സംസ്ഥാനത്തിന്റെ സാമ്പത്തികാവശ്യങ്ങൾ പാർലമെന്റിൽ ഉന്നയിക്കണം: മുഖ്യമന്ത്രി എം.പിമാരുടെ യോഗത്തിൽ

 തിരുവനന്തപുരം: സംസ്ഥാനത്തിന്റെ കടമെടുപ്പ് പരിധിയിൽ കേന്ദ്രം വരുത്തിയ കുറവ് പുനഃസ്ഥാപിക്കണമെന്നും വിവിധ വികസന പദ്ധതികൾക്ക് കേന്ദ്ര സഹായം ഉറപ്പാക്കണമെന്നും മുഖ്യമന്ത്രി പിണറായി വിജയൻ കേരളത്തിലെ എം.പിമാരുടെ യോഗത്തിൽ ആവശ്യപ്പെട്ടു. പാർലമെന്റ് സമ്മേളനത്തിന് മുന്നോടിയായി ഓൺലൈനായി ചേർന്ന യോഗത്തിലാണ് അദ്ദേഹം ഈ നിർദ്ദേശങ്ങൾ മുന്നോട്ടുവെച്ചത്.

 കടമെടുപ്പ് പരിധി പുനഃസ്ഥാപിക്കണം

സംസ്ഥാനത്തിന്റെ കടമെടുപ്പ് പരിധിയിൽ 2024-25 സാമ്പത്തിക വർഷം കേന്ദ്രം വെട്ടിക്കുറച്ച 6757 കോടി രൂപയും 2025-26 വർഷത്തേക്ക് കുറച്ച 3323 കോടി രൂപയും പുനഃസ്ഥാപിക്കണമെന്ന് മുഖ്യമന്ത്രി ആവശ്യപ്പെട്ടു. സംസ്ഥാനങ്ങൾക്ക് കടമെടുപ്പ് പരിധി 3.5 ശതമാനമായി ഉയർത്തുന്നതിനുള്ള നടപടികൾ സ്വീകരിക്കണമെന്നും അദ്ദേഹം കേന്ദ്രത്തോട് അഭ്യർഥിച്ചു.

കൂടാതെ, സംസ്ഥാനങ്ങളുടെ 2024-25 സാമ്പത്തിക വർഷത്തെ മൂലധന നിക്ഷേപങ്ങൾക്കായുള്ള പ്രത്യേക പദ്ധതിയായ എസ്.എ.എസ്സിഐ (SASCI) പ്രകാരം ലഭിക്കേണ്ട 300 കോടി രൂപ ലഭ്യമാക്കാൻ എം.പിമാർ ഇടപെടണമെന്നും മുഖ്യമന്ത്രി ചൂണ്ടിക്കാട്ടി.

 മനുഷ്യ-വന്യജീവി സംഘർഷവും വന്യജീവി നിയമ ഭേദഗതിയു

വന്യജീവി സംരക്ഷണ ഭേദഗതി ബില്ലിന് കേന്ദ്രാനുമതി ലഭ്യമാക്കുന്നതിന് എം.പിമാർ സമ്മർദ്ദം ചെലുത്തണം.മനുഷ്യ-വന്യജീവി സംഘർഷം ലഘൂകരിക്കുന്നതിനായി കേന്ദ്രാവിഷ്കൃത പദ്ധതിയുടെ ഭാഗമായി 220 കോടി രൂപയുടെ പ്രത്യേക കേന്ദ്ര സഹായം അനുവദിക്കണം.

അതേസമയം, നിലവിലുള്ള മാർഗ്ഗരേഖകൾ കർശനമായി നടപ്പാക്കുന്നതിലൂടെ മനുഷ്യ-വന്യജീവി സംഘർഷം ഇല്ലാതാക്കാനും കൃഷി സംരക്ഷിക്കാനും കഴിയുമെന്ന് എം.പിമാർ അഭിപ്രായപ്പെട്ടു.

ന്യൂനപക്ഷ ക്ഷേമ ഫണ്ട്: ചെലവഴിച്ച സർട്ടിഫിക്കറ്റ് നൽകിയില്ല

ന്യൂനപക്ഷ ക്ഷേമ വകുപ്പിന് കേന്ദ്രം അനുവദിച്ച ഫണ്ട് ചെലവഴിച്ചതിന്റെ സർട്ടിഫിക്കറ്റ് സംസ്ഥാനം സമർപ്പിക്കാത്തത് കേന്ദ്ര ഫണ്ട് അനുവദിക്കുന്നതിന് തടസ്സമായിട്ടുണ്ടെന്ന് പി.വി. അബ്ദുൾ വഹാബ്, എൻ.കെ. പ്രേമചന്ദ്രൻ, ഇ.ടി. മുഹമ്മദ് ബഷീർ എന്നിവർ യോഗത്തിൽ ശ്രദ്ധയിൽപ്പെടുത്തി. തദ്ദേശ തിരഞ്ഞെടുപ്പിന് ശേഷം ഇതുസംബന്ധിച്ച് യോഗം വിളിക്കാമെന്ന് മുഖ്യമന്ത്രി ഉറപ്പുനൽകി.

റെയിൽവേ വികസനത്തിന് സമ്മർദ്ദം ചെലുത്തണം

സംസ്ഥാനത്തെ റെയിൽവേ വികസനത്തിനായി ശക്തമായ സമ്മർദ്ദം ചെലുത്തണമെന്ന് മുഖ്യമന്ത്രി ആവശ്യപ്പെട്ടു.തിരുവനന്തപുരം-മംഗലാപുരം റൂട്ടിൽ മൂന്നും നാലും പാളങ്ങൾക്കായുള്ള സർവേ നടത്തണം.ഈ റൂട്ടിൽ നമോ ഭാരത് റാപ്പിഡ് റെയിൽ പദ്ധതി അനുവദിക്കണം.തലശ്ശേരി-മൈസൂരു റെയിൽ പദ്ധതി, നിലമ്പൂർ-നഞ്ചൻകോട് പദ്ധതി, അങ്കമാലി-ശബരി റെയിൽപാത തുടങ്ങിയവയുടെ വിഷയത്തിൽ ശക്തമായ ഇടപെടൽ വേണം.

 മറ്റ് പ്രധാന ആവശ്യങ്ങൾ

പി.എം.എ.വൈ. ലോഗോ: പ്രധാനമന്ത്രി ആവാസ് യോജന പ്രകാരം നിർമ്മിക്കുന്ന വീടുകൾക്ക് മുന്നിൽ പി.എം.എ.വൈ. ലോഗോ വെക്കണമെന്ന നിബന്ധന ഒഴിവാക്കണമെന്ന സംസ്ഥാനത്തിന്റെ ആവശ്യം അംഗീകരിക്കുന്നതിന് എം.പിമാർ ഇടപെടണം.

മുണ്ടക്കൈ പുനരധിവാസം: മുണ്ടക്കൈ, ചൂരൽമല പുനരധിവാസത്തിനായി 2221.03 കോടി രൂപ ആവശ്യപ്പെട്ടെങ്കിലും 260.56 കോടി മാത്രമാണ് കേന്ദ്രസഹായം ലഭിച്ചത്. ആവശ്യപ്പെട്ട തുക ഉറപ്പാക്കണം.

ഖാദി ഉത്പന്നങ്ങൾ: ഖാദി ഉത്പന്നങ്ങളെ ജി.എസ്.ടി. പരിധിയിൽനിന്ന് ഒഴിവാക്കണം.

വികസന പദ്ധതികൾ: കൊച്ചി-ബെംഗളൂരു വ്യവസായ ഇടനാഴിയുടെ ഭാഗമായി ഗ്ലോബൽ സിറ്റി, കൊച്ചി (നോഡ്-2) പദ്ധതി, എയിംസ്, അട്ടപ്പാടി ജലസേചന പദ്ധതി, പ്രവാസി പുനരധിവാസത്തിനായി 1000 കോടിയുടെ പാക്കേജ് തുടങ്ങിയ ആവശ്യങ്ങളും പാർലമെൻറിൽ ഉന്നയിക്കണമെന്ന് മുഖ്യമന്ത്രി നിർദ്ദേശിച്ചു.