വനിതാ ജീവനക്കാരിക്ക് മയക്കുമരുന്ന് നൽകി പീഡനം; 31-കാരിയായ മോഡൽ അറസ്റ്റിൽ

 മുംബൈ: 22 വയസ്സുള്ള വനിതാ ജീവനക്കാരിക്ക് മയക്കുമരുന്ന് നൽകി ബോധരഹിതയാക്കിയ ശേഷം ലൈംഗികമായി പീഡിപ്പിക്കാൻ അവസരം ഒരുക്കിയെന്ന കേസിൽ 31 വയസ്സുള്ള ഒരു മോഡലിനെ പോലീസ് അറസ്റ്റ് ചെയ്തു. ഭീഷണിപ്പെടുത്തി, അശ്ലീല ഫോട്ടോകളും വീഡിയോകളും പകർത്തിയെന്ന കുറ്റങ്ങളും ഇവർക്കെതിരെ ചുമത്തിയിട്ടുണ്ട്.

വ്യാജ കമ്പനിയുടെ മറവിൽ കെണി

പ്രതി ഒരു വ്യാജ കമ്പനി നടത്തിവരികയായിരുന്നുവെന്നും 'മാർക്കറ്റിംഗ് ജോലി'യുടെ മറവിൽ യുവതിയെ കെണിയിൽപ്പെടുത്തുകയായിരുന്നു എന്നും അന്വേഷണത്തിൽ വ്യക്തമായി. അന്ധേരിയിൽ താമസിക്കുന്ന മോഡലാണ് ജെ.ബി. നഗറിലെ ഒരു ലോഡ്ജ് മുറി വാടകയ്‌ക്കെടുത്ത് ദിവസങ്ങളോളം 'ഓഫീസ്' ആയി പ്രവർത്തിപ്പിച്ചിരുന്നത്.

കോളേജ് വിദ്യാർത്ഥിനിയായ ഇര, "ഗരം മസാല" ഉൽപ്പന്നങ്ങളുടെ വിപണനത്തിനും വിൽപ്പനയ്ക്കുമുള്ള ഓൺലൈൻ പരസ്യത്തിന് മറുപടി നൽകിയാണ് പാർട്ട് ടൈം ജോലിയിൽ പ്രവേശിച്ചത്. ജോലിക്ക് ചേർന്ന് ദിവസങ്ങൾക്കകം സംഭവം നടന്നതായി പോലീസ് ഉദ്യോഗസ്ഥർ അറിയിച്ചു.

 ലഹരി കലർത്തിയ പാനീയം നൽകി

"ഒരു സോഷ്യൽ മീഡിയ പോസ്റ്റ് വഴിയാണ് ഇര അപേക്ഷിച്ചത്. പ്രതിയാണ് അവളെ തിരഞ്ഞെടുത്തത്. ജെ.ബി. നഗറിലെ ഒരു വാടക ലോഡ്ജ് മുറിയിൽ നിന്നാണ് തങ്ങൾ പ്രവർത്തിക്കുന്നതെന്ന് പ്രതി ഇരയോട് പറഞ്ഞു. ഈ ഓഫീസിൽ പ്രതിയും ഇരയും മാത്രമാണ് ജോലി ചെയ്തിരുന്നത്," പോലീസ് ഉദ്യോഗസ്ഥൻ വ്യക്തമാക്കി.

കുറച്ച് ദിവസങ്ങൾക്ക് ശേഷം, മോഡൽ ഒരു സോഫ്റ്റ് ഡ്രിങ്കിൽ ലഹരി പദാർത്ഥം കലർത്തി ഇരയ്ക്ക് നൽകി. ഇത് കുടിച്ച ഉടൻ യുവതി ബോധരഹിതയായി വീഴുകയായിരുന്നു. തുടർന്ന് മോഡൽ രണ്ട് പുരുഷന്മാരെ ലോഡ്ജ് മുറിയിലേക്ക് വിളിച്ചുവരുത്തി. ഇരുവരും അബോധാവസ്ഥയിലായിരുന്ന യുവതിയെ ലൈംഗികമായി പീഡിപ്പിച്ചതായി സംശയിക്കുന്നതായും പോലീസ് പറഞ്ഞു.

 ബ്ലാക്ക് മെയിലിംഗും ഭീഷണിയും

"ഇരയ്ക്ക് ബോധം വീണ്ടുകിട്ടിയപ്പോൾ, തന്റെ അടുത്ത് രണ്ട് പുരുഷന്മാർ ഇരിക്കുന്നത് അവൾ കണ്ടു. ആക്രമണത്തിനിടെ പകർത്തിയ അശ്ലീല ഫോട്ടോകളും വീഡിയോകളും പ്രതി ഇരയെ കാണിച്ച് ഭീഷണിപ്പെടുത്തി. ഉടൻ തന്നെ ലോഡ്ജിൽ നിന്ന് ഇര രക്ഷപ്പെട്ടു," ഉദ്യോഗസ്ഥൻ കൂട്ടിച്ചേർത്തു.

തുടർന്ന് ഇര അന്ധേരി പോലീസിനെ സമീപിക്കുകയും മോഡലിനും തിരിച്ചറിയാത്ത രണ്ട് പുരുഷന്മാർക്കുമെതിരെ എഫ്.ഐ.ആർ. ഫയൽ ചെയ്യുകയും ചെയ്തു. "മോഡലിനെ അറസ്റ്റ് ചെയ്തിട്ടുണ്ട്. മറ്റ് രണ്ട് പ്രതികൾക്കായി തിരച്ചിൽ തുടരുകയാണ്," സോൺ എക്‌സിലെ ഡി.സി.പി. ദത്ത നളവാഡെ അറിയിച്ചു.