ഡോ. രോഹിത് ശശിധരനെ ആദരിച്ചു; അരയംപറമ്പ് കുടുംബസംഗമം പ്രൗഢമായി

എടപ്പാൾ: എടപ്പാൾ ഹോസ്പിറ്റലിലെ പ്രശസ്ത ന്യൂറോളജിസ്റ്റ് ഡോ. രോഹിത് ശശിധരനെ അരയംപറമ്പ് കുടുംബസംഗമത്തിൽ വെച്ച് ആദരിച്ചു.

മെഡിക്കൽ കോളേജ് ഇ.എൻ.ടി വിഭാഗം റിട്ട. പ്രൊഫസർ ഡോ. വിനയകുമാർ അദ്ദേഹത്തിന് പൊന്നാടയും ശിലാഫലകവും കൈമാറി.

മെഡിമിക്സ് എ.വി.എ ഗ്രൂപ്പ് ചെയർമാനും അരയംപറമ്പ് ക്ഷേത്രക്കമ്മറ്റി രക്ഷാധികാരിയുമായ എ.വി. അനൂപ് ചടങ്ങിൽ അധ്യക്ഷത വഹിച്ചു. ഗോകുലം ഗ്രൂപ്പ് ഓഫ് കമ്പനീസ് ചെയർമാൻ ഗോകുലം ഗോപാലനാണ് സംഗമം ഉദ്ഘാടനം ചെയ്തത്. ചടങ്ങിൽ വെച്ച് സംവിധായകനും തിരക്കഥാകൃത്തുമായ റെജിൻ എസ്. ബാബുവിനെയും കുടുംബയോഗം പ്രസിഡന്റ് എ.എം. പ്രേംഭൂഷനെയും പ്രത്യേകമായി അനുമോദിച്ചു.

സംഘാടക സമിതി ചെയർമാൻ എ.പി. ഗിരിജാ ശങ്കർ സ്വാഗതം ആശംസിച്ചു. എസ്.എസ്.എൽ.സി, പ്ലസ് ടു പരീക്ഷകളിൽ മികച്ച വിജയം നേടിയവർക്ക് എ.കെ. കലാധരൻ ഉപഹാരങ്ങൾ സമർപ്പിച്ചു. കലാമത്സരങ്ങളിൽ വിജയികളായവർക്ക് എ.ബി. രാജീവ് സമ്മാനങ്ങൾ വിതരണം ചെയ്തു. ഡോ. രോഹിത് ശശിധരൻ, റെജിൻ എസ്. ബാബു, എ.എം. പ്രേംഭൂഷൻ എന്നിവർ മറുപടി പ്രസംഗം നടത്തി.

കുമാരി സാത്വിക, ഹൃദിക എന്നിവരുടെ പ്രാർത്ഥനയോടെ ആരംഭിച്ച ചടങ്ങിന് വൈസ് പ്രസിഡന്റ് എ.എസ്. ചന്ദ്രദാസ് നന്ദി രേഖപ്പെടുത്തി. കുടുംബാംഗങ്ങളുടെ വിവിധ കലാപരിപാടികളും സൗഹൃദ സദസ്സും സംഗമത്തിന് മാറ്റ് കൂട്ടി.