ജർമ്മനിയിൽ മലയാളി നഴ്സ് അന്തരിച്ചു; അന്തരിച്ച ജോബി കുര്യൻ്റെ അവയവങ്ങൾ ദാനം ചെയ്യുമെന്ന് കുടുംബാംഗങ്ങൾ

 ആലപ്പുഴ തത്തംപള്ളി സ്വദേശിയും ജർമ്മനിയിൽ നഴ്സുമായിരുന്ന ജോബി കുര്യൻ (40) അന്തരിച്ചു. തലച്ചോറിലേക്കുള്ള ഞരമ്പ് പൊട്ടിയതിനെ തുടർന്ന് ബ്രെയിൻ ഡെത്ത് സംഭവിച്ച ജോബിയുടെ അവയവങ്ങൾ, മരണത്തോട് മല്ലിടുന്ന നിരവധി പേർക്ക് പുതുജീവൻ നൽകാനായി ദാനം ചെയ്യാൻ ഭാര്യയും കുടുംബവും എടുത്ത തീരുമാനം ഏറെ ശ്രദ്ധേയമാവുകയാണ്.

ജർമ്മനിയിൽ സേവനമനുഷ്ഠിച്ചിരുന്ന ജോബി കുര്യനെ ഇന്നലെ രാവിലെ ബാത്ത് റൂമിൽ കുഴഞ്ഞുവീണ നിലയിൽ കണ്ടെത്തുകയായിരുന്നു. ഉടൻതന്നെ മകൾ അടുത്തുള്ള മലയാളി കുടുംബത്തെ വിവരമറിയിക്കുകയും, അവർ എത്തി ഉടൻ സി.പി.ആർ. (CPR) നൽകി അടിയന്തര ചികിത്സയ്ക്കായി ആശുപത്രിയിലേക്ക് മാറ്റുകയും ചെയ്തു. എന്നാൽ, കഠിനമായ പരിശ്രമങ്ങൾക്കിടയിലും അദ്ദേഹത്തിൻ്റെ ജീവൻ നിലനിർത്താൻ കഴിഞ്ഞില്ല. തലച്ചോറിലെ ഞരമ്പ് പൊട്ടിയതിനെ തുടർന്നാണ് ബ്രെയിൻ ഡെത്ത് സംഭവിച്ചത്.

അവയവ ദാനത്തിലൂടെ പുതുജീവൻ

വേർപാടിൻ്റെ കഠിനമായ വേദനയിലും ജോബിയുടെ ഭാര്യയും കുടുംബവും എടുത്ത മാതൃകാപരമായ തീരുമാനമാണ് . മരണത്തോട് മല്ലിടുന്ന ഒരുപിടി മനുഷ്യർക്ക് തുണയായിരിക്കുന്നത് , അദ്ദേഹത്തിൻ്റെ അവയവങ്ങൾ ദാനം ചെയ്യാൻ കുടുംബം മുന്നോട്ട് വന്നു.

"അദ്ദേഹം കടന്നുപോകുമെങ്കിലും അദ്ദേഹത്തിലൂടെ ഇനി ഒരുപിടി മനുഷ്യർ ജീവിക്കും," എന്ന് സുഹൃത്തുക്കളും അഭ്യുദയകാംക്ഷികളും കുറിക്കുന്നു. ഈ സങ്കടകരമായ അവസ്ഥയിലും അവയവങ്ങൾ പകുത്തു നൽകാൻ ജോബിയുടെ കുടുംബം കാണിച്ച വലിയ മനസ്സിന് സമൂഹമാധ്യമങ്ങളിലും വലിയ ആദരവ് ലഭിക്കുന്നുണ്ട്.

കലാരംഗത്തും ജീവകാരുണ്യത്തിലും സജീവം

ആലപ്പുഴക്കാരനായ ജോബി കുര്യൻ റൂഹി സ്കൂൾ ഓഫ് നഴ്സിങ്ങിലെ പഠനകാലത്ത്  ഗാനം ആലപിച്ച് ശ്രദ്ധ നേടിയിരുന്നു.  തൻ്റെ വ്യക്തിത്വത്തിലൂടെ ആരുടെയും വെറുപ്പ് സമ്പാദിക്കാത്ത വ്യക്തിയായിരുന്നുവെന്ന് സുഹൃത്തുക്കൾ ഓർക്കുന്നു.

IRITTY GRAMADEEPAM (ഗ്രാമദീപം) ഫേസ്ബുക്ക് കൂട്ടായ്മയുടെ നിരവധി ജീവകാരുണ്യ പ്രവർത്തനങ്ങളിലും ജോബി സജീവ പങ്കാളിത്തം വഹിച്ചിട്ടുണ്ട്. അവസാന നിമിഷത്തിൽ പോലും ഇത്രയേറെ കാരുണ്യ പ്രവർത്തനങ്ങൾ ചെയ്ത ജോബിക്ക് സംശയലേശമെന്യേ സ്വർഗ്ഗത്തിൽ സ്ഥാനമുണ്ടാകുമെന്ന് സുഹൃത്തുക്കൾ വിശ്വസിക്കുന്നു.

ജോബിയുടെ ഭൗതിക ശരീരം നിലവിൽ ജർമ്മനിയിലെ ആശുപത്രിയിലാണുള്ളത്. ഈ പ്രതിസന്ധി ഘട്ടത്തിൽ ജോബിയുടെ ഭാര്യക്കും കുടുംബത്തിനും പിടിച്ചുനിൽക്കാനുള്ള ശക്തി ലഭിക്കാൻ പ്രാർത്ഥനകളോടെ ചേർത്ത് നിർത്താമെന്ന് സുഹൃദ് വലയങ്ങൾ അറിയിച്ചു.