കപ്പൽ നിർമ്മാണത്തിൽ ഇന്ത്യ-കൊറിയ സഹകരണം: ആഗോള വിപണി ലക്ഷ്യമിട്ട് സംയുക്ത സംരംഭത്തിന് നീക്കം

ന്യൂഡൽഹി: കൊറിയയുടെ നൂതന കപ്പൽ നിർമ്മാണ സാങ്കേതികവിദ്യയും ഇന്ത്യയുടെ ഉത്പാദന ശേഷിയും കുറഞ്ഞ ചിലവും സംയോജിപ്പിച്ചുകൊണ്ട് ഇരു രാജ്യങ്ങൾക്കും ആഗോള കപ്പൽ വിപണിക്കും പ്രയോജനകരമായ പങ്കാളിത്തത്തിന് ഇന്ത്യയും ദക്ഷിണ കൊറിയയും തമ്മിൽ ചർച്ചകൾ നടന്നു.

ഇന്ത്യൻ പെട്രോളിയം, പ്രകൃതിവാതക മന്ത്രി ഹർദീപ് സിംഗ് പുരി, കൊറിയയിലെ പ്രമുഖ ഷിപ്പിംഗ് കമ്പനികളുടെ മേധാവികളുമായി നടത്തിയ കൂടിക്കാഴ്ചയ്ക്ക് ശേഷം ഇക്കാര്യം സമൂഹമാധ്യമങ്ങളിലൂടെ പങ്കുവെച്ചു. ഈ പങ്കാളിത്തം ഇന്ത്യയുടെ വർധിച്ചുവരുന്ന കപ്പൽ ആവശ്യകതകൾ നിറവേറ്റുന്നതിനും ആഗോള വിപണികൾക്ക് സേവനം നൽകുന്നതിനും സഹായകമാകുമെന്ന് മന്ത്രി അഭിപ്രായപ്പെട്ടു. സമുദ്രമാർഗ്ഗം 150 ബില്യൺ ഡോളറിലധികം മൂല്യമുള്ള ക്രൂഡ് ഓയിലും വാതകവും ഇന്ത്യ ഇറക്കുമതി ചെയ്യുന്നുണ്ട്. ഇത് ഊർജ്ജ-ഷിപ്പിംഗ് ആവശ്യങ്ങൾക്കായുള്ള വലിയ  ഡിമാന്റ് ആണ് സസൂചിപ്പിക്കുന്നത് 

 ഷിപ്പിംഗ് മേഖലയിലെ സാധ്യതകൾ

പരിമാണത്തിൻ്റെ അടിസ്ഥാനത്തിൽ ഇന്ത്യയുടെ മൊത്തം വ്യാപാരത്തിന്റെ ഏകദേശം 28 ശതമാനവും എണ്ണ-വാതക മേഖലയാണ്. എന്നാൽ, ഈ ചരക്കിൻ്റെ 20 ശതമാനം മാത്രമാണ് ഇന്ത്യൻ പതാകയുള്ള അല്ലെങ്കിൽ ഇന്ത്യൻ ഉടമസ്ഥതയിലുള്ള കപ്പലുകൾ വഹിക്കുന്നത്. ക്രൂഡ് ഓയിൽ, എൽ.പി.ജി., എൽ.എൻ.ജി., ഈഥെയ്ൻ എന്നിവയുടെ ആവശ്യം അതിവേഗം വർധിക്കുന്ന പശ്ചാത്തലത്തിൽ, 2034 ഓടെ ഓ.എൻ.ജി.സിക്ക് ഏകദേശം 100 ഓഫ്‌ഷോർ സർവീസ് ആൻഡ് സപ്ലൈ വെസ്സലുകൾ ആവശ്യമായി വരും. ഈ സാഹചര്യത്തിൽ, ആഗോള പങ്കാളിത്തത്തോടെ ഇന്ത്യയിൽ കപ്പലുകൾ നിർമ്മിക്കുന്നതിനുള്ള ശക്തമായ ശ്രമങ്ങളാണ് നടക്കുന്നത്.

മന്ത്രി കൊറിയ ഓഷ്യൻ ബിസിനസ് കോർപ്പറേഷൻ, എസ്.കെ. ഷിപ്പിംഗ്, എച്ച്-ലൈൻ ഷിപ്പിംഗ്, പാൻ ഓഷ്യൻ തുടങ്ങിയ കമ്പനികളുടെ സി.ഇ.ഒമാരുമായി കൂടിക്കാഴ്ച നടത്തി. പ്രധാനമന്ത്രിയുടെ നേതൃത്വത്തിൽ അതിവേഗം വളരുന്ന ഇന്ത്യൻ സമ്പദ്‌വ്യവസ്ഥയുടെ പ്രധാന സ്തംഭങ്ങളാണ് ഊർജ്ജവും ഷിപ്പിംഗുമെന്ന് അദ്ദേഹം വ്യക്തമാക്കി.

 കപ്പൽ നിർമ്മാണ മേഖലയ്ക്ക് വൻ പ്രോത്സാഹനം

സെപ്റ്റംബർ 2025-ൽ സർക്കാർ പ്രഖ്യാപിച്ച 69,725 കോടി രൂപയുടെ കപ്പൽ നിർമ്മാണ, സമുദ്ര പരിഷ്കരണ പദ്ധതികളോടെ ഇന്ത്യയുടെ കപ്പൽ നിർമ്മാണ വ്യവസായം ആഗോള ശ്രദ്ധ നേടാൻ ഒരുങ്ങുകയാണ്.

ഷിപ്പ് ബിൽഡിംഗ് ഫിനാൻഷ്യൽ അസിസ്റ്റൻസ് സ്കീം: 24,736 കോടി രൂപയുടെ ഈ പദ്ധതി ആഭ്യന്തര നിർമ്മാണത്തെയും കപ്പൽ പൊളിക്കലിനെയും പിന്തുണയ്ക്കുന്നു.

മാരിടൈം ഡെവലപ്‌മെൻ്റ് ഫണ്ട്: 25,000 കോടി രൂപയുടെ ഈ ഫണ്ട് നിക്ഷേപത്തിനും പ്രോത്സാഹനങ്ങൾക്കുമാണ് ഊന്നൽ നൽകുന്നത്.

ഷിപ്പ് ബിൽഡിംഗ് ഡെവലപ്‌മെൻ്റ് സ്കീം: 19,989 കോടി രൂപയുടെ ഈ പദ്ധതി കപ്പൽ നിർമ്മാണ ക്ലസ്റ്ററുകൾക്ക് മൂലധന പിന്തുണ, റിസ്ക് കവറേജ്, ശേഷി വർദ്ധിപ്പിക്കൽ എന്നിവ വാഗ്ദാനം ചെയ്യുന്നു.

വളർച്ചയുടെ ചാലകശക്തി

കപ്പൽ നിർമ്മാണത്തെ 'ഹെവി എഞ്ചിനീയറിംഗിൻ്റെ മാതാവ്' എന്നാണ് വിശേഷിപ്പിക്കുന്നത്. കാരണം ഇത് തൊഴിലവസരങ്ങൾ സൃഷ്ടിക്കുകയും നിക്ഷേപം ആകർഷിക്കുകയും ദേശീയ സുരക്ഷ ശക്തിപ്പെടുത്തുകയും ചെയ്യുന്നു. കപ്പൽ നിർമ്മാണത്തിലെ ഓരോ നിക്ഷേപവും തൊഴിലവസരങ്ങളെ 6.4 മടങ്ങ് വർദ്ധിപ്പിക്കുകയും മൂലധനത്തിൻ്റെ 1.8 മടങ്ങ് വരുമാനം നൽകുകയും ചെയ്യുന്നു. വിദൂര, തീരദേശ, ഗ്രാമപ്രദേശങ്ങളിൽ തൊഴിലവസരങ്ങൾ സൃഷ്ടിക്കുന്നതിൽ ഈ വ്യവസായത്തിന് വലിയ സാധ്യതകളുണ്ട്. ഈ മേഖലയുടെ വികസനം ആത്മനിർഭർ ഭാരത് കാഴ്ചപ്പാടിൻ്റെ പ്രധാന ഭാഗമാണ്. സിന്ധുനദീതട സംസ്കാരത്തിലേക്ക് വേരുകളുള്ള ഇന്ത്യയുടെ സമുദ്ര മേഖല, ഗുജറാത്തിലെ ലോഥൽ പോലുള്ള പുരാതന തുറമുഖങ്ങൾ വഴി ആഗോള വ്യാപാര പാതകളുമായി രാജ്യത്തെ ദീർഘകാലമായി ബന്ധിപ്പിക്കുന്നു