ഇസ്‌ലാമിസ്റ്റ് പ്രത്യയശാസ്ത്രം അമേരിക്കൻ മൂല്യങ്ങൾക്ക് ഭീഷണി; നിലപാട് വ്യക്തമാക്കി തുളസി ഗബ്ബാർഡ്

 ന്യൂഡൽഹി: ഇസ്‌ലാമിസ്റ്റ് പ്രത്യയശാസ്ത്രം അമേരിക്കൻ മൂല്യങ്ങൾക്ക് കടുത്ത ഭീഷണിയാണെന്ന് യുഎസ് നാഷണൽ ഇന്റലിജൻസ് ഡയറക്ടർ തുളസി ഗബ്ബാർഡ്.

ഇസ്‌ലാമിസം എന്ന രാഷ്ട്രീയ പ്രത്യയശാസ്ത്രം അമേരിക്കൻ സ്വാതന്ത്ര്യത്തിന്റെ അടിത്തറയ്ക്ക് വിരുദ്ധമാണെന്നും ഇസ്‌ലാം മതത്തെയും ഇസ്‌ലാമിസത്തെയും രണ്ട് വ്യത്യസ്ത തലങ്ങളിൽ കാണേണ്ടതുണ്ടെന്നും ഒരു ചർച്ചാ പരിപാടിക്കിടെ അവർ അഭിപ്രായപ്പെട്ടു.

'ഇസ്‌ലാമിക തത്വങ്ങൾ അടിച്ചേൽപ്പിക്കാൻ ശ്രമം'

അമേരിക്കയുടെ ചില ഭാഗങ്ങളിൽ നിയമ-രാഷ്ട്രീയ സംവിധാനങ്ങളിലൂടെ ഇസ്‌ലാമിക തത്വങ്ങൾ നടപ്പിലാക്കാൻ നീക്കങ്ങൾ നടക്കുന്നുണ്ടെന്ന് തുളസി ഗബ്ബാർഡ് ആരോപിച്ചു.

 "ന്യൂജേഴ്‌സിയിലെ പാറ്റേഴ്‌സൺ തങ്ങളെ ആദ്യത്തെ 'മുസ്‌ലിം നഗരം' എന്ന് വിശേഷിപ്പിക്കുന്നതിൽ അഭിമാനിക്കുന്നു. നിയമങ്ങളിലൂടെയോ അക്രമത്തിലൂടെയോ ഇസ്‌ലാമിക തത്വങ്ങൾ ജനങ്ങൾക്ക് മേൽ അടിച്ചേൽപ്പിക്കാനാണ് അവിടെ ശ്രമം നടക്കുന്നത്," അവർ പറഞ്ഞു. ഈ വർഷം റമദാൻ മാസത്തിന്റെ തുടക്കത്തിൽ, നഗരത്തിലെ മുസ്‌ലിം ജനസംഖ്യയെ സൂചിപ്പിച്ച് പാറ്റേഴ്‌സൺ ലോകത്തിലെ നാലാമത്തെ വിശുദ്ധ നഗരമാണെന്ന് അവിടുത്തെ മേയർ പ്രസ്താവിച്ചിരുന്നു.

 ഹൂസ്റ്റൺ ഉൾപ്പെടെയുള്ള മറ്റ് നഗരങ്ങളിലും സമാനമായ പ്രവണതകൾ പ്രകടമാണെന്നും ഇത് ഭാവിയിൽ സംഭവിക്കാനിടയുള്ള ഒന്നല്ല, മറിച്ച് നിലവിൽ അമേരിക്കൻ അതിർത്തിക്കുള്ളിൽ നടന്നുകൊണ്ടിരിക്കുന്ന യാഥാർത്ഥ്യമാണെന്നും അവർ കൂട്ടിച്ചേർത്തു.

'വ്യക്തിസ്വാതന്ത്ര്യത്തിന് വിരുദ്ധം'

മതസ്വാതന്ത്ര്യത്തെയും ഇസ്‌ലാമിസത്തെയും കൃത്യമായി വേർതിരിച്ചായിരുന്നു തുളസി ഗബ്ബാർഡിന്റെ പ്രസംഗം. ഇസ്‌ലാമിസം എന്നത് വ്യക്തിസ്വാതന്ത്ര്യത്തെ നിരസിക്കുന്ന ഒരു രാഷ്ട്രീയ സിദ്ധാന്തമാണെന്ന് അവർ വിശേഷിപ്പിച്ചു.

"ഇസ്‌ലാമിസത്തെക്കുറിച്ച് സംസാരിക്കുമ്പോൾ അവിടെ വ്യക്തിസ്വാതന്ത്ര്യമെന്ന ഒന്നില്ല. ഇത് നമ്മുടെ രാജ്യത്തിന്റെ അടിത്തറയുമായി ഒത്തുപോകുന്നതല്ല. നമ്മുടെ സ്വാതന്ത്ര്യം ഭരണകൂടം നൽകുന്നതല്ല, മറിച്ച് ഈശ്വരദത്തമാണെന്ന വിശ്വാസത്തിലാണ് അമേരിക്കൻ വ്യവസ്ഥിതി നിലനിൽക്കുന്നത്. ആ സ്വാതന്ത്ര്യം ദൈവത്തിൽ നിന്നാണ് വരുന്നതെന്ന് നാം തിരിച്ചറിയുമ്പോഴാണ് ഇസ്‌ലാമിസ്റ്റ് പ്രത്യയശാസ്ത്രം ഉയർത്തുന്ന ഭീഷണിയുടെ ഗൗരവം ബോധ്യപ്പെടുക," ഗബ്ബാർഡ് വ്യക്തമാക്കി.

അമേരിക്കയുടെ ദേശീയ സുരക്ഷാ തലപ്പത്തിരിക്കുന്ന ഒരാളിൽ നിന്ന് ഇത്തരമൊരു പരാമർശം വന്നത് അന്താരാഷ്ട്ര തലത്തിലും വലിയ ചർച്ചകൾക്ക് വഴിവെച്ചിരിക്കുകയാണ്.