രാഹുൽ മാങ്കൂട്ടത്തിൽ എം.എൽ.എയ്ക്കെതിരെ ജാമ്യമില്ലാ വകുപ്പുകൾ ചുമത്തി കേസെടുത്തു

 തിരുവനന്തപുരം: യുവതിയുടെ ലൈംഗിക പീഡന പരാതിയിൽ കോൺഗ്രസ് എം.എൽ.എ. രാഹുൽ മാങ്കൂട്ടത്തിനെതിരെ പോലീസ് കേസെടുത്തു. വിവാഹ വാഗ്ദാനം നൽകി യുവതിയെ പീഡിപ്പിച്ചു, നിർബന്ധിച്ച് ഗർഭച്ഛിദ്രം നടത്തി എന്നീ കുറ്റങ്ങൾ ചുമത്തിയാണ് കേസ് രജിസ്റ്റർ ചെയ്തിരിക്കുന്നത്.

നെടുമങ്ങാട് വലിയമല പോലീസ് സ്റ്റേഷനിലാണ് കേസ് രജിസ്റ്റർ ചെയ്തിട്ടുള്ളത്. ഗുരുതരമായ കുറ്റകൃത്യങ്ങൾക്ക് ജാമ്യമില്ലാ വകുപ്പുകൾ പ്രകാരമാണ് എഫ്.ഐ.ആർ. തയ്യാറാക്കിയിരിക്കുന്നത്.

 മുഖ്യമന്ത്രിക്ക് നേരിട്ട് പരാതി; ഡിജിറ്റൽ തെളിവുകൾ കൈമാറി

യുവതി കഴിഞ്ഞ ദിവസം മുഖ്യമന്ത്രി പിണറായി വിജയന് നേരിട്ട് നൽകിയ പരാതിയുടെ അടിസ്ഥാനത്തിലാണ് പോലീസ് നടപടി സ്വീകരിച്ചത്. പരാതിയുടെ പശ്ചാത്തലത്തിൽ റൂറൽ എസ്.പി. കെ.എസ്. സുദർശന്റെ നേതൃത്വത്തിൽ യുവതിയുടെ മൊഴി രേഖപ്പെടുത്തിയിരുന്നു.

വ്യാഴാഴ്ച വൈകുന്നേരം നാലരയോടെയാണ് മറ്റൊരു സ്ത്രീയോടൊപ്പം യുവതി മുഖ്യമന്ത്രിയുടെ ഓഫീസിലെത്തി കാര്യങ്ങൾ വിശദീകരിച്ചത്. മൂന്ന് പേജുകളുള്ള പരാതിയാണ് രേഖാമൂലം കൈമാറിയത്. വാട്‌സാപ്പ് ചാറ്റുകൾ, ശബ്‌ദരേഖകൾ ഉൾപ്പെടെയുള്ള ഡിജിറ്റൽ തെളിവുകളും യുവതി സമർപ്പിച്ചിട്ടുണ്ട്.

മുഖ്യമന്ത്രിയുടെ നിർദ്ദേശപ്രകാരം എ.ഡി.ജി.പി. എച്ച്. വെങ്കടേഷ് പരാതി ഏറ്റെടുത്തതിന് പിന്നാലെ, പോലീസ് ആസ്ഥാനത്ത് ഉദ്യോഗസ്ഥർ യോഗം ചേർന്ന് തുടർനടപടികൾക്ക് രൂപം നൽകി.

 എം.എൽ.എ. ഒളിവിൽ; മുൻകൂർ ജാമ്യത്തിന് നീക്കം

പരാതി ലഭിച്ചതിനെ തുടർന്ന് പാലക്കാട്ടെ എം.എൽ.എ. ഓഫീസ് പൂട്ടി രാഹുൽ മാങ്കൂട്ടത്തിൽ മാറിനിൽക്കുകയാണ്. അദ്ദേഹത്തിന്റെ ഫോൺ സ്വിച്ച് ഓഫാണ്. എഫ്.ഐ.ആർ. രജിസ്റ്റർ ചെയ്തതോടെ പോലീസ് അറസ്റ്റിനുള്ള നീക്കം ആരംഭിച്ച സാഹചര്യത്തിൽ എം.എൽ.എ. മുൻകൂർ ജാമ്യത്തിനായുള്ള നിയമനടപടികൾ തേടിയിട്ടുണ്ട്.

കൊച്ചിയിലെത്തിയാണ് അദ്ദേഹം നിയമസഹായം തേടിയത്. ഹൈക്കോടതിയിലെ മുതിർന്ന അഭിഭാഷകൻ ജോർജ് പൂന്തോട്ടത്തെയാണ് അദ്ദേഹം സമീപിച്ചത്. സെഷൻസ് കോടതിയെ സമീപിച്ചതിന് ശേഷമേ ഹൈക്കോടതിയിൽ മുൻകൂർ ജാമ്യഹർജി നൽകാവൂ എന്ന സുപ്രീംകോടതി നിർദ്ദേശമുള്ളതിനാൽ പ്രത്യേക സാഹചര്യത്തിൽ നേരിട്ട് ഹൈക്കോടതിയെ സമീപിക്കാൻ കഴിയുമോ എന്ന് പരിശോധിച്ചുവരികയാണ്.

അതേസമയം, മുഖ്യമന്ത്രിക്ക് നേരിട്ട് പരാതി നൽകിയതിലെ അപാകത ചൂണ്ടിക്കാട്ടി അഡ്വ. ജോർജ് പൂന്തോട്ടം പ്രതികരിച്ചു. മുഖ്യമന്ത്രിയുടെ ഓഫീസ് എങ്ങനെയാണ് പോലീസ് സ്റ്റേഷനായി മാറുന്നതെന്നും അദ്ദേഹം ചോദിച്ചു.

 രാഷ്ട്രീയ പ്രത്യാഘാതം; വിവാദം വീണ്ടും

തദ്ദേശ സ്വയംഭരണ തിരഞ്ഞെടുപ്പ് ആസന്നമായിരിക്കുന്ന ഈ ഘട്ടത്തിൽ രാഹുൽ മാങ്കൂട്ടത്തിനെതിരെ പരാതി ഉയർന്നുവന്നത് രാഷ്ട്രീയ രംഗത്ത് വലിയ പ്രത്യാഘാതങ്ങൾ സൃഷ്ടിക്കുമെന്നാണ് വിലയിരുത്തൽ.

നേരത്തെ ഓഗസ്റ്റിൽ രാഹുൽ മാങ്കൂട്ടത്തിനെതിരെ ലൈംഗികാരോപണം ഉയർന്നിരുന്നുവെങ്കിലും പരാതിക്കാരി നേരിട്ട് ഹാജരായിരുന്നില്ല. മൂന്നാംകക്ഷികൾ സംസ്ഥാന പോലീസ് മേധാവിക്ക് നൽകിയ പരാതികളെ തുടർന്ന് ക്രൈംബ്രാഞ്ച് അന്വേഷണം തുടങ്ങിയിരുന്നു. ശബ്‌ദരേഖയിലെ യുവതിയെ കണ്ടെത്തി പരാതി എഴുതി നൽകാൻ ക്രൈംബ്രാഞ്ച് ആവശ്യപ്പെട്ടിരുന്നെങ്കിലും യുവതി അന്ന് തയ്യാറായിരുന്നില്ല. വിവാദ ശബ്‌ദരേഖയിലുള്ളത് തന്റെ ശബ്ദമാണോയെന്നത് സ്ഥിരീകരിക്കാനോ നിഷേധിക്കാനോ രാഹുൽ മാങ്കൂട്ടത്തിൽ ഒരു ഘട്ടത്തിലും തയ്യാറായിരുന്നില്ല.