മുൻ ഭർത്താവിന്റെ പേരിൽ ബംഗ്ലാദേശി കാമുകന് വ്യാജ ഐ.ഡി. നൽകി; യുവതി ഉൾപ്പെടെ രണ്ടുപേർ ഡെറാഡൂണിൽ അറസ്റ്റിൽ

 ഡെറാഡൂൺ: ഉത്തരാഖണ്ഡ് മുഖ്യമന്ത്രിയുടെ നിർദ്ദേശപ്രകാരം ഡെറാഡൂൺ പോലീസും ലോക്കൽ ഇന്റലിജൻസ് യൂണിറ്റും (എൽ.ഐ.യു.) ചേർന്ന് നടത്തുന്ന  "ഓപ്പറേഷൻ കലനേമി"യിൽ നിർണായക വിജയം. വ്യാജ ഐഡന്റിറ്റി ഉപയോഗിച്ച് നിയമവിരുദ്ധമായി ഇന്ത്യയിൽ താമസിച്ച ബംഗ്ലാദേശ് പൗരനായ മാമുൻ ഹസൻ (28), ഇയാൾക്ക് വ്യാജരേഖകൾ നിർമ്മിക്കാൻ സഹായിച്ച തൃനി നിവാസിയായ പങ്കാളി റീന ചൗഹാൻ എന്നിവരെ പോലീസ് അറസ്റ്റ് ചെയ്തു.

സിനിമയെ വെല്ലുന്ന ഒരു കഥയാണ് ഈ സംഭവത്തിന് പിന്നിലുള്ളത്. റീന ചൗഹാൻ തന്റെ മുൻ ഭർത്താവായ സച്ചിൻ ചൗഹാന്റെ പേരും വിലാസവും ഉപയോഗിച്ച് ബംഗ്ലാദേശി കാമുകന് വ്യാജ ഐഡന്റിറ്റി ഉണ്ടാക്കി നൽകുകയായിരുന്നു. ഈ വ്യാജരേഖകൾ ഉപയോഗിച്ച് അനധികൃത കുടിയേറ്റക്കാരനായ മാമുൻ ഹസൻ ഡെറാഡൂണിൽ സ്ഥിരതാമസമാക്കുകയും ബൗൺസറായി ജോലി ചെയ്യുകയുമായിരുന്നു.

അനധികൃത താമസം; സൗഹൃദം ഫേസ്ബുക്ക് വഴി

വ്യാജ രേഖകളും ഐഡന്റിറ്റികളും ഉപയോഗിച്ച് സംസ്ഥാനത്ത് താമസിക്കുന്നവരെ പിടികൂടുന്നതിനായി ജില്ലയിൽ തുടരുന്ന പ്രത്യേക പ്രചാരണത്തിനിടെയാണ് നെഹ്റു കോളനി പ്രദേശത്ത് ഒരു സ്ത്രീയോടൊപ്പം അനധികൃതമായി താമസിക്കുന്ന ബംഗ്ലാദേശി യുവാവിനെക്കുറിച്ച് പോലീസിന് വിവരം ലഭിച്ചത്.

ചോദ്യം ചെയ്യലിൽ മാമുൻ ഹസൻ ഞെട്ടിക്കുന്ന വിവരങ്ങൾ വെളിപ്പെടുത്തി. 2019-2021 കാലയളവിൽ ടൂറിസ്റ്റ് വിസയിൽ ഇയാൾ പലതവണ ഇന്ത്യ സന്ദർശിച്ചിരുന്നു. ഫേസ്ബുക്ക് വഴിയാണ് റീന ചൗഹാനുമായി സൗഹൃദം സ്ഥാപിച്ചത്. 2022-ൽ ഇരുവരും അനധികൃതമായി ഇന്ത്യ-ബംഗ്ലാദേശ് അതിർത്തി കടന്ന് ബംഗ്ലാദേശിൽ എത്തി വിവാഹിതരായി. വിവാഹശേഷം അനധികൃതമായി ഇന്ത്യയിൽ തിരിച്ചെത്തി ഡെറാഡൂണിൽ താമസം തുടങ്ങുകയായിരുന്നു.

മുൻ ഭർത്താവിന്റെ ഐ.ഡി. കാമുകന്

റീന ചൗഹാൻ തന്റെ മുൻ ഭർത്താവായ സച്ചിൻ ചൗഹാന്റെ പേരും വിലാസവും ഉപയോഗിച്ച് മാമുൻ ഹസന് വ്യാജ ആധാർ കാർഡ്, പാൻ കാർഡ്, മറ്റ് സർക്കാർ രേഖകൾ എന്നിവ നിർമ്മിച്ചു നൽകി. ഈ വ്യാജ ഐഡന്റിറ്റി ഉപയോഗിച്ച് മാമുൻ വർഷങ്ങളായി ഡെറാഡൂണിലെ ഒരു ക്ലബ്ബിൽ ബൗൺസറായി ജോലി ചെയ്തുവരികയായിരുന്നു.

ഈ വ്യാജ ഐഡന്റിറ്റി സൃഷ്ടിക്കുന്നതിൽ മറ്റ് പലർക്കും പങ്കുണ്ടെന്ന് പോലീസ് സംശയിക്കുന്നു. രഹസ്യ വിവരങ്ങളുടെ അടിസ്ഥാനത്തിൽ അലക്നന്ദ എൻക്ലേവിൽ റെയ്ഡ് നടത്തിയ പോലീസ് രണ്ടുപേരെയും അറസ്റ്റ് ചെയ്തു. ഇവരിൽ നിന്ന് വ്യാജ ആധാർ കാർഡുകൾ, പാൻ കാർഡുകൾ, മറ്റ് തിരിച്ചറിയൽ കാർഡുകൾ, വ്യാജരേഖകൾ നിർമ്മിക്കാൻ ഉപയോഗിക്കുന്ന ഡിജിറ്റൽ, ഭൗതിക വസ്തുക്കൾ എന്നിവ പിടിച്ചെടുത്തു.

വിപുലമായ അന്വേഷണത്തിന് നിർദ്ദേശം

വ്യാജ രേഖകൾ നിർമ്മിക്കാൻ മാമുൻ ഹസനെ സഹായിച്ച മറ്റ് കൂട്ടാളികളെയും തിരിച്ചറിയുകയും നിയമനടപടി സ്വീകരിക്കുകയും ചെയ്യുമെന്ന് ഡെറാഡൂൺ എസ്.എസ്.പി. അജയ് സിംഗ് അറിയിച്ചു.

വ്യാജ രേഖകൾ സൃഷ്ടിച്ചവർ ആരാണ്, ഇവരുടെ ബന്ധങ്ങൾ എത്രത്തോളം വ്യാപിച്ചിരിക്കുന്നു, മനുഷ്യക്കടത്ത് പോലുള്ള സംഘടിത ശൃംഖലകൾക്ക് ഇതിൽ പങ്കുണ്ടോ തുടങ്ങിയ കാര്യങ്ങൾ പോലീസ് അന്വേഷിച്ചുവരികയാണ്. അന്വേഷണത്തിൽ കൂടുതൽ നിർണ്ണായകമായ വെളിപ്പെടുത്തലുകൾ ഉണ്ടാകുമെന്ന് പ്രതീക്ഷിക്കുന്നു. അനധികൃതമായി താമസിക്കുന്നവർക്കെതിരെ ജില്ലയിൽ കർശന പരിശോധന തുടരുമെന്ന് എസ്.എസ്.പി. വ്യക്തമാക്കി.