ബിഹാർ രാഷ്ട്രീയത്തിൽ ചിരാഗ് പാസ്വാൻ തരംഗം: ഒറ്റയാൾ പോരാട്ടത്തിലൂടെ അവിശ്വസനീയ മുന്നേറ്റം

 പാറ്റ്ന: ബിഹാർ നിയമസഭാ തിരഞ്ഞെടുപ്പിൽ എല്ലാ പ്രവചനങ്ങളെയും വെല്ലുവിളിച്ച് അവിശ്വസനീയമായ ശക്തിയായി ഉയർന്നുവന്നിരിക്കുകയാണ് ചിരാഗ് പാസ്വാനും അദ്ദേഹത്തിൻ്റെ ലോക് ജനശക്തി പാർട്ടിയും (രാം വിലാസ്). തങ്ങൾ മത്സരിച്ച 28 സീറ്റുകളിൽ 22 ഇടത്തും എൽ.ജെ.പി. (ആർ.വി.) മുന്നിട്ട് നിൽക്കുന്നത്, 2020-ൽ ഒറ്റ സീറ്റ് മാത്രം നേടിയ പാർട്ടിയുടെ വലിയ തിരിച്ചുവരവാണ് അടയാളപ്പെടുത്തുന്നത്. ചിരാഗ് പാസ്വാൻ്റെ ഈ നേട്ടം എൻ.ഡി.എ.യ്ക്കുള്ളിൽ അദ്ദേഹത്തിൻ്റെ പാർട്ടിയുടെ പങ്ക് പുനർനിർവചിക്കാൻ സാധ്യതയുണ്ടെന്ന് മാത്രമല്ല, ബിഹാർ രാഷ്ട്രീയത്തിലെ മാറുന്ന സമവാക്യങ്ങളെയാണ് ഇത് ഉയർത്തിക്കാട്ടുന്നത്.

2000-ൽ സ്ഥാപിതമായ ലോക് ജനശക്തി പാർട്ടി (എൽ.ജെ.പി.), ഗോദ്ര കലാപത്തിന് ശേഷം 2002-ൽ എൻ.ഡി.എ.യുമായി വേർപിരിഞ്ഞെങ്കിലും 2004-ൽ യു.പി.എ.യുടെ ഭാഗമായി. ഈ കാലയളവിൽ പാർട്ടി നേതാവ് രാം വിലാസ് പാസ്വാൻ നിരവധി  മന്ത്രി സ്ഥാനങ്ങൾ വഹിച്ചു. 2014-ൽ എൻ.ഡി.എ.യിലേക്ക് മടങ്ങിയെത്തിയ പാസ്വാൻ പ്രധാനമന്ത്രി നരേന്ദ്ര മോദിയുടെ മന്ത്രിസഭയിലും പ്രധാന പദവികളിൽ പ്രവർത്തിച്ചു. അദ്ദേഹത്തിൻ്റെ മരണശേഷം, ചിരാഗ് പാസ്വാനും അമ്മാവനായ പശുപതി കുമാർ പരസും തമ്മിലുള്ള അഭിപ്രായവ്യത്യാസങ്ങളെത്തുടർന്ന് പാർട്ടി പിളർന്നു. 2021 ജൂണിൽ പാർട്ടി ഔദ്യോഗികമായി രണ്ടായി പിരിഞ്ഞു; ചിരാഗ് പാസ്വാൻ നയിക്കുന്ന ലോക് ജനശക്തി പാർട്ടി (രാം വിലാസ്) എന്നും പശുപതി കുമാർ പരസ് നയിക്കുന്ന രാഷ്ട്രീയ ലോക് ജനശക്തി പാർട്ടി എന്നും. 2020-ൽ പരസ് വിഭാഗം എൻ.ഡി.എയുടെ ഭാഗമായിരുന്നു.

എങ്കിലും, എൻ.ഡി.എ.യുമായുള്ള ജൂനിയർ പാസ്വാൻ്റെ ബന്ധം എളുപ്പമായിരുന്നില്ല. 2020-ൽ സീറ്റ് വിഭജനത്തെച്ചൊല്ലിയുള്ള തർക്കങ്ങളെത്തുടർന്ന് ചിരാഗ് പാസ്വാൻ 137 സീറ്റുകളിൽ ഒറ്റയ്ക്ക് മത്സരിച്ചു. അന്ന് ഒരു സീറ്റ് മാത്രമാണ് നേടിയതെങ്കിലും, 29 മണ്ഡലങ്ങളിൽ ജെ.ഡി(യു)വിൻ്റെ ഫലങ്ങളെ ബാധിക്കാൻ അദ്ദേഹത്തിന് കഴിഞ്ഞിരുന്നു. എന്നാൽ 2024-ലെ ലോക്‌സഭാ തിരഞ്ഞെടുപ്പ് നിർണായക വഴിത്തിരിവായി. എൽ.ജെ.പി. (ആർ.വി.) മത്സരിച്ച അഞ്ച് സീറ്റുകളിലും വിജയിച്ചത് എൻ.ഡി.എയിൽ യുവ നേതാവിൻ്റെ സ്വാധീനം വർദ്ധിപ്പിച്ചു.

2025 നിയമസഭാ തിരഞ്ഞെടുപ്പിന് മുന്നോടിയായി കൂടുതൽ സീറ്റുകളിൽ മത്സരിക്കാൻ ചിരാഗ് പാസ്വാൻ താൽപ്പര്യം പ്രകടിപ്പിച്ചെങ്കിലും 28 സീറ്റുകളാണ് അനുവദിക്കപ്പെട്ടത്. സഖ്യത്തിലെ ഭിന്നതകളെ നിസ്സാരമായി തള്ളിക്കളഞ്ഞ അദ്ദേഹം, മുഖ്യമന്ത്രി നിതീഷ് കുമാറിനെ ബിഹാറിന്  "അത്യാവശ്യം" എന്നും "രാഷ്ട്രീയ നിലനിൽപ്പിൻ്റെ പാഠം" എന്നുമാണ് വിശേഷിപ്പിച്ചത്. ഇലക്ഷൻ കമ്മീഷൻ്റെ ട്രെൻഡുകൾ അനുസരിച്ച്, സുഗൗലി, ഗോവിന്ദ്ഗഞ്ച്, ബെൽസന്ദ്, ബഹദൂർഗഞ്ച്, കസ്ബ, ബൽറാംപൂർ, സിമ്രി, ബക്തിയാർപൂർ, ബോചഹാൻ, ദരൗലി, ഗാർഖ, മഹുവ, ബഖ്‌രി, പർബട്ട, നാഥ്‌നഗർ, ഫതുഹ, ദെഹ്രി, ഓബ്ര, ഷേർഘാട്ടി, ബോധ് ഗയ, രാജൗലി, ഗോവിന്ദ്പൂർ തുടങ്ങിയ മണ്ഡലങ്ങളിലാണ് എൽ.ജെ.പി. (ആർ.വി.) മുന്നിട്ട് നിൽക്കുന്നത്.

എൽ.ജെ.പി.യുടെ പ്രകടനം ബി.ജെ.പി.ക്കും ജെ.ഡി(യു)വിനും തങ്ങളുടെ പരമ്പരാഗത അടിത്തറകൾ ശക്തിപ്പെടുത്താൻ അവസരം നൽകിയിട്ടുണ്ട്. ഇത്, പ്രത്യേകിച്ചും മധ്യ, പടിഞ്ഞാറൻ ബിഹാറിലെ ദളിത്, ഇ.ബി.സി. കോട്ടകളിൽ എൻ.ഡി.എയ്ക്ക് മുന്നേറ്റമുണ്ടാക്കാൻ സഹായിച്ചു. ഈ പ്രദേശങ്ങൾ മുൻപ് ആർ.ജെ.ഡി.യുടെ ശക്തികേന്ദ്രങ്ങളായിരുന്നു.