കൈരളി ബ്രിസ്‌ബേൻ 2025-2026: തോമസ് കാച്ചപ്പള്ളി നയിക്കുന്ന പുതിയ നേതൃത്വം ചുമതലയേറ്റു.

യുകെ;ബ്രിസ്‌ബേനിലെ പ്രമുഖ മലയാളി സംഘടനയായ കൈരളി ബ്രിസ്‌ബേൻ 2025-2026 വർഷത്തേക്കുള്ള പുതിയ കമ്മിറ്റിക്ക് ഔദ്യോഗികമായി രൂപം നൽകി. പുതിയ നേതൃത്വസംഘത്തിന്റെ അമരക്കാരനായി തോമസ് കാച്ചപ്പള്ളി പ്രസിഡന്റായി ചുമതലയേറ്റു.

തോമസ് കാച്ചപ്പള്ളിയോടൊപ്പം ജിജോ കുമ്പിക്കൽ ജോർജ്ജ് (സെക്രട്ടറി), മഹേഷ് സ്‌കറിയ (ട്രഷറർ), സിബിൻ ജോസ് (വൈസ് പ്രസിഡണ്ട്), അശ്വിനി പോൾ (ജോയിന്റ് സെക്രട്ടറി), ഷിബു പോൾ (ജോയിന്റ് ട്രഷറർ), അരവിന്ദ് കെ.എം (പി.ആർ.ഒ) എന്നിവരും, എക്സിക്യൂട്ടീവ് കമ്മിറ്റി അംഗങ്ങളായി മാധവ് സുരേഷ് മേനോൻ, അബിൻ സോജൻ, ഡെയ്‌സി പാണ്ടിമറ്റം, മാത്യു പുന്നോളിൽ, ലാലി ചാക്കൂ, ഡോറിൻ ജോർജ്, ബ്രിജേഷ് ഫ്രാൻസിസ് എന്നിവരും അടുത്ത ഒരു വർഷത്തേക്ക് സംഘടനയെ നയിക്കാൻ സന്നദ്ധരായി ചുമതലയേറ്റു.

കേരളത്തിന്റെ സമ്പന്നമായ സാംസ്കാരിക പൈതൃകം ആഘോഷിക്കുകയും സംരക്ഷിക്കുകയും ചെയ്യുന്നതിനോടൊപ്പം, ബ്രിസ്‌ബേൻ മലയാളി സമൂഹത്തിൽ ഐക്യവും സജീവ പങ്കാളിത്തവും പ്രോത്സാഹിപ്പിക്കുക എന്നതാണ് പുതിയ കമ്മിറ്റിയുടെ മുഖ്യ ലക്ഷ്യം. ഓണം, പുതുവത്സരാഘോഷങ്ങൾ പോലുള്ള വാർഷിക സാമൂഹിക സാംസ്കാരിക പരിപാടികളിലൂടെയും, ഫുട്ബോൾ ടൂർണമെന്റുകൾ, പരമ്പരാഗത വള്ളംകളി പോലുള്ള കായിക മത്സരങ്ങളിലൂടെയും, യുവതലമുറയ്ക്കായി യൂത്ത് ഫെസ്റ്റിവൽ പോലുള്ള പരിപാടികളിലൂടെയും യുവജനങ്ങളുടെ കഴിവുകൾ വളർത്താനും കൂട്ടായ്മയെ ശക്തിപ്പെടുത്താനും കൈരളി ബ്രിസ്‌ബേൻ മുൻഗണന നൽകുന്നു.

വിനോദം, സമൂഹ പങ്കാളിത്തം എന്നിവയും കമ്മറ്റിയുടെ മുഖ്യ ലക്ഷ്യങ്ങളാണ്. ബ്രിസ്‌ബേൻ ഫ്യൂഷൻ ഫെസ്റ്റിവൽ പോലുള്ള പ്രോഗ്രാമുകൾ സമൂഹത്തെ ആകർഷിക്കുകയും, മറ്റ് സംസ്കാരങ്ങളെ അടുത്തറിയാനുള്ള അവസരങ്ങൾ ഒരുക്കുകയും ചെയ്യുന്നു. ആഘോഷങ്ങൾക്ക് പുറമെ, ബ്രിസ്‌ബേൻ മലയാളി സമൂഹത്തിലെ ബന്ധങ്ങളെ ശക്തിപ്പെടുത്താനും, സന്നദ്ധപ്രവർത്തനങ്ങളെ പ്രോത്സാഹിപ്പിക്കാനും, പുതുതലമുറയ്ക്ക് നേതൃത്വപരമായ കഴിവുകൾ വികസിപ്പിക്കാനുള്ള വേദി നൽകാനും സംഘടന പ്രതിജ്ഞാബദ്ധമാണ്.

വിദേശത്തുള്ള ഓരോ തലമുറയിലെ കണ്ണികളെയും ഒരുമിപ്പിച്ച് കേരളത്തിന്റെ സാംസ്‌കാരിക പൈതൃകം സംരക്ഷിക്കുകയാണ് കൈരളി ബ്രിസ്‌ബേന്റെ ലക്ഷ്യം. പാരമ്പര്യത്തെ ആദരിക്കുകയും, യുവജനങ്ങളെ പ്രചോദിപ്പിക്കുകയും, സാംസ്കാരിക സമൃദ്ധിയുള്ള സമൂഹബന്ധങ്ങളെ ശക്തിപ്പെടുത്തുകയും ചെയ്യുന്നതിൽ ഈ പുതിയ നേതൃത്വം തുടർച്ചയായി പ്രതിജ്ഞാബദ്ധരാണ്.