നഴ്സിംഗ് ബിരുദധാരികളുടെ തൊഴിൽ നിയമനം വൈകുന്നു; ആശങ്കയിൽ വിദ്യാർത്ഥികൾ

വെല്ലിംഗ്ടൺ:ന്യൂസിലാൻഡിലെ നഴ്സിംഗ് ബിരുദധാരികൾക്കുള്ള തൊഴിൽ നിയമന ഉത്തരവുകൾ പ്രഖ്യാപിക്കുന്നത് വൈകുമെന്ന് അധികൃതർ അറിയിച്ചു.

'അഡ്വാൻസ്ഡ് ചോയ്സ് ഓഫ് എംപ്ലോയ്‌മെന്റ്' (ACE) വഴി ബുധനാഴ്ച ലഭിക്കേണ്ടിയിരുന്ന നിയമന അറിയിപ്പുകൾ നവംബർ 28-ലേക്ക് മാറ്റിയിരിക്കുകയാണ്. ഹെൽത്ത് ന്യൂസിലാൻഡിന് കീഴിൽ കൂടുതൽ ഒഴിവുകൾ കണ്ടെത്തുന്നതിനും പരിഗണിക്കുന്നതിനും വേണ്ടിയാണ് ഈ സമയം ഉപയോഗിക്കുന്നതെന്ന് അധികൃതർ വ്യക്തമാക്കി. എന്നാൽ അവസാന വർഷ പരീക്ഷാ സമയത്തുണ്ടായ ഈ അനിശ്ചിതത്വം വിദ്യാർത്ഥികളെ വലിയ ആശങ്കയിലാക്കിയിരിക്കുകയാണ്.

തൊഴിലവസരങ്ങൾ കുറയുന്നത് മൂലം പലരും ഓസ്‌ട്രേലിയയിലേക്ക് കുടിയേറാൻ സാധ്യതയുണ്ടെന്ന് നാഷണൽ സ്റ്റുഡന്റ് യൂണിറ്റ് ചെയർ ഡേവിസ് ഫെർഗൂസൻ പറഞ്ഞു. കഴിഞ്ഞ തവണ 45 ശതമാനം ബിരുദധാരികൾക്ക് മാത്രമാണ് ജോലി ലഭിച്ചത് എന്നത് വിദ്യാർത്ഥികളുടെ ഭയം വർദ്ധിപ്പിക്കുന്നു. 

എന്നാൽ, പരമാവധി ബിരുദധാരികൾക്ക് ഈ മാസം അവസാനത്തോടെ നിയമനം നൽകാൻ പ്രതിജ്ഞാബദ്ധരാണെന്ന് ഹെൽത്ത് ന്യൂസിലാൻഡ് ഡയറക്ടർ റോബിൻ ഷിയറർ പ്രതികരിച്ചു. വൈകിയാണെങ്കിലും മികച്ച തൊഴിൽ അവസരങ്ങൾ ലഭിക്കുമെന്ന പ്രതീക്ഷയിലാണ് ഉദ്യോഗാർത്ഥികൾ.