പിറ്റ്ബുൾ ആക്രമണം: ആറു വയസ്സു കാരന്റെ വലതു ചെവി നഷ്ടമായി ; , നായയുടെ ഉടമ അറസ്റ്റിൽ

 ന്യൂഡൽഹി: ഡൽഹിയിലെ പ്രേം നഗറിൽ ആറു വയസ്സുകാരന് പിറ്റ്‌ബുൾ നായയുടെ ആക്രമണത്തിൽ ഗുരുതരമായി പരിക്കേറ്റു. കുട്ടിയുടെ വലതു ചെവി കടിച്ചെടുത്തതടക്കം ദാരുണമായ പരിക്കുകളാണ് സംഭവിച്ചത്. ഞായറാഴ്ച വൈകുന്നേരം കുട്ടി വീടിന് പുറത്ത് കളിക്കുന്നതിനിടെയാണ് സംഭവം.

പ്രദേശവാസിയായ രാജേഷ് പാൽ എന്നയാളുടെ ഉടമസ്ഥതയിലുള്ള നായയാണ് കുട്ടിയെ ആക്രമിച്ചത്. നായ പെട്ടെന്ന് ചാടിവീണ് കുട്ടിയെ ആക്രമിക്കുകയായിരുന്നു. അയൽവാസികളും കുട്ടിയുടെ മാതാപിതാക്കളും ചേർന്ന് ഇടപെട്ടാണ് കുട്ടിയെ രക്ഷിച്ചത്. സംഭവത്തിൽ കേസെടുത്തിട്ടുണ്ട്. ആശുപത്രിയിൽ ചികിത്സയിൽ കഴിയുന്ന കുട്ടിയുടെ ആരോഗ്യനില പരിഗണിച്ച് നായയുടെ ഉടമയെ പോലീസ് കസ്റ്റഡിയിലെടുത്തു.

സംഭവത്തിന്റെ വിശദാംശങ്ങൾ

ഞായറാഴ്ച വൈകുന്നേരം 5.38-നാണ് കുട്ടിയെ പിറ്റ്‌ബുൾ ആക്രമിച്ചെന്നും പരിക്കേറ്റ കുട്ടിയെ ആശുപത്രിയിലേക്ക് കൊണ്ടുപോയെന്നും പോലീസിന് വിവരം ലഭിക്കുന്നത്. വിനയ് എൻക്ലേവിലെ വീടിന് പുറത്ത് കളിച്ചുകൊണ്ടിരിക്കുകയായിരുന്ന കുട്ടിയെ, അയൽവാസിയുടെ വീട്ടിൽ നിന്ന് പുറത്തുവന്ന പിറ്റ്‌ബുൾ പെട്ടെന്ന് ആക്രമിക്കുകയായിരുന്നുവെന്ന് പ്രാഥമിക അന്വേഷണത്തിൽ വ്യക്തമായി. തയ്യൽക്കാരനായ രാജേഷ് പാൽ (50) എന്നയാളുടേതാണ് നായ.

BIG NEWS 🚨 A 6-year-old boy in Prem Nagar was brutally attacked by a pitbull, costing him his right ear 💔

Police quickly arrested the dog’s owner and registered a case. pic.twitter.com/tuyQvyUikX

— News Algebra (@NewsAlgebraIND) November 24, 2025

കുട്ടിക്ക് ആഴത്തിലുള്ള മുറിവുകൾ ഏൽക്കുകയും വലതു ചെവി കടിച്ചെടുക്കുകയും ചെയ്തതായി അധികൃതർ അറിയിച്ചു.

അയൽവാസികളുടെ സഹായത്തോടെ മാതാപിതാക്കൾ കുട്ടിയെ രോഹിണിയിലെ ബി.എസ്.എ. ആശുപത്രിയിൽ എത്തിച്ചു. പിന്നീട് വിദഗ്ധ ചികിത്സയ്ക്കായി സഫ്ദർജംഗ് ആശുപത്രിയിലേക്ക് മാറ്റി. കുട്ടി നിലവിൽ ഇവിടെ ചികിത്സയിലാണ്.

പോലീസ് നടപടി, ഉടമ അറസ്റ്റിൽ

കൊലപാതക ശ്രമക്കേസുമായി ബന്ധപ്പെട്ട് നിലവിൽ ജയിലിൽ കഴിയുന്ന സച്ചിൻ പാൽ ഏകദേശം ഒന്നര വർഷം മുൻപാണ് ഈ നായയെ വീട്ടിൽ കൊണ്ടുവന്നതെന്ന് പ്രാഥമിക അന്വേഷണത്തിൽ സൂചന ലഭിച്ചു.

പ്രേം നഗർ പോലീസ് സ്റ്റേഷനിൽ കേസെടുത്തിട്ടുണ്ട്. കുട്ടിയുടെ ചികിത്സാ രേഖകൾ ശേഖരിച്ച പോലീസ്, കീർത്തി നഗറിലെ സ്വകാര്യ ഫാക്ടറിയിൽ ജോലി ചെയ്യുന്ന കുട്ടിയുടെ പിതാവ് ദിനേശിന്റെ മൊഴിയും രേഖപ്പെടുത്തി. നായയുടെ ഉടമയായ രാജേഷ് പാലിനെ അറസ്റ്റ് ചെയ്തതായി ഉദ്യോഗസ്ഥർ സ്ഥിരീകരിച്ചു.