ഇന്ത്യ ലോകശക്തിയായി വളരുന്നു: യു.എൻ. സുരക്ഷാ കൗൺസിലിൽ സ്ഥിരാംഗത്വം നൽകണം - ഫിൻലൻഡ് പ്രസിഡന്റ്

ഹെൽസിങ്കി: ഇന്ത്യ ലോകശക്തിയുടെ വളരുന്ന ഒരു നെടുംതൂണാണെന്ന് ഫിൻലൻഡ് പ്രസിഡന്റ് അലക്സാണ്ടർ സ്റ്റബ്ബ് അഭിപ്രായപ്പെട്ടു. യു.എസിനും ചൈനയ്ക്കുമൊപ്പം ലോകത്തിലെ അടുത്ത വൻശക്തിയായി ഇന്ത്യ ഉടൻ മാറുമെന്നും അദ്ദേഹം പ്രവചിച്ചു. ഇന്ത്യയെ യു.എൻ. രക്ഷാസമിതിയിൽ സ്ഥിരാംഗമാക്കാത്തപക്ഷം ഐക്യരാഷ്ട്രസഭയ്ക്ക് അതിന്റെ പ്രസക്തി നഷ്ടമാകുമെന്നും അദ്ദേഹം മുന്നറിയിപ്പ് നൽകി.

ഇന്ത്യയെ ലോകത്തിന്റെ രാഷ്ട്രീയ-സുരക്ഷാ ഭൂപടം രൂപപ്പെടുത്തുന്ന ഒരു 'തന്ത്രപരമായ ശക്തി' (Strategic Actor) ആയാണ് അലക്സാണ്ടർ സ്റ്റബ്ബ് വിശേഷിപ്പിച്ചത്. ന്യൂഡൽഹിയുടെ ബഹുമുഖ വിദേശനയത്തെയും പരസ്പരം മത്സരിക്കുന്ന ആഗോള താൽപ്പര്യങ്ങളെ സന്തുലിതമാക്കാനുള്ള ഇന്ത്യയുടെ കഴിവിനെയും അദ്ദേഹം പ്രശംസിച്ചു.

"ഞാൻ ഇന്ത്യയെ അങ്ങേയറ്റം അഭിനന്ദിക്കുന്നു. ഇന്ത്യ നമ്മുടെ അടുത്ത സൂപ്പർ പവറാകും, യു.എസിനും ചൈനയ്ക്കും ഒപ്പം മുന്നിൽത്തന്നെ ഉണ്ടാകും. പ്രധാനമന്ത്രി മോദിയായാലും വിദേശകാര്യ മന്ത്രി ജയശങ്കറായാലും, ഇന്ത്യ ഇപ്പോൾ ചെയ്യുന്ന കാര്യങ്ങൾ ആഗോള ബഹുമാനം നേടുന്ന തന്ത്രപരമായ ചിന്താഗതിയെയാണ് പ്രതിഫലിപ്പിക്കുന്നത്," അലക്സാണ്ടർ സ്റ്റബ്ബ് പറഞ്ഞു.

 ശക്തമായ യു.എന്നിന് ഇന്ത്യയുടെ പങ്ക് നിർണായകം

ബഹുമുഖ പരിഷ്‌കരണത്തിന്റെ (Multilateral Reform) ദീർഘകാല വക്താവാണ് ഫിൻലൻഡ് പ്രസിഡന്റ്. ഇന്ത്യയെയും മറ്റ് വളർന്നുവരുന്ന ശക്തികളെയും യു.എൻ. അജണ്ട രൂപപ്പെടുത്തുന്നതിൽ പങ്കാളികളാക്കിയില്ലെങ്കിൽ യു.എൻ. ദുർബലമായിക്കൊണ്ടിരിക്കുമെന്ന് അദ്ദേഹം മുന്നറിയിപ്പ് നൽകി.

"യു.എൻ. രക്ഷാസമിതിയുടെ അംഗസംഖ്യ വർദ്ധിപ്പിക്കണമെന്ന് ഞാൻ ജനറൽ അസംബ്ലിയിൽ രണ്ടുതവണ ആവശ്യപ്പെട്ടിട്ടുണ്ട്. അതിന്റെ അംഗത്വം കുറഞ്ഞത് ഇരട്ടിയാക്കണം. ഇന്ത്യയെപ്പോലുള്ള രാജ്യങ്ങൾ സുരക്ഷാ കൗൺസിലിൽ ഇല്ലാത്തത് തെറ്റാണ്," അദ്ദേഹം പറഞ്ഞു.

പുനഃസംഘടിപ്പിച്ച കൗൺസിലിൽ ലാറ്റിൻ അമേരിക്കയിൽ നിന്ന് ഒരാളും ആഫ്രിക്കയിൽ നിന്ന് രണ്ടും ഏഷ്യയിൽ നിന്ന് രണ്ടും അംഗങ്ങൾ ഉണ്ടായിരിക്കണമെന്നും, പങ്കാളിത്തമില്ലാതെ ബഹുസ്വരതയ്ക്ക് നിലനിൽക്കാനാവില്ലെന്നും അലക്സാണ്ടർ സ്റ്റബ്ബ് നിർദ്ദേശിച്ചു. "ഇന്ത്യ പോലുള്ള ശക്തികൾക്ക് കാര്യങ്ങൾ തീരുമാനിക്കുന്നതിൽ പങ്കാളിത്തമില്ലെന്ന് തോന്നിയാൽ, ഈ സ്ഥാപനം ദുർബലമായിക്കൊണ്ടേയിരിക്കും," അദ്ദേഹം മുന്നറിയിപ്പ് നൽകി.

'ഇന്ത്യ ചെയ്യുന്നതെല്ലാം ലോകത്തിന് പ്രധാനം'

ഇന്ത്യയുടെ സാമ്പത്തിക വ്യാപ്തിയും രാഷ്ട്രീയ സ്വാധീനവും അംഗീകരിച്ചുകൊണ്ട്, ആഗോള സ്ഥിരതയ്ക്കും വളർച്ചയ്ക്കും ന്യൂഡൽഹി ഒഴിച്ചുകൂടാനാവാത്ത ശക്തിയായി മാറിയെന്ന് അദ്ദേഹം പറഞ്ഞു.

"ഇന്ത്യ ചെയ്യുന്നതെല്ലാം ലോകത്തിന് പ്രധാനമാണ്," അദ്ദേഹം കൂട്ടിച്ചേർത്തു. സഹകരണത്തിലധിഷ്ഠിതവും, നിയമങ്ങളെ അടിസ്ഥാനമാക്കിയുള്ളതും, സാങ്കേതികമായി മുന്നിട്ട് നിൽക്കുന്നതുമായ ഒരു അന്താരാഷ്ട്ര ക്രമം രൂപപ്പെടുത്തുന്നതിൽ ഫിൻലൻഡ് ഇന്ത്യയെ ഒരു സുപ്രധാന പങ്കാളിയായിട്ടാണ് കാണുന്നതെന്നും അദ്ദേഹം കൂട്ടിച്ചേർത്തു.

"ഞാൻ ബഹുസ്വരതയിൽ വിശ്വസിക്കുന്നു. ബഹുസ്വരത പ്രവർത്തിക്കണമെങ്കിൽ, ഇന്ത്യ വ്യവസ്ഥിതിയുടെ അകത്തുണ്ടായിരിക്കണം, പുറത്തുനിന്ന് നോക്കുന്നവരാകരുത്," അലക്സാണ്ടർ സ്റ്റബ്ബ് പറഞ്ഞു.