ശബരിമല;'കൊള്ളരുതായ്മകൾക്കുള്ള വാതിൽ തുറക്കില്ല' – ടിഡിബി പ്രസിഡന്റ് കെ. ജയകുമാർ

 ആറന്മുള: ശബരിമലയിലെ സ്പോൺസർഷിപ്പ് രീതികൾ "കൊള്ളരുതായ്മകൾക്കുള്ള വാതിൽ തുറന്നുകൊടുക്കാനുള്ള മാർഗമായിരുന്നെങ്കിൽ, ഇനിമുതൽ അതനുവദിക്കില്ല" എന്ന് തിരുവിതാംകൂർ ദേവസ്വം ബോർഡ് (ടി.ഡി.ബി.) പ്രസിഡന്റ് കെ. ജയകുമാർ വ്യക്തമാക്കി. ശബരിമലയിലേക്കുള്ള യാത്രാമധ്യേ, ഞായറാഴ്ച രാവിലെ ആറന്മുള പാർഥസാരഥി ക്ഷേത്രത്തിൽ ദർശനം നടത്തിയശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.

വരുമാനമാർഗം അന്വേഷിക്കും; ഇടനിലക്കാർ വേണ്ട

നിലവിലെ ബോർഡ് ഭരണത്തിൽ കൊള്ളരുതാത്ത പ്രവണതകൾ പൂർണമായി നിരോധിക്കുമെന്നും, ശബരിമലയുമായി ബന്ധപ്പെട്ട സ്‌പോൺസർഷിപ്പുകൾ കർശനമായ പരിശോധനയ്ക്ക് വിധേയമാക്കുമെന്നും ജയകുമാർ അറിയിച്ചു.

"ഇവിടെ സ്പോൺസർമാരായി വരുന്നവർ ആരാണെന്നും, അവരുടെ വരുമാനമാർഗം എന്താണെന്നും ഞങ്ങൾ അന്വേഷിക്കും. ഇതൊന്നും അറിയാതെ ഭഗവാനുവേണ്ടി എന്തെങ്കിലും കൊണ്ടുവന്നാൽ വാങ്ങിക്കേണ്ടതില്ല."

ഭക്തരുടെ സംഭാവനകളും സ്പോൺസർഷിപ്പുകളും ബോർഡ് സ്വീകരിക്കും. എന്നാൽ, ഇടനിലക്കാർ വേണ്ടെന്നും സ്പോൺസർമാർ നേരിട്ട് ബോർഡുമായി ബന്ധപ്പെടണമെന്നും അദ്ദേഹം നിർബന്ധം വ്യക്തമാക്കി.

അന്വേഷണവുമായി പൂർണ്ണ സഹകരണം

ശബരിമലയിലെ നിലവിലെ സംഭവവികാസങ്ങളെക്കുറിച്ച് നടക്കുന്ന അന്വേഷണങ്ങളോടും അന്വേഷണ സംഘത്തോടും പൂർണ്ണമായും സഹകരിക്കുമെന്നും ദേവസ്വം ബോർഡ് പ്രസിഡന്റ് കൂട്ടിച്ചേർത്തു.

"ദേവസ്വം ബോർഡ്, തീർഥാടകർക്കുവേണ്ടി തീർഥാടകരാൽ നടത്തുന്ന സംവിധാനമാക്കും." – കെ. ജയകുമാർ പറഞ്ഞു.

ഇതുവരെ സൗമ്യനായ ഉദ്യോഗസ്ഥനായാണ് അറിയപ്പെട്ടിരുന്നതെങ്കിലും, ഈ പുതിയ നിയോഗത്തിൽ ശബരിമലയുടെ വിശുദ്ധി നിലനിർത്താൻ അൽപ്പം കാർക്കശ്യം ആവശ്യമാണെന്നും അദ്ദേഹം ഊന്നിപ്പറഞ്ഞു.