ് മുന്നറിയിപ്പ് നൽകുന്നു.