വിൻഡ് ഫാം ശബ്ദമലിനീകരണം: നാല് പരാതിക്കാർക്ക് ₹2.6 കോടിയിലധികം നഷ്ടപരിഹാരം

 ഡബ്ലിൻ: അയർലൻഡിലെ വിൻഡ് ഫാം പ്രവർത്തിക്കുന്നതുമൂലമുണ്ടായ ശബ്ദമലിനീകരണത്തിന്റെ പേരിൽ ഹൈക്കോടതിയെ സമീപിച്ച നാല് പേർക്ക്, വിൻഡ് ഫാം ഓപ്പറേറ്റർ നഷ്ടപരിഹാരമായി €3,00,000-ലധികം (ഏകദേശം 2.6 കോടിയിലധികം രൂപ) നൽകണമെന്ന് കോടതി ഉത്തരവിട്ടു. വിൻഡ് ടർബൈനുകൾ സൃഷ്ടിക്കുന്ന ശല്യം (Nuisance) സംബന്ധിച്ച് അയർലൻഡിലോ യുകെയിലോ നടന്ന ആദ്യത്തെ സ്വകാര്യ കേസാണിത്.

കഴിഞ്ഞ വർഷം പുറപ്പെടുവിച്ച സുപ്രധാന വിധിയിൽ, എൻസ്കോർട്ടിന് സമീപം കിൽകോമ്പിലെ ബാലിഡഫ് വിൻഡ് ഫാമിന്റെ രണ്ട് ടർബൈനുകളിൽ നിന്നുള്ള ശബ്ദം, അടുത്തുള്ള രണ്ട് വസ്തുക്കളുടെ സുഖകരമായ ഉപയോഗത്തിന് 'അന്യായമായ തടസ്സം' സൃഷ്ടിക്കുന്നുവെന്ന് ജസ്റ്റിസ് എമിലി ഈഗൻ കണ്ടെത്തിയിരുന്നു.

ഡബ്ലിനിലെ മീനക്ലോഗ്സ്പർ (വിൻഡ്) ലിമിറ്റഡിനെതിരെയാണ് പരാതിക്കാർ കോടതിയെ സമീപിച്ചത്.

പരാതിയും വിധി വിശദാംശങ്ങളും

വിൻഡ് ഫാം ഓപ്പറേറ്റർക്കെതിരെ നിയമനടപടി സ്വീകരിച്ച നാല് പ്രധാന പരാതിക്കാരാണ് ഈ കേസിൽ നഷ്ടപരിഹാരത്തിന് അർഹരായത്. വിൻഡ് ഫാമിന് അടുത്തുള്ള വീട്ടിൽ താമസിച്ചിരുന്ന മുൻ പങ്കാളികളായ മാർഗരറ്റ് വെബ്സ്റ്ററും കീത്ത് റോളോയുമാണ് ആദ്യത്തെ കേസിലെ പരാതിക്കാർ. ടർബൈനുകൾക്ക് സമീപം വസ്തുവുണ്ടായിരുന്ന, എന്നാൽ 2021-ൽ അത് വിറ്റ, റോസ് ഷോർട്ടൻ, ജോവാൻ കാർത്തി എന്നിവരാണ് രണ്ടാമത്തെ കേസിലെ പരാതിക്കാർ. വെബ്സ്റ്ററിന്, വിൻഡ് ഫാം പ്രവർത്തിച്ചു തുടങ്ങിയതുമുതൽ നഷ്‌ടം സഹിച്ച ഓരോ വർഷത്തിനും €10,000 വീതം ജനറൽ ഡാമേജായി നൽകാൻ കോടതി വിധിച്ചു, ഇത് നിലവിൽ €87,500 വരും; കോടതിയുടെ നിയന്ത്രണ ഉത്തരവ് നിലവിൽ വരുന്നത് വരെ അവർക്ക് തുടർന്നും നഷ്ടപരിഹാരത്തിന് അർഹതയുണ്ട്. ശബ്ദമലിനീകരണം കാരണം വിഷാദവും ഉറക്കക്കുറവും അനുഭവിക്കുകയും 2021 മാർച്ചിൽ വീട് വിട്ടുപോകുകയും ചെയ്ത കീത്ത് റോളോയ്ക്ക്, വീട് വിട്ടുപോയതുവരെയുള്ള കാലയളവിലേക്ക് ഓരോ വർഷത്തിനും €18,500 വീതം, ആകെ €77,000 ലഭിക്കും. ടർബൈനുകൾക്ക് സമീപമുള്ള വസ്തു വിനോദസഞ്ചാരത്തിനും വിരമിക്കലിനുമായി ഉപയോഗിക്കാൻ ഉദ്ദേശിച്ചിരുന്ന റോസ് ഷോർട്ടനും ജോവാൻ കാർത്തിക്കും ഓരോരുത്തർക്കും €34,000 വീതം ജനറൽ ഡാമേജായി ലഭിക്കും.

ശബ്ദശല്യം കാരണം വസ്തുക്കൾക്കുണ്ടായ മൂല്യത്തകർച്ചയുടെ പേരിൽ ഷോർട്ടനും കാർത്തിക്കും വിറ്റ വസ്തുവിന് €55,000-വും വെബ്സ്റ്റർക്കും റോളോയ്ക്കും €30,000-വും അധിക നഷ്ടപരിഹാരമായി കോടതി അനുവദിച്ചു. എന്നാൽ, ശബ്ദമലിനീകരണം മൂലമുണ്ടായ 'ക്ഷീണം, നിരാശ, നിസ്സഹായത' എന്നിവ ബന്ധം തകരുന്നതിന് കാരണമായെന്ന റോളോയുടെ വാദം ജഡ്ജി പൂർണ്ണമായി അംഗീകരിച്ചില്ല; ബന്ധം വേർപിരിഞ്ഞതിന് പൂർണ്ണ ഉത്തരവാദിത്തം ശബ്ദശല്യമാണെന്ന് സ്ഥാപിക്കാൻ മതിയായ തെളിവുകളില്ലെന്ന് കോടതി നിരീക്ഷിച്ചു. ദമ്പതികൾ വേർപിരിഞ്ഞതിനാലാണ് റോളോയ്ക്ക് വീട്ടിലേക്ക് തിരിച്ചുപോകാൻ കഴിയാത്തതെന്നും, ശബ്ദശല്യം കാരണമല്ലെന്നും നിരീക്ഷിച്ച കോടതി, വാടകച്ചെലവുകൾക്കുള്ള നഷ്ടപരിഹാര ആവശ്യം നിഷേധിക്കുകയും ചെയ്തു.

മെയ് മാസത്തിൽ, ജസ്റ്റിസ് ഈഗൻ വിൻഡ് ഫാമിന്റെ പ്രവർത്തനത്തിന് നിയന്ത്രണങ്ങൾ ഏർപ്പെടുത്തിക്കൊണ്ട് ഇൻജംഗ്ഷൻ ഉത്തരവിട്ടിരുന്നു. ഇതിൽ ഒരു ടർബൈൻ ചില സമയങ്ങളിൽ പൂർണ്ണമായും അടച്ചിടാനുള്ള നിർദ്ദേശവും ഉൾപ്പെടുന്നു.