സൈബർ തട്ടിപ്പുകാരുടെ 'ഡിജിറ്റൽ അറസ്റ്റ്'; ബാങ്ക് ജീവനക്കാരുടെ ജാഗ്രതയിൽ വൃദ്ധയ്ക്ക് തിരികെ ലഭിച്ചത് 1.2 കോടി രൂപ

 പ്രയാഗരാജ്: ഉത്തർപ്രദേശിലെ പ്രയാഗരാജിൽ വിരമിച്ച അധ്യാപികയെ ഡിജിറ്റൽ അറസ്റ്റിലൂടെ കബളിപ്പിച്ച് 1.2 കോടി രൂപ തട്ടിയെടുക്കാനുള്ള സൈബർ ക്രിമിനലുകളുടെ നീക്കം ബാങ്ക് ജീവനക്കാരുടെ സമയോചിതമായ ഇടപെടലിലൂടെ പരാജയപ്പെട്ടു.

പിഎൻബി (PNB) സിവിൽ ലൈൻസ് ശാഖയിലെ മാനേജരുടെയും ജീവനക്കാരുടെയും ജാഗ്രതയാണ് ചഞ്ചൽ ശ്രീവാസ്തവ എന്ന വൃദ്ധയുടെ ആജീവനാന്ത സമ്പാദ്യം സംരക്ഷിച്ചത്.

സംഭവം ഇങ്ങനെ: തിങ്കളാഴ്ച ഉച്ചയ്ക്ക് 1.30-ഓടെയാണ് ചഞ്ചൽ ശ്രീവാസ്തവ ബാങ്കിലെത്തി തന്റെ അക്കൗണ്ടിലുള്ള 1.2 കോടി രൂപ ഉടനടി മറ്റൊരു അക്കൗണ്ടിലേക്ക് കൈമാറണമെന്ന് ആവശ്യപ്പെട്ടത്. ഭയചകിതയായി കാണപ്പെട്ട ഇവർ വലിയ തുക പെട്ടെന്ന് മാറ്റാൻ ശ്രമിച്ചത് ഫ്രണ്ട് ഓഫീസ് ജീവനക്കാരിൽ സംശയമുണ്ടാക്കി. ഉടൻതന്നെ വിവരം ചീഫ് മാനേജർ വിപിൻ കുമാറിനെ അറിയിച്ചു.

ബാങ്കിന്റെ പഴുതടച്ച നീക്കം: മാനേജർ സ്ത്രീയുമായി സംസാരിച്ചെങ്കിലും അവർ കൃത്യമായ മറുപടി നൽകാൻ തയ്യാറായില്ല. സംശയം വർദ്ധിച്ചതോടെ പണം അയക്കേണ്ട അക്കൗണ്ടിനെക്കുറിച്ച് ബാങ്ക് അധികൃതർ അന്വേഷിച്ചു. ജാർഖണ്ഡിലെ റാഞ്ചിയിലുള്ള കൊട്ടക് മഹീന്ദ്ര ബാങ്കിന്റെ ഒരു കറന്റ് അക്കൗണ്ടിലേക്കാണ് പണം ആവശ്യപ്പെട്ടതെന്ന് കണ്ടെത്തി. ഈ അക്കൗണ്ട് കഴിഞ്ഞ ഒക്ടോബറിൽ മാത്രം ആരംഭിച്ചതാണെന്ന് മനസ്സിലാക്കിയതോടെ ബാങ്ക് ഉദ്യോഗസ്ഥർ സൈബർ ക്രൈം പോലീസിന്റെ സഹായം തേടി.

വൈകുന്നേരം വരെ ബാങ്കിൽ ഇരുത്തി കാര്യങ്ങൾ ചോദിച്ചറിഞ്ഞ ശേഷം, ഉദ്യോഗസ്ഥർ ഇവരുടെ വിദേശത്തുള്ള മകനുമായി ബന്ധപ്പെട്ടു. തുടർന്നാണ് ആദായനികുതി വകുപ്പിന്റെ പേരിലുള്ള ഭീഷണിപ്പെടുത്തി 'ഡിജിറ്റൽ അറസ്റ്റ്' വഴിയാണ് ഇവരെ ഇതിന് പ്രേരിപ്പിച്ചതെന്ന് വ്യക്തമായത്. 1.27 കോടി രൂപയുടെ സ്ഥിരനിക്ഷേപവും സമ്പാദ്യവുമാണ് ഇവർക്കുണ്ടായിരുന്നത്.

അംഗീകാരം: ജീവനക്കാരുടെ മനസ്സാന്നിധ്യത്തെ പിഎൻബി സോണൽ ജനറൽ മാനേജർ ദീപക് സിംഗ് പ്രശംസിച്ചു. വലിയ തുകകൾ പിൻവലിക്കുമ്പോഴും കൈമാറുമ്പോഴും ആർബിഐ (RBI) നിർദ്ദേശിച്ച സുരക്ഷാ മാനദണ്ഡങ്ങൾ പാലിച്ചതിനാലാണ് ഇത്രയും വലിയൊരു തട്ടിപ്പ് തടയാനായതെന്ന് അദ്ദേഹം വ്യക്തമാക്കി. സൈബർ തട്ടിപ്പുകാർ പലപ്പോഴും മുതിർന്ന പൗരന്മാരെയാണ് ലക്ഷ്യമിടുന്നതെന്നും പൊതുജനങ്ങൾ ജാഗ്രത പാലിക്കണമെന്നും പോലീസ് അറിയിച്ചു.