ജലജീവൻമിഷൻ ഉദ്ഘാടനം; 45 കോടി രൂപയുടെ വികസനപദ്ധതികളിലൂടെ മരങ്ങാട്ടുപിള്ളിയിൽ ശുദ്ധജല സ്വപ്നം യാഥാർത്ഥ്യമായി

മരങ്ങാട്ടുപിള്ളി: ഗ്രാമീണ ശുദ്ധജല വിതരണത്തിന് പുതുചൈതന്യം പകർന്നുകൊണ്ട് ജലജീവൻമിഷൻ പദ്ധതിയുടെ ഉദ്ഘാടനവും, ലൈഫ് ഭവന പദ്ധതിയുടെ താക്കോൽദാനവും, മഴവെള്ളസംഭരണികളുടെ ഉദ്ഘാടനവും മരങ്ങാട്ടുപിള്ളിയിൽ നടന്നു.

സമ്മേളനം ജലവകുപ്പ് മന്ത്രി റോഷി അഗസ്റ്റിൻ ഉദ്ഘാടനം ചെയ്തു. “കേന്ദ്രസർക്കാർ സഹായത്തോടെ നടപ്പാക്കുന്ന ജലജീവൻമിഷൻ വഴി ലക്ഷക്കണക്കിന് ഗ്രാമഭവനങ്ങളിൽ ശുദ്ധജലം എത്തിക്കാൻ സാധിച്ചതാണ് സംസ്ഥാനത്തിന്റെ പ്രധാന നേട്ടങ്ങളിൽ ഒന്ന്,” മന്ത്രി പ്രസംഗത്തിൽ വ്യക്തമാക്കി.

മോൻസ് ജോസഫ് എം.എൽ.എ അധ്യക്ഷത വഹിച്ചു. ഫ്രാൻസിസ് ജോർജ് എം.പി ലൈഫ് ഭവനങ്ങളുടെ താക്കോൽമാറ്റം നിർവഹിച്ചു. ബ്ലോക്ക് പഞ്ചായത്ത് പ്രസിഡന്റ് രാജു ജോൺ ചിറ്റേത്ത്, ഗ്രാമപഞ്ചായത്ത് പ്രസിഡന്റ് ബെൽജി ഇമ്മാനുവൽ, ജില്ലാപഞ്ചായത്ത് സ്ഥിരംസമിതി അധ്യക്ഷൻ പി.എം. മാത്യു, വൈസ് പ്രസിഡന്റ് ഉഷാ രാജു, ബ്ലോക്ക് മെമ്പർ ജോൺസൺ ജോസഫ് പുളിക്കൽ, സ്ഥിരംസമിതി അധ്യക്ഷന്മാരായ തുളസിദാസ്,

ജാൻസി ടോജോ, മെമ്പർമാരായ സന്തോഷ് കുമാർ എം.എൻ, പ്രസീദ സജീവ്, നിർമല ദിവാകരൻ, ലിസി ജോർജ്, സലിമോൾ ബെന്നി, ബെനറ്റ് പി. മാത്യു, ജോസഫ് ജോസഫ്, ലിസി ജോയ്, സാബു അഗസ്റ്റ്യൻ, സെക്രട്ടറി രേഖ ബി. നായർ എന്നിവർ പ്രസംഗിച്ചു.

ലൈഫ് പദ്ധതികളും മാലിന്യസംസ്‌കരണ പ്രവർത്തനങ്ങളും മികച്ച രീതിയിൽ നടപ്പാക്കിയ വി.ഇ.ഒമാരായ സുനിൽ എ.പിയും അനീഷ് ലത്തീഫ്യും ചടങ്ങിൽ ആദരിക്കപ്പെട്ടു.

ജലക്ഷാമം പരിഹരിക്കുന്നതിനായി 14 വാർഡുകളിലായി നിരവധി പദ്ധതികൾ നടപ്പിലാക്കിയതായി പഞ്ചായത്ത് പ്രസിഡന്റ് അറിയിച്ചു. ജലനിധി പദ്ധതികളുടെ അറ്റകുറ്റപ്പണികൾക്കായി 62 ലക്ഷം, ജലവിഭവ വകുപ്പിന്റെ 35 മഴവെള്ളസംഭരണികൾക്കായി 31.5 ലക്ഷം, പാലക്കാട്ടുമല ചിറക്കുളം നവീകരണത്തിന് 45 ലക്ഷം, നാലാം വാർഡിൽ കവർസ്ലാബ് നടപ്പാതയ്ക്കായി 20 ലക്ഷം ഉൾപ്പെടെ 1.58 കോടി രൂപ സർക്കാർ അനുവദിച്ചു.

ജലജീവൻമിഷന്റെ ഭാഗമായി പടിക്കുഴ ഹോമിയോ ആശുപത്രിക്ക് സമീപം 6.25 ലക്ഷം ലിറ്റർ, പാലക്കാട്ടുമലയിൽ 5 ലക്ഷം ലിറ്റർ മഴവെള്ളസംഭരണികളും, 133.38 കിലോമീറ്റർ പൈപ്പ്‌ലൈൻ, 3843 ഗാർഹിക കണക്ഷൻ ഉൾപ്പെടെ 45.39 കോടി രൂപയുടെ നിർമ്മാണ ജോലികൾ പുരോഗമിക്കുകയാണെന്ന് പഞ്ചായത്ത് പ്രസിഡന്റ് കൂട്ടിച്ചേർത്തു.