'ഈദ് അൽ ഇത്തിഹാദിന്റെ' അവിസ്മരണീയ അവധിക്കാലത്തിന്‌ കണ്ണും നട്ട് പ്രവാസികൾ..!

ദുബായ് ;ഈ വർഷം യുഎഇയിൽ ഇനി ബാക്കിയുള്ളത് 'ഈദ് അൽ ഇത്തിഹാദിന്റെ' (ദേശീയ ദിനാഘോഷം) പൊതു അവധി മാത്രമാണ്.

സർക്കാർ-സ്വകാര്യ മേഖലകളിലെ അവധി ദിവസങ്ങൾ ഔദ്യോഗികമായി പ്രഖ്യാപിച്ചിട്ടില്ലെങ്കിലും ഈ വർഷം നാലോ അഞ്ചോ ദിവസത്തെ അവധി ലഭിക്കാൻ സാധ്യതയുണ്ട്. വർഷാവസാനം അവധിക്കുവേണ്ടി കാത്തിരിക്കുന്നവർക്ക് സന്തോഷവാർത്തയാണിത്.

ബാക്കിയുള്ള വാർഷിക അവധി ദിവസങ്ങൾ കൂടി ഉപയോഗിച്ച് നീണ്ട അവധി ആഘോഷിക്കാനും അവസരമുണ്ടാകും. ദേശീയ ദിനാഘോഷമായ ഈദ് അൽ ഇത്തിഹാദ് ഡിസംബർ 2, 3 തീയതികളിലാണ്. ഇത് ആഴ്ചയുടെ മധ്യത്തിൽ വരുന്നതിനാൽ തിങ്കളാഴ്ചയും അവധിയായി പ്രഖ്യാപിക്കാൻ സാധ്യതയുണ്ട്. അങ്ങനെ സംഭവിച്ചാൽ വാരാന്ത്യവും (ശനി, ഞായർ), അവധി ദിവസങ്ങളായ തിങ്കൾ, ചൊവ്വ, ബുധൻ എന്നിവയും ചേർന്ന് അഞ്ച് ദിവസത്തെ നീണ്ട അവധി ലഭിച്ചേക്കാം.

അതേസമയം, യുഎഇ കാബിനറ്റ് റെസല്യൂഷൻ പ്രകാരം ഈദ് അവധികളൊഴികെ മറ്റ് പൊതു അവധികൾ വാരാന്ത്യത്തിനടുത്തേക്ക് മാറ്റാൻ സാധ്യതയുണ്ട്. അങ്ങനെ വന്നാൽ ഡിസംബർ മൂന്നിന്റെ അവധി തിങ്കളാഴ്ചയിലേക്ക് മാറ്റി നാല് ദിവസത്തെ അവധി ലഭിക്കാനും സാധ്യതയുണ്ട്. വാർഷിക അവധിയിൽ നിന്ന് രണ്ട് ദിവസം മാത്രം ലീവെടുത്ത് തുടർച്ചയായി ഒൻപത് ദിവസത്തെ അവധി ആസ്വദിക്കാൻ സാധിക്കും.

ഇതിനായി അവധിയെടുക്കേണ്ട ദിവസങ്ങൾ: ഡിസംബർ 4 (വ്യാഴം), ഡിസംബർ 5 (വെള്ളി). ലഭിക്കുന്ന അവധി: നവംബർ 29 (ശനി) മുതൽ ഡിസംബർ 7 (ഞായർ) വരെ. 

പൊതു അവധിയുടെ മുൻപും ശേഷവുമുള്ള ദിവസങ്ങളിൽ വാർഷിക അവധിയെടുത്ത് വാരാന്ത്യങ്ങൾ കൂടി ഉൾപ്പെടുത്തി വലിയ അവധിയാക്കി മാറ്റുന്ന ‘സാൻഡ്‌വിച്ച് ലീവ്’ രീതിയാണിത്. ഇത് ശനിയും ഞായറുമാണ് വാരാന്ത്യമെങ്കിൽ മാത്രം ബാധകമാകുന്ന സാധ്യത മാത്രമാണ്. അവസാന തീരുമാനം കമ്പനിയുടെ അവധി നയങ്ങൾക്കനുസരിച്ചായിരിക്കും.