റഷ്യൻ ക്രൂഡ് ഓയിൽ ഇറക്കുമതി: ഇന്ത്യ രണ്ടാം സ്ഥാനത്ത്

 ന്യൂഡൽഹി: റഷ്യൻ ക്രൂഡ് ഓയിൽ വാങ്ങുന്നതിൽ ഇന്ത്യ ചൈനയ്ക്ക് പിന്നിൽ രണ്ടാം സ്ഥാനം നിലനിർത്തിയതായി യൂറോപ്യൻ തിങ്ക് ടാങ്കിന്റെ റിപ്പോർട്ട്. യുക്രെയ്ൻ യുദ്ധത്തിന്റെ പശ്ചാത്തലത്തിൽ റഷ്യയുടെ പ്രധാന എണ്ണ ഉത്പാദകരായ റോസ്നെഫ്റ്റ്, ലുക്കോയിൽ എന്നിവർക്കെതിരെ ഒക്ടോബർ 22-ന് യുഎസ് ഉപരോധം ഏർപ്പെടുത്തിയിരുന്നു.

എനർജി ആൻഡ് ക്ലീൻ എയർ റിസർച്ച് സെന്റർ (CREA) നവംബർ 13-ന് പുറത്തിറക്കിയ പ്രതിമാസ റിപ്പോർട്ടിലാണ് ഈ വിവരങ്ങൾ. ഒക്ടോബറിൽ ഇന്ത്യ റഷ്യൻ ക്രൂഡിനായി 2.9 ബില്യൺ ഡോളർ (ഏകദേശം 24,000 കോടി രൂപ) ചെലവഴിച്ചു. ഇത് റഷ്യയിൽ നിന്നുള്ള ഇന്ത്യയുടെ മൊത്തം ഫോസിൽ ഇന്ധന വാങ്ങലുകളുടെ 81% വരും.

 ഇറക്കുമതിയിൽ വർദ്ധനവ്

ഒക്ടോബറിൽ ഇന്ത്യയിലേക്കുള്ള റഷ്യൻ ക്രൂഡ് ഇറക്കുമതി മുൻ മാസത്തെ അപേക്ഷിച്ച് 11% വർദ്ധനവ് രേഖപ്പെടുത്തി. മൊത്തം ഇറക്കുമതിയിൽ 8% വർദ്ധനവാണ് രേഖപ്പെടുത്തിയത്.ഇന്ത്യയുടെ മൊത്തം ഇറക്കുമതിയുടെ മൂന്നിൽ രണ്ട് ഭാഗവും സ്വകാര്യ റിഫൈനറികൾ വഴിയാണ് നടന്നതെങ്കിലും, സർക്കാർ ഉടമസ്ഥതയിലുള്ള റിഫൈനറികൾ ഒക്ടോബറിൽ റഷ്യയിൽ നിന്നുള്ള അളവ് ഇരട്ടിയാക്കി.കഴിഞ്ഞ ഒക്ടോബറിൽ ശരാശരി 1.8 ദശലക്ഷം ബാരൽ റഷ്യൻ എണ്ണയാണ് ഒരു ദിവസം ഇന്ത്യയിൽ എത്തിയിരുന്നത്. (സെപ്റ്റംബറിൽ ഇന്ത്യയുടെ എണ്ണ ഇറക്കുമതിയുടെ 34% റഷ്യയിൽ നിന്നായിരുന്നു - Kpler ഡാറ്റ പ്രകാരം).

വടിനാർ റിഫൈനറി ശ്രദ്ധയിൽ

ഗുജറാത്തിലെ വടിനാർ റിഫൈനറി, റോസ്നെഫ്റ്റിന് ഭാഗികമായി ഉടമസ്ഥതയുള്ളതും യൂറോപ്യൻ യൂണിയന്റെ ഉപരോധം നേരിടുന്നതുമാണ്. ഈ റിഫൈനറി ഒക്ടോബറിൽ ഉത്പാദന ശേഷി 90% ആയി വർദ്ധിപ്പിച്ചതായും റിപ്പോർട്ടിൽ പറയുന്നു.

സി.ആർ.ഇ.എ. റിപ്പോർട്ട് അനുസരിച്ച്, ജൂലൈയിലെ യൂറോപ്യൻ യൂണിയൻ ഉപരോധങ്ങൾക്ക് ശേഷം ഈ റിഫൈനറി റഷ്യയിൽ നിന്ന് മാത്രമാണ് ക്രൂഡ് ഓയിൽ ഇറക്കുമതി ചെയ്യുന്നത്. ഒക്ടോബറിൽ റഷ്യയിൽ നിന്നുള്ള ഇതിന്റെ ഇറക്കുമതി 32% വർധിച്ച്, 2022 ഫെബ്രുവരിക്ക് ശേഷമുള്ള ഏറ്റവും ഉയർന്ന അളവിൽ എത്തി. എന്നിരുന്നാലും, ഈ റിഫൈനറിയിൽ നിന്നുള്ള കയറ്റുമതി 2023 മെയ് മാസത്തിനു ശേഷമുള്ള ഏറ്റവും താഴ്ന്ന നിലയിലാണ്.

 യുഎസ് താരിഫ് ഭീഷണി

റഷ്യൻ എണ്ണ ഇറക്കുമതിയുടെ പേരിൽ ഇന്ത്യയുടെ ഇറക്കുമതിക്ക് യുഎസ് 50% താരിഫ് ഏർപ്പെടുത്തിയിട്ടുണ്ട്. ഇതിൽ 25% പ്രതികാര നടപടിയായും ബാക്കി റഷ്യൻ എണ്ണ ഇറക്കുമതിക്ക് ശിക്ഷാ നടപടിയായുമാണ് ചുമത്തിയിട്ടുള്ളത്.