ടെട്രാ പാക്കിൽ മദ്യം: സുപ്രീം കോടതിക്ക് കടുത്ത ആശങ്ക, സംസ്ഥാന സർക്കാരുകൾക്ക് വിമർശനം

 ന്യൂഡൽഹി: ടെട്രാ പാക്കുകളിലെ മദ്യവിൽപന സംബന്ധിച്ച് സുപ്രീം കോടതി അതീവ ഗൗരവമായ ആശങ്ക രേഖപ്പെടുത്തി. പൊതുജനാരോഗ്യത്തേക്കാൾ വരുമാനത്തിന് പ്രാധാന്യം നൽകുന്ന സംസ്ഥാന സർക്കാരുകളുടെ നിലപാടിനെ കോടതി വിമർശിച്ചു.

മദ്യക്കമ്പനികൾ തമ്മിലുള്ള വ്യാപാരമുദ്ര തർക്കം പരിഗണിക്കുന്നതിനിടെ, കോടതിക്ക് മുമ്പാകെ വിസ്‌കി നിറച്ച ടെട്രാ പാക്കുകൾ തെളിവായി ഹാജരാക്കിയപ്പോഴാണ് ജസ്റ്റിസുമാരായ സൂര്യ കാന്ത്, ജോയ് മാല്യ ബാഗ്ചി എന്നിവരടങ്ങിയ ബെഞ്ചിന്റെ നിരീക്ഷണങ്ങൾ.

"ടെട്രാ പാക്കുകളിലെ മദ്യവിൽപന സ്കൂൾ കുട്ടികൾക്ക് പോലും ഇത് എളുപ്പത്തിൽ ലഭ്യമാക്കിയേക്കാം. മാത്രമല്ല, ഇതിന്റെ രൂപത്തിലുള്ള കപടത കാരണം മാതാപിതാക്കൾക്ക് പോലും ഇത് ശ്രദ്ധിക്കപ്പെടാതെ പോകാൻ സാധ്യതയുണ്ട്," കോടതി നിരീക്ഷിച്ചു.

ജ്യൂസ് പാക്കറ്റ് പോലെയുള്ള രൂപം

മദ്യം നിറച്ച ടെട്രാ പാക്കുകൾ പഴച്ചാറുകളുടെ പാക്കറ്റുകൾക്ക് സമാനമാണ്. ഇവയിൽ ആരോഗ്യ മുന്നറിയിപ്പുകൾ നൽകിയിട്ടില്ല. കുട്ടികൾക്ക് ഇത് രഹസ്യമായി സ്കൂളുകളിലേക്ക് കൊണ്ടുപോകാൻ പോലും ഇത് വഴിയൊരുക്കുന്നു എന്ന് കോടതി ചൂണ്ടിക്കാട്ടി.

'ഒറിജിനൽ ചോയ്‌സ്' എന്ന തങ്ങളുടെ വ്യാപാരമുദ്ര ട്രേഡ്മാർക്ക് രജിസ്റ്ററിൽ നിന്ന് നീക്കം ചെയ്യാനുള്ള മദ്രാസ് ഹൈക്കോടതി ഉത്തരവിനെ ചോദ്യം ചെയ്ത് ജോൺ ഡിസ്റ്റിലറീസ് ലിമിറ്റഡ് സമർപ്പിച്ച ഹർജി പരിഗണിക്കുമ്പോഴാണ് കോടതിയുടെ പരാമർശങ്ങൾ. 'ഓഫീസേഴ്‌സ് ചോയ്‌സ് വിസ്‌കി'യുടെ നിർമാതാക്കളായ അലൈഡ് ബ്ലെൻഡേഴ്‌സ് ആൻഡ് ഡിസ്റ്റിലറിക്ക് അനുകൂലമായിരുന്നു ഹൈക്കോടതി വിധി.

കേസ് മധ്യസ്ഥതയ്ക്ക് വിട്ടു

കേസിൽ കടുത്ത വാദപ്രതിവാദങ്ങൾ നടക്കുന്ന സാഹചര്യത്തിൽ, പ്രശ്നം രമ്യമായി പരിഹരിക്കുന്നതിന് കോടതി കക്ഷികളെ റിട്ടയേർഡ് ജഡ്ജി ജസ്റ്റിസ് എൽ. നാഗേശ്വര റാവുവിന്റെ മധ്യസ്ഥതയ്ക്ക് വിട്ടു. ഒരു നിശ്ചിത സമയപരിധിക്കുള്ളിൽ മധ്യസ്ഥ ചർച്ചകൾ നടത്തണമെന്നും രണ്ടാഴ്ചയ്ക്കുള്ളിൽ സ്ഥിതിവിവരം അറിയിക്കണമെന്നും കോടതി നിർദ്ദേശിച്ചു.

'ഓഫീസേഴ്‌സ് ചോയ്‌സ്' വിസ്‌കി വിപണനം ചെയ്യുന്ന അലൈഡ് ബ്ലെൻഡേഴ്‌സ് ആൻഡ് ഡിസ്റ്റിലറി പ്രൈവറ്റ് ലിമിറ്റഡും 'ഒറിജിനൽ ചോയ്‌സ്' വിസ്‌കി വിപണനം ചെയ്യുന്ന ജോൺ ഡിസ്റ്റിലറീസ് ലിമിറ്റഡും തമ്മിലുള്ള ദീർഘകാലമായുള്ള വ്യാപാരമുദ്രാ തർക്കമാണ് കേസിന്റെ അടിസ്ഥാനം. വാദം കേൾക്കുന്നതിനിടെ ഹർജിക്കാർ രണ്ട് ഉൽപ്പന്നങ്ങളുടെയും യഥാർത്ഥ കുപ്പികളും ടെട്രാ പാക്ക് പതിപ്പുകളും കോടതിയിൽ ഹാജരാക്കിയിരുന്നു.

തർക്കത്തിന്റെ സ്വഭാവവും പശ്ചാത്തലവും പരിഗണിച്ച്, മധ്യസ്ഥതയിലൂടെയുള്ള ഒത്തുതീർപ്പ് കൂടുതൽ ഫലപ്രദമായ വഴിയായിരിക്കുമെന്ന് കോടതി വിലയിരുത്തി.