ഡിസി വെടിവെപ്പ്;പ്രതി അഫ്ഗാൻ പൗരൻ; വെടിയേറ്റ ഗാർഡ് അംഗങ്ങൾ അതീവ ഗുരുതരം

 വാഷിംഗ്ടൺ ഡിസി: യുഎസ് തലസ്ഥാനത്ത് രണ്ട് നാഷണൽ ഗാർഡ് അംഗങ്ങൾക്ക് നേരേ വെടിവെപ്പ് നടത്തിയ പ്രതിയെ തിരിച്ചറിഞ്ഞു. ഓപ്പറേഷൻ അല്ലൈസ് വെൽക്കം (Operation Allies Welcome) പദ്ധതി പ്രകാരം 2021-ൽ യുഎസിൽ എത്തിയ 29-കാരനായ അഫ്ഗാൻ പൗരൻ റഹ്മാനുല്ല ലക്കാൻവാൾ ആണ് പ്രതി.

ഭീകരാക്രമണ സാധ്യത

ഈ ആക്രമണം ഭീകരവാദ പ്രവർത്തനമായി കണക്കാക്കിയാണ് അന്വേഷിക്കുന്നതെന്ന് ജസ്റ്റിസ് ഡിപ്പാർട്ട്‌മെന്റ് വൃത്തങ്ങളെ ഉദ്ധരിച്ച് സിഎൻഎൻ റിപ്പോർട്ട് ചെയ്തു.ആക്രമണം നടക്കുമ്പോൾ ലക്കാൻവാൾ വിസ കാലാവധി കഴിഞ്ഞതിനെ തുടർന്ന് അനധികൃതമായി രാജ്യത്ത് താമസിക്കുകയായിരുന്നുവെന്നും റിപ്പോർട്ടിൽ പറയുന്നു.ഇയാളുടെ കുടിയേറ്റ നിലയും യുഎസിലേക്കുള്ള പ്രവേശന സാഹചര്യവും സംഭവത്തിന് തൊട്ടുപിന്നാലെ തന്നെ രാഷ്ട്രീയ ചർച്ചകൾക്ക് വഴി തുറന്നിട്ടുണ്ട്.

ആക്രമണത്തിന്റെ രീതി

ഫാറാഗട്ട് വെസ്റ്റ് മെട്രോ സ്റ്റേഷന് സമീപം കാത്തുനിന്ന ലക്കാൻവാൾ പ്രാദേശിക സമയം ഉച്ചയ്ക്ക് 2:15 ഓടെയാണ് വെടിവെപ്പ് നടത്തിയതെന്നാണ് നിയമപാലകരെ ഉദ്ധരിച്ചുള്ള റിപ്പോർട്ടുകൾ.ഇയാൾ കോണിലൂടെ നടന്നു വന്ന് വളരെ അടുത്ത് നിന്ന് വെടിയുതിർക്കുകയായിരുന്നു. ആദ്യം ഒരു വനിതാ ഗാർഡ് അംഗത്തിന് നെഞ്ചിലും തുടർന്ന് തലയ്ക്കും വെടിയേറ്റു.പിന്നീട് രണ്ടാമത്തെ ഗാർഡിന് നേരേ തിരിഞ്ഞ് വെടിയുതിർത്തു. ഈ സമയം സമീപത്തുണ്ടായിരുന്ന മൂന്നാമതൊരു ഗാർഡ് ഇടപെട്ട് പ്രതിയെ കീഴടക്കുകയായിരുന്നു.ഗുരുതരമായി പരിക്കേറ്റ രണ്ട് ഗാർഡ് അംഗങ്ങളെയും ഉടൻ ആശുപത്രിയിൽ പ്രവേശിപ്പിച്ചു. ഇവർ ഇപ്പോഴും അതീവ ഗുരുതരാവസ്ഥയിൽ തുടരുകയാണ്.

പ്രതിയുടെ പശ്ചാത്തലം

അഫ്ഗാനിസ്ഥാനിൽ താലിബാൻ അധികാരം പിടിച്ചെടുത്തതിനെ തുടർന്ന് ബൈഡൻ ഭരണകൂടം ആരംഭിച്ച പുനരധിവാസ പദ്ധതിയായ 'ഓപ്പറേഷൻ അല്ലൈസ് വെൽക്കം' വഴിയാണ് ലക്കാൻവാൾ യുഎസിൽ എത്തിയത്. വാഷിംഗ്ടൺ സ്റ്റേറ്റിലെ ബെല്ലിംഗ്ഹാമിലാണ് ഇയാളെ പുനരധിവസിപ്പിച്ചത്.അധികൃതർക്ക് ഇതുവരെ ആക്രമണത്തിന്റെ ലക്ഷ്യം കണ്ടെത്താനായിട്ടില്ല. ഇയാൾ ഒറ്റയ്ക്കാണ് പ്രവർത്തിച്ചതെന്നാണ് പോലീസ് നിഗമനം.മൂന്നാമത്തെ ഗാർഡുമായുള്ള ഏറ്റുമുട്ടലിൽ ലക്കാൻവാളിന് നാല് തവണ വെടിയേറ്റു.

തെളിവെടുപ്പും അന്വേഷണവും:

ലക്കാൻവാളിന്റെ നീക്കങ്ങൾ, ബന്ധങ്ങൾ, വ്യക്തിപരമായ ചരിത്രം എന്നിവ അന്വേഷണ സംഘം വിശദമായി പരിശോധിച്ചുവരികയാണ്. ആക്രമണം ആകസ്മികമായി സംഭവിച്ചതാണോ അതോ ആസൂത്രിതമായിരുന്നോ എന്നും അന്വേഷിക്കുന്നുണ്ട്.

പരിക്കേറ്റ നിലയിൽ വസ്ത്രമില്ലാതെ ലക്കാൻവാൾ നിലത്ത് കിടക്കുന്ന ചിത്രം സമൂഹമാധ്യമങ്ങളിൽ പ്രചരിക്കുന്നുണ്ടെങ്കിലും, ഈ ചിത്രത്തിന്റെ ആധികാരികത പോലീസ് സ്ഥിരീകരിച്ചിട്ടില്ല. സ്ഥിരീകരിക്കാത്ത വിവരങ്ങളും ചിത്രങ്ങളും പ്രചരിപ്പിക്കുന്നത് ഒഴിവാക്കണമെന്ന് അധികൃതർ പൊതുജനങ്ങളോട് അഭ്യർത്ഥിച്ചു.

പ്രതിയും പരിക്കേറ്റ ഗാർഡ് അംഗങ്ങളും ആശുപത്രിയിൽ തുടരുന്ന സാഹചര്യത്തിൽ, ആക്രമണത്തിന്റെ ലക്ഷ്യവും സാഹചര്യങ്ങളും സംബന്ധിച്ച അന്വേഷണം ഊർജിതമായി മുന്നോട്ട് പോവുകയാണ്. തലസ്ഥാനത്ത് സുരക്ഷ ശക്തമാക്കിയിട്ടുണ്ട്.