ഓസ്‌ട്രേലിയയിലും തരംഗമായി പ്രവാസി മലയാളിയുടെ ചെന്തെങ്ങ് വിസ്മയം,

ടൗൺസ്‌വിൽ :ഒരു സോഫ്റ്റ്‌വെയർ എൻജിനീയറുടെ തിരക്കിട്ട ജീവിതം. ഓസ്‌ട്രേലിയയിലെ ടൗൺസ്‌വില്ലിൽ കുടുംബമായി സ്ഥിരതാമസം.

ഭാര്യ നഴ്സാണ്, രണ്ടു കുട്ടികൾ. കഴിഞ്ഞ 13 വർഷമായി ഓസ്‌ട്രേലിയയിൽ പ്രവാസജീവിതം നയിക്കുന്ന കോഴിക്കോട് സ്വദേശി ബിനു മാത്യുവിന്റെ ഔദ്യോഗിക ജീവിതം കംപ്യൂട്ടറുകൾക്കും കോഡുകൾക്കും ഇടയിലാണ്. എന്നാൽ, ഈ ഹൈടെക് ജീവിതത്തിനിടയിലും അദ്ദേഹത്തിന്റെ മനസ്സിനെ എപ്പോഴും പിടിച്ചുലച്ചത് മണ്ണിനോടുള്ള അടങ്ങാത്ത സ്‌നേഹമായിരുന്നു.

ടൗൺസ്‌വില്ലിലെ ചെന്തെങ്ങ് വിസ്മയം കേരളത്തോട് സമാനമായ കാലാവസ്ഥയാണ് ഓസ്‌ട്രേലിയയിലെ ടൗൺസ്‌വില്ലിന്റെ ഏറ്റവും വലിയ ആകർഷണം. ആദ്യം മിഡിൽ ഈസ്റ്റിലും പിന്നീട് അയർലൻഡിലും പ്രവാസം തിരഞ്ഞെടുത്ത ബിനു, ഒടുവിൽ കേരളത്തിന്റെ കാലാവസ്ഥയോട് ചേർന്ന് നിൽക്കുന്ന ഒരിടം തേടിയാണ് ഓസ്ട്രേലിയയിലെ ടൗൺസ്‌വില്ലിൽ എത്തിയത്.

ചെറുപ്പം മുതലേ കൃഷിയോട് താൽപ്പര്യമുള്ള ബിനുവിന്, ഇവിടത്തെ കാലാവസ്ഥ ഒരു അനുഗ്രഹമായി. ജോലിയുടെ സമ്മർദ്ദങ്ങളിൽ നിന്ന് ആശ്വാസം കണ്ടെത്താൻ അദ്ദേഹം ഒഴിവുസമയം കൃഷിക്കായി മാറ്റിവച്ചു. ഈ താൽപര്യമാണ് എട്ടുവർഷം മുൻപ് തന്റെ ഭൂമിയിൽ ചെന്തെങ്ങിൻ തൈകൾ നട്ടുപിടിപ്പിക്കാൻ ബിനുവിനെ പ്രേരിപ്പിച്ചത്. കാലങ്ങൾ കടന്നുപോയി. മലയാളിയുടെ ഗൃഹാതുരത്വമായ തെങ്ങുകൾ സമൃദ്ധമായി വളർന്നു. 

പണ്ടെങ്ങോ നാട്ടിൽ തെങ്ങിൽ നിന്ന് കള്ള് ചെത്തുന്നത് കണ്ടിട്ടുള്ള ബിനുവിന്റെ മനസ്സിൽ ഒരു മോഹം മൊട്ടിട്ടു: സ്വന്തമായി ചെത്തിയെടുത്ത കള്ളിന്റെ രുചി അറിയണം!ആദ്യ ശ്രമം വിജയകരം ഈ സ്വപ്നം യാഥാർഥ്യമാക്കാൻ ബിനു കള്ള് ചെത്തി പരിചയമുള്ള സുഹൃത്തുക്കളെ ബന്ധപ്പെട്ടു. അവരിൽ നിന്ന് ലഭിച്ച അറിവും നിർദ്ദേശങ്ങളും വച്ചാണ് ഈ മലയാളി തന്റെ ടൗൺസ്‌വില്ലിലെ തോട്ടത്തിൽ ആദ്യമായി കള്ള് ചെത്തിയത്.

സംഭവം വിജയകരമാകുമോ എന്ന് ഉറപ്പില്ലായിരുന്നു. എന്നാൽ, ആദ്യ ശ്രമം തന്നെ വിജയകരമായതിന്റെ സന്തോഷത്തിലാണ് ഈ മലയാളി.  ബിനുവിന്റെ ഈ സംരംഭം ഒരു ബിസിനസിനോ വരുമാനത്തിനോ വേണ്ടിയായിരുന്നില്ല. അത് മണ്ണിനോടുള്ള, കൃഷിയോടുള്ള അഭിനിവേശം മാത്രമായിരുന്നു. ഓസ്‌ട്രേലിയൻ നിയമമനുസരിച്ച് സ്വകാര്യ ആവശ്യങ്ങൾക്കായി കള്ള് ചെത്തുന്നതിനോ അത് ഉപയോഗിക്കുന്നതിനോ തടസ്സങ്ങളില്ല. 

ആദ്യ ശ്രമത്തിൽ ചില ചെറിയ പാളിച്ചകൾ സംഭവിച്ചെങ്കിലും, അടുത്ത തവണ അവയെല്ലാം പരിഹരിക്കണമെന്നാണ് ബിനുവിന്റെ ആഗ്രഹം.കൃഷി: സമാധാനത്തിന്റെ ഇടം കള്ള് ചെത്ത് മാത്രമല്ല, ടൗൺസ്‌വില്ലിലെ ബിനുവിന്റെ തോട്ടത്തിൽ സമൃദ്ധമായി വളരുന്നത്. തെങ്ങിനൊപ്പം കപ്പ, വാഴ തുടങ്ങി നാട്ടിലെ കൃഷിയിടങ്ങളിലെ കാഴ്ചകൾ എല്ലാം അദ്ദേഹത്തിന്റെ തോട്ടത്തിലുണ്ട്. 

'ഇവിടെയും കൃഷി ചെയ്യാം' എന്ന ഒരു സന്ദേശവും ബിനു പ്രവാസികൾക്ക് നൽകുന്നത്. ജോലിയിലെ സമ്മർദ്ദങ്ങളിൽ നിന്ന് ഒരു ആശ്വാസം കണ്ടെത്താൻ കൃഷിയിലേക്ക് തിരിഞ്ഞ ബിനു, ടൗൺസ്‌വില്ലിലെ അനുകൂലമായ കാലാവസ്ഥയുടെ സഹായത്തോടെ ആ ഇഷ്ടം വിജയകരമായി മുന്നോട്ട് കൊണ്ടുപോകുന്നു.